កម្ពុជា ត្រៀមចូលរួមសន្និសីទថ្នាក់តំបន់ ស្តីពី “សារៈសំខាន់ ការវិនិយោគលើការអភិវឌ្ឍកុមារ”

អ្នកស្រី គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា ដឹកនាំកិច្ចប្រជុំជាមួយ គណៈប្រតិភូពាក់ព័ន្ធ ដើម្បីត្រៀមលក្ខណៈចូលរួមសន្និសីទថ្នាក់តំបន់ ស្តីពី “សារៈសំខាន់ នៃការវិនិយោគលើការអភិវឌ្ឍកុមារតូច” (INVESTING IN ECD) ដែលគ្រោងរៀបចំពី ថ្ងៃទី២៧-៣១ ខែឧសភា ឆ្នាំ២០២៤ នៅ ទីក្រុងប៉េណាំង ប្រទេស ម៉ាឡេស៊ី។

បើតាម ក្រសួងអប់រំ យុវជន និងកីឡា នៅថ្ងៃទី២១ ខែឧសភា នេះ បានឱ្យដឹងថា ការចូលរួមសន្និសីទថ្នាក់តំបន់ប្រចាំឆ្នាំ២០២៤ នេះ បានឆ្លុះបញ្ចាំងពីគំរូថ្មីមួយ និងភាពជាអ្នកដឹកនាំរបស់ ក្រសួងអប់រំ យុវជន និងកីឡា ដែលបានសម្របសម្រួលឱ្យមានការចូលរួមពីសំណាក់មន្ត្រីជំនាញ នាយកដ្ឋានពាក់ព័ន្ធ នៃក្រសួងអប់រំ យុវជន និងកីឡា តំណាងដៃគូអភិវឌ្ឍន៍ពាក់ព័ន្ធ និងតំណាងវិស័យឯកជន សរុបចំនួន ២៤នាក់។

តាមរយៈព្រឹត្តិការណ៍ដ៏មានសារៈសំខាន់នេះ អ្នករៀបចំកម្មវិធីបានផ្តល់ស្តង់តាំងពិព័រណ៍មួយកន្លែងសម្រាប់កម្ពុជា ដាក់តាំងបង្ហាញពីសមិទ្ធផលដែលបានសហការអភិវឌ្ឍរួមគ្នាសម្រាប់ការគាំពារ និងអភិវឌ្ឍកុមារតូច និងមានតំណាងប្រតិភូចូលរួមជាវាគ្មិនតាមប្រធានបទមួយចំនួនពាក់ព័ន្ធ៖ ១. ការអនុវត្តការងារគាំពារ និងអភិវឌ្ឍកុមារតូចបែបពហុវិស័យ ២. ការអនុវត្តកញ្ចប់អប់រំមាតាបិតាសម្រាប់ការគាំពារ និងអភិវឌ្ឍកុមារតូច និង៣. តួនាទីរបស់ភ្នាក់ងារសុខភាពក្នុងសហគមន៍ក្នុងការជួយកុមារតូចមានការអភិវឌ្ឍយឺតយ៉ាវ។

ក្នុងឱកាសនោះអ្នកស្រី គឹម សេដ្ឋានី បានផ្លែងអំណរគុណចំពោះដៃគូអភិវឌ្ឍពាក់ព័ន្ធក្នុងការរួមចំណែកលើកកម្ពស់ការងារគាំពារ និងអភិវឌ្ឍកុមារតូច និងបានណែនាំគណៈប្រតិភូ ត្រូវត្រៀមកញ្ចប់សម្ភារ និងឯកសារចាំបាច់ពាក់ព័ន្ធ ដើម្បីបានដាក់តាំងបង្ហាញ និងចែករំលែកដល់អ្នកចូលរួមដែលឆ្លុះបញ្ចាំងពីកិច្ចខិតខំប្រឹងប្រែងរួមគ្នាសម្រាប់ការពាំពារ និងអភិវឌ្ឍកុមារតូចនៅកម្ពុជា៕