ព័ត៌មានអន្ដរជាតិ

ត្រូវឆ្នោត ១.៣ លានដុល្លារភ្លាម ស្ត្រី អាមេរិក ម្នាក់លែងលះប្ដី តែចុងក្រោយគ្មានសល់សូម្បីមួយសេន

បានផុស

៧ ខែ មុន

នៅ

ថ្ងៃពុធ ៥ មិថុនា ២០២៤

ដោយ

យោងតាមការចុះផ្សាយពីកាសែតបរទេស Mirror បានបញ្ចាក់ថា Denise Rossi ជាស្ត្រីមកពីរដ្ឋកាលីហ្វ័រញ៉ា សហរដ្ឋអាមេរិក បានក្លាយជាអ្នកឈ្នះឆ្នោតតម្លៃ ១.៣ លានដុល្លារ ហើយ ១១ ថ្ងៃក្រោយមក នាងបែរជាសម្រេចចិត្តលែងលះជាមួយ Thomas Rossi ជាស្វាមី បន្ទាប់ពីរួមរស់ជាមួយគ្នាអស់រយៈពេល ២៥ ឆ្នាំ។

មែនទែនទៅ រឿងរ៉ាវដ៏រសើបនេះបានកើតឡើងតាំងពីឆ្នាំ ១៩៩៦ ហើយ Denise បានរក្សាការឈ្នះឆ្នោតរបស់នាងជាសម្ងាត់។ ការសម្រេចចិត្តបញ្ចប់អាពាហ៍ពិពាហ៍ភ្លាមៗ បានធ្វើឲ្យប្ដីមានការតក់ស្លុតនិងច្របូកច្របល់ មិនយល់ថាហេតុអ្វីបានជាប្រពន្ធប្រញាប់បញ្ចប់ទំនាក់ទំនងហើយថែមទាំងជំរុញឲ្យគាត់ដើរចេញឲ្យលឿនផងដែរ។ បុរសជាស្វាមី តែងតែគិតថាជីវិតអាពាហ៍ពិពាហ៍របស់គាត់រលូនល្អ ហើយពួកគេស្រឡាញ់គ្នាខ្លាំងណាស់។

ប៉ុន្មានឆ្នាំបន្ទាប់ពីការលែងលះរបស់ពួកគេ Thomas បានទទួលសំបុត្រមួយថ្ងៃពីក្រុមហ៊ុនដែលផ្តល់សេវាកម្មហិរញ្ញវត្ថុដល់អ្នកឈ្នះឆ្នោត។ នេះធ្វើឲ្យស្វាមីរកឃើញការពិតថា អតីតភរិយារបស់គាត់កំពុងលាក់ការឈ្នះឆ្នោតតែម្នាក់ឯង។ ដោយខឹងពេក គាត់ក៏សម្រេចចិត្តដាក់ពាក្យប្តឹងនាងបកទៅវិញភ្លាមៗ។

ក្នុងអំឡុងពេលដំណើរការផ្លូវច្បាប់ Denise បានអះអាងថា នាងចង់បញ្ចប់ទំនាក់ទំនងជាមួស្វាមីជាយូរណាស់មកហើយ។ ប៉ុន្តែតុលាការបានរកឃើញថានាងបានបំពានច្បាប់ស្តីពីការបង្ហាញទ្រព្យសម្បត្តិក្នុងដំណើរការលែងលះ និងប្រព្រឹត្តការក្លែងបន្លំនានាក្នុងអំឡុងពេលរួមរស់ជាប្ដីប្រពន្ធ។ ដូច្នេះហើយ តុលាការបានបង្គាប់ឲ្យរូបនាងសងសំណងដល់អតីតស្វាមីចំនួន ៦៦,៨០០ ដុល្លារអាមេរិកក្នុងមួយឆ្នាំ ជាបន្តបន្ទាប់សម្រាប់រយៈពេល ២០ ឆ្នាំ ដែលនៅពេលបូកបញ្ចូលគ្នាគឺស្មើនឹងរង្វាន់សរុបដែល Denise ទទួលបានពីឆ្នោត។

ទោះបីជាយ៉ាងណាក៏ដោយ មេធាវីរបស់ Denise គឺ Connolly Oyler បានផ្តល់យោបល់ថា ប្រសិនបើនាងមិនលាក់ការឈ្នះឆ្នោត និងមានភាពស្មោះត្រង់ ម្ល៉េះសមនឹងគ្មានការប្ដឹងផ្ដល់គ្នាទេ។ ជាពិសេសលោកក៏អាចការពារក្ដីឲ្យនាងបានដោយអាចអះអាងថា នេះជាកម្មសិទ្ធិផ្ទាល់ខ្លួនដែលទទួលបានដោយមិនពាក់ព័ន្ធនឹងអតីតស្វាមី ឬយ៉ាងហោចណាស់ ប្រហែលជាអាចចរចាគ្នាបាន។ ប៉ុន្តែចៅក្រមខឹង ហើយមិនពេញចិត្តនឹងការលាក់បាំងរបស់នាង ចំពោះការឈ្នះឆ្នោតនោះទេ។ ទើបសម្រេចចិត្តប្រគល់ទឹកប្រាក់សរុបឲ្យអតីតស្វាមីទាំងអស់ ដោយរូបនាងគ្មានសល់មួយរៀលមួយកាក់ក្នុងខ្លួនឡើយ៕