ព័ត៌មានជាតិ
មន្ត្រី៖ ព្រឹត្តិការណ៍ជំនួបម៉ូតូ និងយានយន្ត ក្លាយជាកញ្ចប់ផលិតផលទេសចរណ៍ថ្មីនៅកម្ពុជា
ក្រុមអ្នកស្រលាញ់ម៉ូតូ និងរថយន្ត បានជួបជុំគ្នានៅក្នុងបរិវេណអតីតអាកាសយានដ្ឋានអន្តរជាតិសៀមរាប ដើម្បីចូលរួមក្នុងព្រឹត្តិការណ៍នៃជំនួបម៉ូតូ និងយានយន្ត លើកទី១ ដែលធ្វើឡើងរយៈពេល ៣ថ្ងៃនៅខេត្តសៀមរាប។ ព្រឹត្តិការណ៍នេះ ត្រូវបាន មន្ត្រីជាន់ខ្ពស់ក្រសួងទេសចរណ៍ ចាត់ទុកថា ជាកញ្ចប់ផលិតផលទេសចរណ៍ថ្មីមួយទៀតរបស់កម្ពុជា។
ថ្លែងនៅក្នុងពិធីបើកព្រឹត្តិការណ៍ជំនួបម៉ូតូ និងយានយន្ត ក្រោមប្រធានបទ «ជំនួបយានយន្ត ជំរុញទេសចរណ៍» នារាត្រីថ្ងៃទី២៥ ខែឧសភា ឆ្នាំ២០២៤ លោក គុជ បញ្ញាសា រដ្ឋលេខាធិការក្រសួងទេសចរណ៍ បានលើកឡើងថា គ្រប់អាណត្តិរបស់រាជរដ្ឋាភិបាលកម្ពុជា បានចាត់ទុកវិស័យទេសចរណ៍ ជាប៉ូលដ៏សំខាន់នៅក្នុងការអភិវឌ្ឍសេដ្ឋកិច្ចជាតិ ដោយបានបង្កើតនូវផលិតផលទេសចរណ៍ថ្មីៗជាច្រើន។ លោក បញ្ជាក់ថា ជាក់ស្តែងព្រឹត្តិការណ៍នៃជំនួបម៉ូតូ និងយានយន្ត ពេលនេះ បានបង្ហាញអំពីការបង្កើតនូវកញ្ចប់ផលិតផលទេសចរណ៍ថ្មីសម្រាប់ទាក់ទាញទាំងទេសចរបរទេស និងទេសចរក្នុងស្រុក។
បើតាមអភិបាលរងខេត្តសៀមរាប លោក សំកុល សុចិត្រា ការផ្តួចផ្តើមរៀបចំព្រឹត្តិការណ៍នៃជំនួបម៉ូតូ និងយាយន្ត គឺក្នុងគោលបំណងជំរុញការផ្សព្វផ្សាយវិស័យទេសចរណ៍កម្ពុជា ហើយក៏ជាឱកាសដ៏ល្អដើម្បីជួយបង្កើននូវការផ្សព្វផ្សាយពីសក្តានុពលទេសចរណ៍សម្រាប់ខេត្តសៀមរាប នៅក្នុងដំណាក់កាលនៃការស្តារ និងលើកស្ទួយវិស័យទេសចរណ៍កម្ពុជា ក្រោមប្រធានបទ «ជំនួបយានយន្ត ជំរុញទេសចរណ៍»។
លោកអភិបាលរងខេត្ត បានបន្តថា ស្របតាមអនុសាសន៍របស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា រាជរដ្ឋាភិបាលបានដាក់ចេញនូវកម្មវិធីទស្សនាសៀមរាប ឆ្នាំ២០២៤ ដើម្បីចូលរួមស្តារ និងលើកស្ទួយវិស័យទេសចរណ៍ក្នុងខេត្តនេះឱ្យមានសន្ទុះឡើងវិញ។
