ព័ត៌មានអន្ដរជាតិ

អាមេរិក ជប៉ុន និងកូរ៉េខាងត្បូង រួមដៃគ្នាធ្វើកិច្ចសហប្រតិបត្តិការដោះស្រាយការបាញ់មីស៊ីលរបស់ កូរ៉េខាងជើង

បានផុស

៣ សប្តាហ៍ មុន

នៅ

ថ្ងៃព្រហស្បតិ៍ ៣០ ឧសភា ២០២៤

ដោយ

ជប៉ុន អាមេរិក និងកូរ៉េខាងត្បូងបានធ្វើកិច្ចសហប្រតិបត្តិការរួមគ្នាដើម្បីដោះស្រាយបញ្ហាការបាញ់មីស៊ីលរបស់កូរ៉េខាងជើង បន្ទាប់ពីទីក្រុងព្យុងយ៉ាងបានបាញ់មីស៊ីលជាច្រើនគ្រាប់គំរាមគំហែងកូរ៉េខាងត្បូង ។ នេះបើយោងតាមការចេញផ្សាយរបស់ទូរទស្សន៍ជាតិជប៉ុននៅថ្ងៃទី៣០ ខែឧសភានេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងកិច្ចសហប្រតិបត្តិការនេះកើតមានឡើង បន្ទាប់ពីលោក Hamamoto Yukiya អគ្គនាយករងនៃការិយាល័យកិច្ចការអាស៊ី និងមហាសមុទ្ររបស់ក្រសួងការបរទេសជប៉ុន, លោកស្រី Jung Pak អ្នកតំណាងពិសេសរបស់សហរដ្ឋអាមេរិកប្រចាំនៅកូរ៉េខាងជើង និងលោក Lee Jun-il អគ្គនាយកនៃគោលនយោបាយឧបទ្វីបកូរ៉េរបស់កូរ៉េខាងត្បូងបានជួបពិភាក្សាតាមទូរស័ព្ទ បន្ទាប់ពីការបាញ់មីស៊ីលរបស់កូរ៉េខាងជើង ។

មន្ត្រីទាំងបីរូបបានបញ្ជាក់ថា សកម្មភាពរបស់កូរ៉េខាងជើងបានរំលោភលើដំណោះស្រាយដែលពាក់ព័ន្ធរបស់ក្រុមប្រឹក្សាសន្តិសុខអង្គការសហប្រជាជាតិ។ ពួកគេក៏បានថ្កោលទោសយ៉ាងខ្លាំងចំពោះទីក្រុងព្យុងយ៉ាងចំពោះការគំរាមកំហែងដល់សន្តិភាព និងសន្តិសុខក្នុងតំបន់ និងសហគមន៍អន្តរជាតិ ហើយបានយល់ព្រមបន្តកិច្ចសហប្រតិបត្តិការលើបញ្ហានេះ ។

គួរបញ្ជាក់ថា កូរ៉េខាងជើងបានបន្តអភិវឌ្ឍន៍កម្មវិធីនុយក្លេអ៊ែរបស់ខ្លួនជាបន្តបន្ទាប់ ដែលបង្កការព្រួយបារម្ភដល់បណ្ដាប្រទេសនានា ជាពិសេសប្រទេសដែលជាសត្រូវកូរ៉រខាងជើង ខណៈថ្មីៗនេះទីក្រុងព្យុងយ៉ាងបានបាញ់បង្ហោះផ្ហាយរណបទៅកាន់លំហអាកាស ប៉ុន្តែបានបរាជ័យដោយសារបញ្ហម៉ាស៊ីន ។

ទោះបីជាយ៉ាងនេះក្ដី មេដឹកនាំកូរ៉េខាងជើងលោក គីម ជុងអ៊ុន បាននិយាយថា ការបរាជ័យនេះមិនអាចរារាំងការរីកចម្រើនរបស់ខ្លួននោះទេ និងថែមទាំងបាញ់មីស៊ីលប្រមាណ ១០ គ្រាប់គំរាមកូរ៉េខាងត្បូងថែមទៀតផង ៕

អត្ថបទ៖ ប៊ុន សុភាព