អ្នកលក់ត្បូងនៅស្រុករវៀង ច្នៃត្បូងធម្មជាតិជាវត្ថុអនុស្សាវរីយ៍ ខណៈអ្នកទិញមានជំនឿថា នាំលាភសំណាងចូលផ្ទះ 

ស្រុករវៀង ខេត្តព្រះវិហារ ជាស្រុកមួយដែលមានតំបន់ទេសចរណ៍កម្សាន្តមួយចំនួន ហើយក៏ជាតំបន់សម្បូរទៅដោយធនធានរ៉ែធម្មជាតិជាច្រើន ដូចជា មាសស្រួយ ត្បូងកែវណាំហ្វា គុជសាច់ជ្រូកបីជាន់ ត្បូងជីលិន គុជទឹកឃ្មុំ ថ្មក្រមួន និងពពុះសំរិទ្ធិ ឬហៅកំអែលដែក ត្រូវបានពលរដ្ឋនាំគ្នាចូលក្នុងព្រៃរុករករ៉ែទាំងនេះ យកមកលក់តាមកន្លែងលក់គ្រឿងសង្ហារឹម។

លោក ស៊ិន រិន អ្នកទទួលទិញ និងលក់ត្បូងធម្មជាតិ នៅភូមិព្រៃពពេល ឃុំរមទម ស្រុករវៀង បានឱ្យដឹងនៅព្រឹកថ្ងៃទី២៣ ខែឧសភា ឆ្នាំ២០២៤ ថា ក្រៅពីប្រកបរបរកសិកម្ម ប្រជាពលរដ្ឋបានឆ្លៀតរុករករ៉ែត្បូងថ្ម ត្បូងគ្រីស្តាល់ មាសស្រួយ ពីក្នុងព្រៃភ្នំ យកមកលក់ឱ្យគាត់ ដើម្បីបានរំលែកជីវភាពខ្លះក្រៅពីធ្វើស្រែចំការ។

លោកបន្តថា សព្វថ្ងៃនេះ របរលក់ត្បូងធម្មជាតិយកទៅកែច្នៃជាវត្ថុអនុស្សាវរីយ៍ យកទៅលក់ឱ្យភ្ញៀវក្នុងតម្លៃសមរម្យ ដើម្បីយកទៅតាំងនៅជំនាងផ្ទះ ដោយពួកគាត់មានជំនឿថា ទិញដាក់ផ្ទះអាចនាំលាភសំណាង លើករាសី និងសុខសប្បាយក្នុងគ្រួសារ ជាដើម។ លោកបញ្ជាក់ថា បន្ទាប់ពីគាត់ទិញពីពលរដ្ឋរួចមក គាត់ក៏បានច្នៃទៅជាវត្ថុអនុស្សាវរីយ៍ផ្សេងៗ ដាក់លក់ ហើយការលក់ត្បូងនេះភាគច្រើនពលរដ្ឋក្នុងស្រុកមិនសូវទិញវត្ថុទាំងនេះទេ គឺមានតែភ្ញៀវមកកុម្ម៉ង់តែប៉ុណ្ណោះ។

ចំណែកអ្នកទេសចរក្នុងស្រុក ដែលមកកម្សាន្តនៅខេត្តព្រះវិហារ បានឱ្យដឹងថា ពេលឃើញរបស់ស្អាតៗយ៉ាងដូច្នេះក៏នាំគ្នាទិញ ដើម្បីយកទៅដាក់តាំងក្នុងផ្ទះដោយពួកគាត់មានជំនឿថា ទិញដាក់ផ្ទះអាចនាំលាភសំណាង លើករាសី និងសុខសប្បាយក្នុងគ្រួសារ៕

ដោយ៖ជុន កុសល