ព័ត៌មានជាតិ

ដឹងលម្អិតស្ថានភាពផ្លូវជាតិលេខ ១០ កំណាត់ណាបានចាក់កៅស៊ូ និងមិនទាន់ចាក់កៅស៊ូ ងាយស្រួលបើកបរពេលភ្លៀង

បានផុស

៨ ខែ មុន

នៅ

ថ្ងៃអង្គារ ៤ មិថុនា ២០២៤

ដោយ

ខណៈផ្លូវជាតិលេខ ១០ ដែលត្រូវសាងសង់កាត់ឧបសគ្គមានពុះភ្នំ កាត់ជ្រោះដងព្រៃ មានទាំងការសាងសង់ស្ពានខ្ពស់ជាងគេនៅប្រទេសកម្ពុជាកម្ពស់ជាង ៧០ ម៉ែត្រផងនោះ ស្ថានភាពផ្លូវបច្ចុប្បន្ន មានកំណាត់ខ្លះបានឈានទៅចាក់កៅស៊ូ និងកំណាត់ខ្លះនៅបន្តជាគ្រួសក្រហមនៅឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមមន្រ្តីក្រសួងសាធារណការនិងដឹកជញ្ជូនបានឲ្យដឹងថា ក្នុងប្រវែងផ្លូវជាង ១៩០ គីឡូម៉ែត្រលើផ្លូវជាតិលេខ ១០ ចាប់ពីស្រុកសំឡូតខេត្តបាត់ដំបងដល់ខេត្តកោះកុង មានកំណាត់ខ្លះបានសម្រេចចាក់កៅស៊ូបញ្ចប់ ១០០% និងកំណាត់ខ្លះនៅជាក្រួសក្រហមកំពុងឈានទៅចាក់កៅស៊ូបន្តទៀត។

មន្រ្តីអ្នកនាំពាក្យបានបង្ហាញពីស្ថានភាពផ្លូវដែលបានចាក់កៅស៊ូ និងកំណាត់នៅជាគ្រួសក្រហម៖

1 – pk 0 ( សំឡូត) ដល់ pk 60 ( ក្រពើពីរ) : កៅស៊ូ

2 – pk 60 to pk 85 : ក្រួសក្រហម

3- pk 85 to pk 112 ( អូរសោម ): កៅស៊ូ

4- pk 112 to pk 130 : ក្រួសក្រហម ( អាចមានរអិលបន្តិចបន្ទួច ពេលភ្លៀងលើកំណាត់ខ្លះៗ )

5 – pk 130 to pk 160 :កៅស៊ូ

6- pk 160 to pk 175 : ក្រួសក្រហម

7- pk 175 to pk 198 ( កោះកុង) : កៅស៊ូ

យ៉ាងណាមិញ លោក ផន រឹម មន្រ្តីអ្នកនាំពាក្យក្រសួងសាធារណការនិងដឹកជញ្ជូនបានឲ្យកម្ពុជាថ្មីដឹងថា ទោះបីកំណាត់ផ្លូវខ្លះនៅជាគ្រួសក្រហម ប៉ុន្តែអ្នកបើកបរអាចធ្វើដំណើរបានដោយរលូនមិនមានបញ្ហាអីនោះទេ។

ផ្លូវជាតិលេខ ១០ សាងសង់លាតសន្ធឹងពីស្រុកសំឡូត នៃខេត្តបាត់ដំបង ឆ្លងកាត់ស្រុកវាលវែង នៃខេត្តពោធិ៍សាត់ បន្តរហូតដល់ខេត្តកោះកុង ដែលវឌ្ឍនភាពគិតត្រឹមខែមេសាឆ្នាំ ២០២៤ សម្រេចការស្ថាបនាបានជាង ៨៤%។

ផ្លូវនេះមានប្រវែងសរុប ១៩៧,៦៩៧ គីឡូម៉ែត្រ សាងសង់ដោយមានទទឹងតួផ្លូវ ៩ ម៉ែត្រ ជាប្រភេទផ្លូវកៅស៊ូពីរស្រទាប់ (DBST)។ ក្នុងគម្រោងមានការសាងសង់ស្ពានចំនួន ២៨ កន្លែង ប្រវែង ១.៧២១,៤៦ម៉ែត្រ ដែលក្នុងនោះមានស្ពានខ្ពស់ជាងគេដែលមានកម្ពស់ ៧៥ ម៉ែត្រ បណ្តោយ ៥៣០ ម៉ែត្រ និងទទឹង ១០ ម៉ែត្រ។

ផ្លូវជាតិលេខ ១០ ជាបណ្តាញផ្លូវគមនាគមន៍ដ៏សំខាន់សម្រាប់សម្រួលការតភ្ជាប់ការធ្វើដំណើរនិងដឹកជញ្ជូនពីខេត្តភាគពាយ័ព្យមានខេត្តបាត់ដំបង បន្ទាយមានជ័យ និងប៉ៃលិន មកកាន់ខេត្តជាប់សមុទ្រ ហើយតាមផែនការនឹងបញ្ចប់ទាំងស្រុងនៅឆ្នាំ ២០២៥៕