ព័ត៌មានអន្ដរជាតិ

កម្ពុជា ស្ថិតក្នុងកំពូលតារាងប្រទេសទាំង១០ ដែលបរិភោគមីក្រូប្លាស្ទិកច្រើនគេបំផុត

បានផុស

៨ ខែ មុន

នៅ

ថ្ងៃពុធ ៥ មិថុនា ២០២៤

ដោយ

Chheang

នៅក្នុងចំណោមប្រទេសចំនួន ១០៩ ជុំវិញពិភពលោក កម្ពុជាបានឈរនៅលេខរៀងទី៨ ក្នុងកំពូលតារាងប្រទេសចំនួន១០ដែលទទួលទានមីក្រូប្លាស្ទិកច្រើនជាងគេ។ នេះបើយោងតាមសិក្សាមួយកាលពីពេលថ្មីៗកន្លងទៅ នៅក្នុងទិន្នានុប្បវត្តិស្រាវជ្រាវមានចំណងជើងថា Environmental Science and Technology។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមអ្នកស្រាវជ្រាវ បានចងក្រងទិន្នន័យស្តីពីកំហាប់មីក្រូប្លាស្ទិកនៅក្នុងក្រុមអាហារសំខាន់ៗតាមបណ្ដាប្រទេសនីមួយៗ ដែលមានដូចជា ផ្លែឈើ បន្លែ ប្រូតេអ៊ីន គ្រាប់ធញ្ញជាតិ ទឹកដោះគោ ភេសជ្ជៈ ស្ករ អំបិល និងគ្រឿងទេស។

មីក្រូប្លាស្ទិក សំដៅលើភាគល្អិតនៃប្លាស្ទិកដែលមានទំហំតូចជាង ៥មិល្លិម៉ែត្រ។ មីក្រូប្លាស្ទិក ភាគច្រើនត្រូវគេរកឃើញនៅក្នុងទឹក ហើយត្រូវបានស៊ីដោយសត្វ បន្ទាប់មកក៏ត្រូវវិលចូលក្នុងខ្លួនមនុស្ស តាមរយៈការទទួលទានសាច់សត្វដែលបានស៊ីមីក្រូប្លាស្ទិកទាំងនោះ។

ប្រទេសទាំង១០ ដែលបរិភោគមីក្រូប្លាស្ទិកច្រើនជាងគេបំផុត មានដូចជា ១.ម៉ាឡេស៊ី ២.ឥណ្ឌូណេស៊ី ៣.អេហ្ស៊ីប ៤.ហ្វីលីពីន ៥.វៀតណាម ៦.ឡាវ ៧.ថៃ ៨.កម្ពុជា ៩.ហ្គាណា និង ១០.កុងហ្គោ។

ម៉ាឡេស៊ី ជាប្រទេសដែលមានប្រជាជនទទួលទានមីក្រូប្លាស្ទិកច្រើនជាងគេបង្អស់ ដោយក្នុងមនុស្សម្នាក់បរិភោគប្លាស្ទិកជាមធ្យម ៥០២,៣មីលីក្រាមជារៀងរាល់ថ្ងៃ ហើយច្រើនជាង៥០% នៃមីក្រូប្លាស្ទិកនោះមានប្រភពចេញពីសាច់ត្រី។

ក្រៅតែពីទិន្នន័យបង្ហាញពីការទទួលទានប្លាស្ទិកខាងលើ ក្នុងការស្រាវជ្រាវដដែលនេះក៏បានបង្ហាញអំពីបណ្ដាប្រទេសទាំង១០ ដែលស្រូបយកមីក្រូប្លាស្ទិកតាមរយៈខ្យល់ដង្ហើមច្រើនជាងគេផងដែរ មានដូចជា៖ ១.ចិន ២.ម៉ុងហ្គោលី ៣.ចក្រភពអង់គ្លេស ៤.អៀរឡង់ ៥.ហ្គាំប៊ី ៦.អេហ្ស៊ីប ៧.ឡាវ ៨.មីយ៉ាន់ម៉ា ៩.ម៉ាឡេស៊ី និង ១០.ហ្វីលីពីន៕