ណាតូ ព្រមានថា ការវាយប្រហារតាមអ៊ីនធឺណិតអាចបង្កឲ្យប្រើមាត្រា ៥

តាមការចុះផ្សាយរបស់ RT, ប្រធានគណៈកម្មាធិការយោធារបស់អង្គការណាតូ លោកឧត្តមនាវី Rob Bauer បាននិយាយកាលពីថ្ងៃសៅរ៍ទី១ខែមិថុនាថា សម្ព័ន្ធភាពមួយនេះ អាចយកមាត្រា៥មកប្រើប្រាស់និងការឆ្លើយតបផ្នែកយោធា ប្រសិនបើមានការវាយប្រហារតាមប្រព័ន្ធអ៊ីនធឺណិត ដែលឧបត្ថម្ភដោយរដ្ឋជាទ្រង់ទ្រាយធំលើសមាជិករបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងអំពីការគំរាមកំហែងផ្នែកសន្តិសុខតាមអ៊ីនធឺណិត ក្នុងកិច្ចសន្ទនា Shangri-La ដែលជាសន្និសីទសន្តិសុខប្រចាំឆ្នាំ រៀបចំដោយវិទ្យាស្ថានអន្តរជាតិសម្រាប់ការសិក្សាយុទ្ធសាស្ត្រ (IISS) នៅប្រទេសសិង្ហបុរី លោក Bauer បានបញ្ជាក់សារជាថ្មី អំពីការត្រៀមខ្លួនរបស់ប្លុកណាតូ ក្នុងការឆ្លើយតបផ្នែកយោធា សូម្បីតែការវាយប្រហារដោយមេរោគកំព្យូទ័រក៏ដោយ។

លោកថ្លែងថា “នៅអង្គការណាតូ យើងបានព្រមព្រៀងគ្នារួចហើយក្នុងចំណោមសម្ព័ន្ធមិត្តទាំងអស់ថា ជាគោលការណ៍ ការវាយប្រហារតាមអ៊ីនធឺណិតអាចជាការចាប់ផ្តើមនៃនីតិវិធីមាត្រា៥។ ដូច្នេះវាមិនត្រឹមតែជាការវាយប្រហាររូបវន្តប៉ុណ្ណោះទេ ប៉ុន្តែការវាយប្រហារតាមអ៊ីនធឺណិតក៏អាចជាមូលដ្ឋាននៃការជជែកដេញដោលក្នុងមាត្រា៥ ផងដែរ”។

ទោះបីជាយ៉ាងណាក៏ដោយ លោកទទួលស្គាល់ថា ការឆ្លើយតបរួម ចំពោះការវាយប្រហារបែបនេះអាចមិនច្បាស់លាស់ ព្រោះវាពិបាកកំណត់ណាស់ថាតើនរណាជាអ្នកនៅពីក្រោយខ្នង។

សូមបញ្ជាក់ នេះមិនមែនទើបលើកដំបូងឡើយដែលណាតូ ព្រមាន ប្រើមាត្រា៥ សងសឹកចំពោះការវាយប្រហារតាមអ៊ីនធឺណិតធ្ងន់ធ្ងរ ពោលគឺសម្ព័ន្ធភាពដឹកនាំដោយសហរដ្ឋអាមេរិកបានព្រមានជាយូរមកហើយ ថ្វីបើមាត្រានេះចែងអំពីការវាយប្រហារដោយប្រដាប់អាវុធប្រឆាំងនឹងសមាជិកមួយឬច្រើន នឹងត្រូវចាត់ទុកថាជាការវាយប្រហារលើសមាជិកទាំងអស់ក៏ដោយ៕

អត្ថបទ៖ សុខ សុវណ្ណ