ព័ត៌មានអន្ដរជាតិ

ឥណ្ឌា ប្រើប្រាស់ AI ជួយបញ្ឈប់គ្រោះថ្នាក់រថភ្លើងបុកដំរី

បានផុស

៤ ខែ មុន

នៅ

ថ្ងៃអង្គារ ២១ ឧសភា ២០២៤

ដោយ

Chheang

រដ្ឋ Tamil Nadu ដែលស្ថិតនៅភាគខាងត្បូងឥណ្ឌា បានដាក់ប្រើប្រាស់ប្រព័ន្ធឃ្លាំមើលភ្ជាប់ជាមួយបច្ចេកវិទ្យាបញ្ញាសិប្បនិម្មិត AI ដើម្បីបង្ការគ្រោះថ្នាក់សត្វដំរីនៅលើផ្លូវរថភ្លើង។ នេះបើយោងតាមការចុះផ្សាយរបស់សារព័ត៌មាន BBC នៅថ្ងៃទី២១ ខែឧសភា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងរយៈពេល១ទសវត្សចុងក្រោយ មានករណីងាប់សត្វដំរីចំនួន ៣៦ក្បាលនៅលើផ្លូវរថភ្លើងក្នុងរដ្ឋ Tamil Nadu។ ក្នុងចំណោមដំរីដែលងាប់ មាន១១ក្បាល បានជួបគ្រោះថ្នាក់នៅលើផ្លូវរថភ្លើងក្បែរទីក្រុង Madukkarai ដែលជាតំបន់ព្រៃឈើជាប់ព្រំប្រទល់រដ្ឋ Kerala។ ផ្លូវរថភ្លើងនៅតំបន់នោះ គឺជាផ្លូវប្រសព្វរបស់ហ្វូងដំរី ដែលត្រូវឆ្លងកាត់ចេញចូលពីតំបន់ព្រៃមួយទៅតំបន់ព្រៃមួយទៀត។

នៅក្នុងឆ្នាំ២០២១ តុលាការកំពូលនៅរដ្ឋ Tamil Nadu បានចេញបញ្ជាឲ្យនាយកដ្ឋានព្រៃឈើ និងរថភ្លើង ធ្វើយ៉ាងណាបង្ការឲ្យបាននូវករណីគ្រោះថ្នាក់សត្វដំរីបែបនេះទៀត។

មកទល់នឹងពេលនេះ នាយកដ្ឋានព្រៃឈើរដ្ឋ Tamil Nadu បានដំឡើងប៉មចំនួន ១២ អមនៅតាមផ្លូវរថភ្លើងក្រុង Madukkarai ហើយនៅលើប៉មនីមួយៗមានបំពាក់កាមេរ៉ាប្រើប្រាស់បច្ចេកវិទ្យា AI។ លោក Ashish Rajput អ្នកគ្រប់គ្រងគម្រោងនេះ បាននិយាយថា កាមេរ៉ា AI មានកម្មវិធីសម្គាល់ដឹងពីចលនាភាវៈមានជីវិត ដែលចូលមកក្បែរផ្លូវរថភ្លើង។ នៅពេលដំរីចូលមកបរិវេណខ្ទង់ ៣០ម៉ែត្រពីផ្លូវរថភ្លើង នោះសញ្ញាប្រកាសអាសន្ននឹងរោទិ៍ ហើយបញ្ជូនទៅកាន់បុគ្គលិករថភ្លើង និងមន្ត្រីព្រៃឈើ ដើម្បីសម្រួលឲ្យរថភ្លើងបន្ថយល្បឿន ព្រមទាំងបញ្ចៀសសត្វដំរីពីទិសដៅដែលមានគ្រោះថ្នាក់។

អ្នកស្រី Supriya Sahu លេខាធិការនៃនាយកដ្ឋានព្រៃឈើ Tamil Nadu បានប្រាប់ឲ្យដឹងថា គម្រោងប្រើ AI នេះ បានលេចចេញជារូបរាងកាលពីខែកុម្ភៈ ឆ្នាំ២០២៤ ដោយចាយអស់ថវិកាចំនួនជាង ៨៦ម៉ឺនដុល្លារ។ សម្រាប់ការអនុវត្តរយៈពេលប៉ុន្មានខែកន្លងមក ប្រព័ន្ធ AI បានចាប់ដឹងពីវត្តមាននៃដំណើរសត្វដំរីចំនួន ៤០០ក្បាល ដែលចូលមកកៀកផ្លូវរថភ្លើង ហើយបង្ការករណីគ្រោះថ្នាក់បានយ៉ាងជោគជ័យ៕

ដោយ៖ ឈាង