លោក បានគូសបញ្ជាក់ថា ខេត្តសៀមរាប ជាខេត្តប៉ូលទេសចរណ៍មួយដ៏សំខាន់របស់កម្ពុជា ដែលមានប្រាសាទអង្គរវត្តជាសម្បត្តិបេតិកភ័ណ្ឌពិភពលោក និងមានតំបន់ទេសភាពធម្មជាតិ អេកូទេសចរណ៍ជាច្រើនទៀត សម្រាប់ភ្ញៀវទេសចរទស្សនាកម្សាន្ត។ ដោយមានការយកចិត្តទុកដាក់ពីរាជរដ្ឋាភិបាល ជាពិសេសមានការចង្អុលបង្ហាញពីក្រសួងទេសចរណ៍ និងមានការគាំទ្រពីក្រសួងស្ថាប័នពាក់ព័ន្ធ ព្រមទាំងមានកិច្ចសហប្រតិបត្តិការល្អជាមួយផ្នែកឯកជន ដៃគូអភិវឌ្ឍន៍ជាតិ-អន្តរជាតិនានា និងការរួមចំណែកគាំទ្រពីប្រជាពលរដ្ឋក្នុងខេត្តសៀមរាម ក៏ដូចជាភ្ញៀវទេសចរជាតិ និងអន្តរជាតិ ធ្វើឱ្យវិស័យទេសចរណ៍ខេត្តសៀមរាបកាន់តែមានការអភិវឌ្ឍរីកចម្រើន និងបានចូលរួមចំណែកលើកកម្ពស់ជីវភាពរស់នៅ និងកាត់បន្ថយភាពក្រីក្ររបស់ប្រជាពលរដ្ឋបានយ៉ាងល្អប្រសើរ។
ព្រឹត្តិការណ៍ជំនួបម៉ូតូ និងយានយន្ត នឹងរៀបចំធ្វើឡើងនៅអតីតអាកាសយានដ្ឋានអន្តរជាតិសៀមរាប ចាប់ពីថ្ងៃទី២៤ ដល់ថ្ងៃទី២៦ ខែឧសភា ឆ្នាំ២០២៤។
បើតាមលោក ទៀ ស្យាម អនុប្រធានសហព័ន្ធកីឡាយានយន្តកម្ពុជា ក្រៅពីការទាក់ទាញទេសចរ ការរៀបចំព្រឹត្តការណ៍នេះ ក៏មានគោលបំណងចង់ឱ្យអ្នកដែលស្រលាញ់យានយន្តប្រឹងប្រែងហ្វឹកហ្វឺនខ្លួនឱ្យទៅជាកីឡាករក្នុងទីលាន ជាជាងការលេងនៅលើដងផ្លូវសាធារណៈដែលនាំមកនូវភាពរំខាន និងគ្រោះថ្នាក់ដល់អ្នកដទៃ។ លោក ថា «ការលេងយានយន្តនៅលើទីលានវាបានផ្តល់នូវកិត្តិយស ដូច្នេះយើងគួរធ្វើខ្លួនឱ្យក្លាយជាកីឡាករ»៕ ដោយ៖ គឿន វេត
-
ព័ត៌មានជាតិ២ ថ្ងៃ ago
ព្យុះចំនួន២ នឹងជះឥទ្ធិពលលើកម្ពុជាក្នុងពេលតែមួយចាប់ពីថ្ងៃនេះ ដល់ថ្ងៃទី២តុលា
-
ជីវិតកម្សាន្ដ៦ ថ្ងៃ ago
លោកឧកញ៉ា លាង ពៅ ថា Ishowspeed ធ្វើការគ្មានទំនួលខុសត្រូវ ក្នុងថ្ងៃ Gumball 3000 (មានវីដេអូ)
-
ព័ត៌មានអន្ដរជាតិ២ ថ្ងៃ ago
ភ្នំមួយទៀតនៅវៀតណាម ប្រេះប្រវែង១០០ម៉ែត្រ បង្កការភ័យខ្លាច
-
ចរាចរណ៍៣ ថ្ងៃ ago
ឡិចស៊ីស 470 មួយគ្រឿង បោះពួយលឿនបែកកង់ជ្រុលបុកបង្គោលភ្លើងរលំ ០២ ដើម
-
ព័ត៌មានជាតិ៦ ថ្ងៃ ago
ស្ថានភាពកម្ពស់ទឹកទន្លេមេគង្គខេត្តក្រចេះព្រឹកនេះ
-
ចរាចរណ៍៤ ថ្ងៃ ago
រថយន្តដឹកទំនិញពាក់ស្លាកលេខ ខេមរៈភូមិន្ទបើកកិនគម្របលូបាក់ ខណៈដឹកទំនិញចេញពីឃ្លាំង
-
ជីវិតកម្សាន្ដ១ សប្តាហ៍ ago
លោក លៀក លីដា បង្ហាញការខកចិត្តចំពោះការរិះគន់របស់ Allan
-
ជីវិតកម្សាន្ដ១ សប្តាហ៍ ago
Allan អះអាងថា ខ្លួនហ៊ានទទួលយកការវិនិយោគ និងប្រើថវិកាត្រឹម ៨មុឺនដុល្លារប៉ុណ្ណោះ ដើម្បីផលិតកុនគុណភាព