សម្ដេច ហ៊ុន ម៉ាណែត បញ្ជាឱ្យអាជ្ញាធរចាត់វិធានការដោយគ្មានការលើកលែងចំពោះក្រុមក្មេងទំនើង

សម្ដេចធិបតី ហ៊ុន ម៉ាណែត បញ្ជាឱ្យអភិបាលខេត្ត និងកម្លាំងមានសមត្ថកិច្ចទាំងអស់ ត្រូវចាត់វិធានការដោយគ្មានការលើកលែងចំពោះក្រុមក្មេងទំនើង ដែលកំពុងបង្កអសន្តិសុខនៅក្នុងសង្គមយ៉ាងអណាធិបតេយ្យ។ សម្ដេចធិបតី សង្កត់ធ្ងន់ថា ប្រយ័ត្នបងធំ ធំជាងអភិបាលខេត្ត។

ក្នុងនាមប្រមុខរាជរដ្ឋាភិបាល សម្ដេចធិបតី ហ៊ុន ម៉ាណែត បានបញ្ជាទៅអភិបាលនៃគណៈអភិបាលរាជធានី-ខេត្តទាំងអស់ ជាមួយនឹងសមត្ថកិច្ចពាក់ព័ន្ធ ត្រូវតែរឹតបន្ដឹង និងចាត់វិធានការឱ្យម៉ឺងម៉ាត់បំផុតចំពោះក្រុមក្មេងទំនើង ជាពិសេសក្រុមដាវសាំម៉ូរ៉ៃ។

បទបញ្ជារបស់សម្ដេចធិបតីពេលនេះ បន្ទាប់ពីសម្ដេចបានកត់សម្គាល់ឃើញថា ក្នុងរយៈពេលប៉ុន្មានថ្ងៃនេះ មានករណីកាប់គ្នាបានកើតឡើងជាបន្តបន្ទាប់ ដែលបានបង្កឱ្យមានរបួសស្នាម បំផ្លាញ់ទ្រព្យសម្បត្តិ និងធ្វើឱ្យមានការភិតភ័យដល់ប្រជាពលរដ្ឋ។ ដោយឃើញបែបនេះ សម្ដេចធិបតី បានបញ្ជាឱ្យអាជ្ញាធរមានសមត្ថកិច្ចទាំងអស់ ត្រូវធ្វើឱ្យបានម៉ឺងម៉ាត់ចំពោះក្មេងទំនើង ទាំងវិធានការរដ្ឋបាលក្នុងការបង្ក ទប់ស្កាត់ ទាំងវិធានការអនុវត្តច្បាប់ ដោយគ្មានការបន្ធូរបន្ថយ និងគ្មានលើកលែង ដើម្បីការពារសណ្ដាប់ធ្នាប់សាធារណៈ សន្តិសុខសង្គម។

សម្ដេចធិបតី ក៏បានអំពាវនាវឱ្យស្ថាប័នអយ្យការ និងស្ថាប័នតុលាការមានវិធានការការអនុវត្តច្បាប់ឱ្យបានម៉ឺងម៉ាត់លើសំណុំរឿងពាក់ព័ន្ធនឹងក្មេងទំនើងនេះ ប្រកបដោយការយកចិត្តទុកដាក់ និងការទទួលខុសត្រូវខ្ពស់ ដើម្បីលើកកម្ពស់ប្រសិទ្ធភាពនូវការអនុវត្តច្បាប់។ សម្ដេចធិបតី ក៏បានបញ្ជាក់ពីការណែនាំរបស់សម្ដេចឱ្យក្រសួងយុត្តិធម៌ ពិនិត្យមើលទិដ្ឋភាពច្បាប់នៃការប្រើប្រាស់ដាវសាំម៉ូរ៉ៃដោយក្រុមក្មេងទំនើងផងដែរ ខណៈក្រុមបងធំបងតូចមួយចំនួនតែងនិយមប្រើ ដាវសាំម៉ូរ៉ៃជាញឹកញាប់។

ថ្លែងក្នុងពិធីប្រកាសដាក់ឱ្យអនុវត្តផែនទីបង្ហាញផ្លូវឆ្ពោះទៅការគ្របដណ្តប់សុខភាពជាសកលនៅកម្ពុជា ឆ្នាំ២០២៤- ២០៣៥ នាព្រឹកថ្ងៃទី២៣ ខែឧសភា ឆ្នាំ២០២៤នេះ សម្ដេចធិបតី បានសង្កត់ធ្ងន់ទៅកាន់អភិបាលខេត្តថា «ប្រយ័ត្នបងធំ ធំជាងអភិបាលខេត្ត។ បើអភិបាលខេត្តបញ្ជាទៅហើយ ធ្វើបងធំអត់បែកផង មានន័យថា គាត់ខ្លាំងជាងអភិបាលខេត្ត»។