ទឹកជំនន់និងបំណាក់ដី ចាប់ផ្តើមវាយប្រហារ សម្លាប់មនុស្ស នៅ វៀតណាម 

ចូលដល់រដូវវស្សា គ្រោះធម្មជាតិកាចសាហាវចាប់ផ្តើមវាយប្រហារភាគខាងជើងប្រទេសវៀតណាម ដោយទឹកជំនន់និងបំណាក់ដី បានឆក់យកជីវិតមនុស្សចំនួន៣នាក់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់កាសែត Tuoi Tre កាលពីថ្ងៃចន្ទទី១០ខែមិថុនា, គ្រោះទឹកជំនន់និងការបាក់ដីនៅខេត្ត Ha Giang គឺត្រូវបានបង្កឡើងដោយភ្លៀងធ្លាក់ខ្លាំងដូចហែកមេឃ ដែលក៏ជន់លិចផ្ទះសម្បែងរាប់ពាន់ខ្នងផងដែរ។

មិនត្រឹមតែផ្ទះសម្បែងទេ ភ្លៀងធ្លាក់ចាប់តាំងពីថ្ងៃព្រហស្បតិ៍សប្តាហ៍មុនមក ក៏បង្កការជន់លិចផ្លូវ កាត់ផ្តាច់ខ្សែដឹកជញ្ជូន និងបណ្តាលឲ្យរថយន្តជាច្រើនគ្រឿងត្រូវជាប់គាំងផងដែរ។

តាមសេចក្តីរាយការណ៍របស់សារព័ត៌មាន VN Express, មនុស្ស ៣នាក់ដែលបាត់បង់ជីវិត គឺដោយសារតែបាក់ដីសង្កត់និងទឹកហូរនាំយកទៅនៅក្នុងខេត្ត Ha Giang។

មិនត្រឹមតែខេត្តនេះទេ, កាលពីចុងសប្តាហ៍ គ្រោះទឹកជំនន់ធ្ងន់ធ្ងរ ក៏វាយប្រហារទីក្រុងកំពង់ផែ Hai Phong និងខេត្ត Quang Ninh ផងដែរ។

សូមបញ្ជាក់ថា ប្រទេសវៀតណាម តែងតែទទួលរងនូវអាកាសធាតុអាក្រក់ ក្នុងរដូវវស្សាចន្លោះខែមិថុនាដល់ខែវិច្ឆិកា។

កាលពីឆ្នាំមុន គ្រោះមហន្តរាយធម្មជាតិ រួមទាំងទឹកជំនន់និងបំណាក់ដី បានបណ្តាលឲ្យមនុស្ស ១៦៩នាក់ស្លាប់ឬបាត់ខ្លួន នៅក្នុងប្រទេសអាស៊ីអាគ្នេយ៍មួយនេះ៕

អត្ថបទ៖ សុខ សុវណ្ណ

ចុចអាន៖ ថៃនិងវៀតណាម សុទ្ធតែជួបគ្រោះរញ្ជួយដី