កីឡា

ម៉ោង១ថ្ងៃនេះ វិសាខា ប៉ះក្រុមអូស្ត្រាលី Volleyball Academy នៅតៃវ៉ាន់

បានផុស

៨ ខែ មុន

នៅ

ថ្ងៃពុធ ២៩ ឧសភា ២០២៤

ដោយ

ក្លិបបាល់ទះ វិសាខា ដល់ពេលត្រូវបង្ហាញសមត្ថភាពមែនទែនហើយ បន្ទាប់ពីនាំចូលកីឡាករលំដាប់លីគកំពូលបារាំងកាលពីប៉ុន្មានថ្ងៃមុននៅពេលពួកគេត្រូវប្រកួតជាមួយក្រុមបាល់ទះអូស្ត្រាលី Volleyball Academy វេលាម៉ោង១រសៀល ថ្ងៃទី២៩ ខែឧសភា ឆ្នាំ២០២៤ នៅកោះតៃវ៉ាន់ក្នុងពានរង្វាន់ Win+ Steak Volleyball Cup។

សមាជិកថ្មីសញ្ជាតិបារាំង៣រូបគឺ Francois Rebeyrol, Thomas Gill និង Prierre Toledo ទើបតែមកដល់ប្រទេសកម្ពុជាកាលពីថ្ងៃទី២១ ខែឧសភា កន្លងទៅនេះ និងបានចូលរួមហ្វឹកជាមួយគ្នាបានតែប៉ុន្មានថ្ងៃប៉ុណ្ណោះទេ ប៉ុន្តែវិសាខាបានយកឈ្នះមកពីវៀតណាម Long An ដោយលទ្ធផល ៣-០ សម្រាប់ការប្រកួតមិត្តភាពកាលពីថ្ងៃទី២៤ ខែឧសភា ឆ្នាំ២០២៤ នៅពហុកីឡដ្ឋានជាតិអូឡាំពិក។

វិសាខាទើបតែធ្វើដំណើរទៅដល់កោះតៃវ៉ាន់កាលពី ថ្ងៃទី២៧ ខែឧសភា ដើម្បីចូលរួមប្រកួតក្នុងពានរង្វាន់ Win+ Steak Volleyball Cup ដែលមាន៨ក្រុមចូលរួមប្រកួត។ ការប្រកួតបើកឆាកវេលាម៉ោង១រសៀល ថ្ងៃទី២៩ ខែឧសភានេះ វិសាខាត្រូវប៉ះក្រុមអូស្ត្រាលី Volleyball Academy។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមអូស្ត្រាលី Volleyball Academy គឺជាក្រុមអភិវឌ្ឍកីឡាបាល់ទះក្នុងសាល និងលើដីខ្សាច់អាជីពដែលមានកម្មវិធីបណ្តុះបណ្តាលត្រឹមត្រូវ និងស្តង់ដាដែលមានគោលបំណងក្លាយជាកីឡាករបាល់ទះអាជីពឈានឆ្ពោះទៅរកការចូលរួមកម្រិតអន្តរជាតិ ជាពិសេសកីឡាអូឡាំពិកតែម្តង។ ដូច្នេះវិសាខាប៉ះ Volleyball Academy មិនមែនជាងាយស្រួលនោះទេ។

វាអាចជាសម្ពាធធំមួយដែរសម្រាប់វិសាខាដោយសារតែបានដាក់គោលដៅខ្ពស់មែនទែនក្នុងការប្រកួតពានរង្វាន់នៅកោះតៃវ៉ាន់នេះ។ លោក អាំង សិរីពិសិដ្ឋ អនុប្រធានក្លិបបាល់ទះវិសាខាធ្លាប់បាននិយាយថា វិសាខា ដាក់គោលយកឈ្នះជើងឯកពីតៃវ៉ាន់។ សម្រាប់ការគោលដៅធំនេះ វិសាខាបានចំណាយប្រាក់យ៉ាងច្រើនដើម្បីនាំយកកីឡាករលំដាប់កំពូលៗមកពីប្រទេសបារាំងដើម្បីចូលរួមជាក្រុមក្នុងរយៈពេលខ្លី។

រូបមន្តនៃការប្រកួតពានរង្វាន់ Win+ Steak Volleyball Invitational Tournament មានពីរដំណាក់កាល។ ដំណាក់កាលសន្សំពិន្ទុក្នុងពូល ក្រុមនីមួយៗត្រូវឆ្លងកាត់៣ប្រកួតតាមពូលរៀងៗខ្លួន។ បន្ទាប់មក ក្រុមនីមួយៗនឹងស្ថិតនៅតាមចំណាត់ថ្នាក់ចាប់ពីលេខ១ដល់៨ អាស្រ័យទៅលើពិន្ទុដែលឈ្នះ និងចាញ់។

ដំណាក់កាលទី២ ក្រុមលេខ៧ ប៉ះ ក្រុមលេខ៨ ដើម្បីដណ្តើមចំណាត់ថ្នាក់លេខ៧។ ក្រុមលេខ៥ ប្រកួតជាមួយក្រុមលេខ៦ ដើម្បីដណ្តើមយកចំណាត់ថ្នាក់លេខ៥ ហើយក្រុមលេខ៣ប្រកួតជាមួយក្រុមលេខ៤ ដើម្បីដណ្តើមចំណាត់ថ្នាក់លេខ៣ និងក្រុមលេខ១ប្រកួតជាមួយក្រុមលេខ២ដើម្បីដណ្តើមយកជើងឯក។

ក្រុមដែលចូលរួមមានក្រុមម្ចាស់ផ្ទះ Win Streak, វិសាខា (កម្ពុជា), ក្លិប Flying Falcon (ម៉ាឡេស៊ី), ក្លិប Nature Med Club (ម៉ុងហ្គោលី), ក្លិប Long My Construction (តៃវ៉ាន់), ក្លិប Saitama Azalea (ជប៉ុន), ក្រុម Australian Volleyball Academy (អូស្ត្រាលី) និងក្លិប Thanh Pho Ho Chi Minh (វៀតណាម)។

កម្មវិធីប្រកួតរបស់ វិសាខា