គណៈកម្មាធិការអធិការកិច្ចចិន មកបំពេញទស្សនកិច្ចនៅកម្ពុជា ដើម្បីពង្រឹងកិច្ចការប្រឆាំងអំពើពុករលួយ

គណៈប្រតិភូគណៈកម្មាធិការអធិការកិច្ចវិន័យបក្សកុម្មុយនីស្តចិន ខេត្តក្វាងទុង អញ្ជើញមកដល់ប្រទេសកម្ពុជាហើយ នៅថ្ងៃទី២៦ ខែឧសភា ឆ្នាំ ២០២៤នេះ ដើម្បីបំពេញទស្សនកិច្ច ក្នុងគោលបំណងផ្លាស់ប្តូរបទពិសោធ និងពង្រឹងកិច្ចសហប្រតិបត្តិការលើកិច្ចការប្រឆាំងអំពើពុករលួយ។

គណៈប្រតិភូនៃគណៈកម្មាធិការអធិការកិច្ចវិន័យបក្សកុម្មុយនិស្តចិន និងគណៈកម្មការអធិការត្រួតពិនិត្យកិច្ចការរដ្ឋចិន ខេត្តក្វាងទុង គឺដឹកនាំដោយលោក Song Fulong ដើម្បីបំពេញទស្សនកិច្ចជាផ្លូវការនៅកម្ពុជា ចាប់ពីថ្ងៃទី២៦ ដល់ថ្ងៃទី២៨ ខែឧសភា ឆ្នាំ២០២៤។ ដំណើរទស្សនកិច្ចរបស់គណៈប្រតិភូចិនពេលនេះ គឺឆ្លើយតបតាមការអញ្ជើញរបស់លោកទេសរដ្ឋមន្ត្រី ឱម យិនទៀង ប្រធានអង្គភាពប្រឆាំងអំពើពុករលួយកម្ពុជា។

ក្នុងដំណើរទស្សនកិច្ចនេះ គណៈប្រតិភូខេត្តក្វាងទុង នឹងជួបពិភាក្សាការងារជាមួយលោកទេសរដ្ឋមន្ត្រី ឱម យិនទៀង ចូលជួបសម្តែងការគួរសមជាមួយលោកអភិបាលរាជធានីភ្នំពេញ ស្នងការនគរបាលរាជធានីភ្នំពេញ និងជួបជាមួយអ្នកធុរកិច្ចចិននៅកម្ពុជា ព្រមទាំងចូលរួមកម្មវិធីសប្បុរសធម៌ ហើយទស្សនាព្រះបរមរាជវាំង។

គណៈប្រតិភូ ក៏នឹងអញ្ជើញធ្វើទស្សនកិច្ចនទៅកាន់ខេត្តព្រះសីហនុ និងចូលជួបសម្តែងការគួរសមជាមួយលោកអភិបាលខេត្តព្រះសីហនុ ទស្សនាកំពង់ផែស្វយ័តក្រុងព្រះសីហនុ និងតំបន់សេដ្ឋកិច្ចពិសេសផងដែរ៕