​សហគ្រាស វង្ស តារា ​ចាយទុនជាង ៤០ ម៉ឺនដុល្លារ កែច្នៃគ្រំចំពុះទា

ផលិតផល​គ្រំចំពុះទា ពាមក្រសោប ស្ថិតក្នុងឃុំពាមក្រសោប ស្រុកមណ្ឌលសីមា ខេត្តកោះកុងចាប់ផ្ដើម​មាន​វត្តមាន​នៅកម្ពុជានៅដើមឆ្នាំ ២០២០។

កូនស្រីម្ចាស់សហគ្រាស វង្ស តារា កញ្ញា វង្ស ដាលីស ប្រាប់កម្ពុជាថ្មីថា ការកែច្នៃដំបូងក្រុមហ៊ុនឪពុករបស់នាងផ្ដោត លើ​គ្រំចំពុះទាសម្រាប់ផ្គត់ផ្គង់ទីផ្សារក្នុងស្រុក។

ក្រុមហ៊ុនកែច្នៃ វង្ស តារា មានផលិតផលកែច្នៃជាច្រើនមុខ ដូចជាគ្រំជំពុះទា ដែលមានក្រៀម បកសាច់មួយចំហៀង និងបកសាច់សុទ្ធ បង្គាក្រៀម និងកាពិជាដើម។

ចំពោះសង្វាក់ផលិតកម្ម កញ្ញ វង្ស ដាលីស ប្រាប់ថា សិប្បកម្មបានប្រមូលទិញផលសមុទ្រពីប្រជាសហគមន៍ដែលជាអ្នកចិញ្ចឹម យក​មកលាងសម្អាតស្ងោរបកយកសាច់។

បច្ចុប្បន្នផលិតផលកែច្នៃ វង្ស តារា មានលក់ទូទាំង ២៥ រាជធានី-ខេត្ត ហើយក៏មានលក់នៅផ្សារម៉ាក្រូផងដែរ។

កញ្ញ វង្ស ដាលីស ប្រាប់ថា ដើមទុនគិតចាប់តាំងពីការចាប់ផ្ដើមដំបូងប្រមាណ ៤០ ម៉ឺនដុល្លារ ខណៈមួយរយៈនេះ មានអតិថិជនចាប់អារម្មណ៍ច្រើន និងមានការគាំទ្រសឹងរាល់ថ្ងៃ ដែលថ្ងៃខ្លះផលិតដល់ ១ តោនសាច់ក៏មាន។

ចំពោះតម្លៃគ្រំចំពុះទាដែលកែច្នៃរួចហើយ ចន្លោះពី ៦ ទៅ ៧ ដុល្លារ សម្រាប់គ្រំជំពុះទាបកមួយចំហៀង ខណៈសាច់សុទ្ធ ៤ ម៉ឺនរៀល ក្នុងមួយគីឡូ៕