កីឡា

លំអិតពី វិសាខាលេងកាន់តែធំត្រៀមប្រជែងជើងឯកនៅតៃវ៉ាន់

បានផុស

៩ ខែ មុន

នៅ

ថ្ងៃអង្គារ ២១ ឧសភា ២០២៤

ដោយ

លោក អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទាត់កម្ពុជាបានបង្ហាញវត្តមានកីឡាករបាល់ទះកំពូលៗបារាំង៣រូបដែលនឹងមកប្រទេសកម្ពុជា ប៉ុន្តែអ្នកគាំទ្រប្រហែលជាឆ្ងល់ថាតើមកកម្ពុជាដើម្បីអ្វី?

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបង្ហាញវត្តមានកីឡាករបាល់ទះបារាំង៣រូបនេះទំនងជាផែនការរបស់ក្លិបបាល់ទះវិសាខាដែលត្រៀមខ្លួនដើម្បីចូលរួមប្រកួតពានរង្វាន់ Win+ Streak Volleyball Invitational (WSVI) នៅកោះតៃវ៉ាន់ ចាប់ពីថ្ងៃទី២៩ ខែឧសភា រហូតដល់ថ្ងៃទី២ ខែមិថុនា ឆ្នាំ២០២៤ ដែលមាន៨ក្រុមចូលរួម។

លោក អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទាត់កម្ពុជា ដែលជាអនុប្រធានក្រុមបាល់ទះវិសាខាធ្លាប់បាននិយាយថា វិសាខាដាក់ផែនការយកជើងឯកនៅកោះតៃវ៉ាន់។ ការដាក់គោលដៅនេះគឺត្រូវយកកីឡាករលំដាប់កំពូលៗមកចូលរួមក្រុម ពីព្រោះពានរង្វាន់នៅកោះតៃវ៉ាន់គឺជាកម្មវិធីដែលក្លិបរៀបចំ ហើយអញ្ជើញក្លិបផ្សេងៗចូលរួម ដូច្នេះក្លិបនីមួយៗអាចនាំយកកីឡាករល្អៗមកពីគ្រប់ទីកន្លែងដោយសេរី និងមិនកំណត់កម្រិតតំបន់អាស៊ី ឬពិភពលោកទេ ឲ្យតែមានលទ្ធភាពនាំចូល។

ពាក់ព័ន្ធនឹងចំណុចនេះដែរ គួន ម៉ុម សមាជិកដ៏សំខាន់របស់ក្លិបវិសាខា បានប្រាប់សារព័ត៌មាន«កម្ពុជាថ្មី»ក្នុងបទសម្ភាសកាលចប់ពានរង្វាន់ Special Volleyball Cup ថា ៖«សម្រាប់ដំណឹងនេះពិតប្រាកដ ប៉ុន្តែមិនទាន់ដឹងថា ពួកគាត់អាចមកដល់ថ្ងៃណា។ ឮដំណឹងថា កីឡាករបារាំង លំដាប់ A របស់បារាំងមក។ បើបានពួកគាត់មកតាមការគ្រោងទុក ខ្ញុំសង្ឃឹម១០០ថា ក្រុមវិសាខានឹងឡើងវគ្គផ្តាច់ព្រ័ត្រ»។

កាលពីល្ងាចថ្ងៃចន្ទ ទី២០ ខែឧសភា ឆ្នាំ២០២៤ លោក អាំង សិរីពិសិដ្ឋ បានបង្ហាញវត្តមានកីឡាករបារាំង៣រូបគឺកីឡាករ Pierre Toledo, Thomas Gill និងកីឡាករ Francois Rebeyrol មុនពេលវិសាខាចេញដំណើរទៅកោះតៃវ៉ាន់តែម្តង។ នេះបញ្ជាក់ថា គឺជាផែនការសម្រាប់វិសាខាដើម្បីប្រជែងជើងឯកនៅតែវ៉ាន់តែម្តង។

កីឡាករ Pierre Toledo កើតឆ្នាំ២០០០ មានកម្ពស់១.៩៧ម៉ែត្រ មកពីក្លិប Chaumont VB52 នៃលីគបាល់ទះកំពូលបារាំង និងជាអតីតយុវជនជម្រើសជាតិបារាំង។ កីឡាករសញ្ជាតិបារាំង-អង់គ្លេស Thomas Gill កើតឆ្នាំ២០០០ មានកម្ពស់ ១.៩៨ម៉ែត្រ មកពីក្លិប Ajaccio នៃលីគបាល់ទះលំដាប់ទី២របស់បារាំង និងជាអតីតយុវជនជម្រើសជាតិបារាំង និងកីឡាករសញ្ជាតិបារាំង Francois Rebeyrol កើតឆ្នាំ១៩៩៩ មានកម្ពស់២.០២ម៉ែត្រ មកពីក្លិប Nice Volleyball នៃលីគបាល់ទះកំពូលបារាំង៕