កីឡា

ការប្រកួតគុនចម្រុះអាស៊ីមិនសាហាវដូចតាមសង្វៀនឯកជន ខណៈមាន ម៉ឺន មេឃា ចូលរួម

បានផុស

៦ ខែ មុន

នៅ

ថ្ងៃព្រហស្បតិ៍ ១៣ មិថុនា ២០២៤

ដោយ

កម្ពុជាបានទទួលសិទ្ធិរៀបចំការប្រកួតគុនចម្រុះជើងឯកអាស៊ី (Asian Mixed Martial Arts Championship) នៅថ្ងៃទី១១-១២-១៣ ខែកក្កដា ឆ្នាំ២០២៤ នៅវិមានពហុកីឡដ្ឋានជាតិអូឡាំពិកដែលនឹងអញ្ជើញចូលរួមពិធីបើកដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតគុនចម្រុះជ្រើសរើសជើងឯកអាស៊ីជាផ្លូវការនេះជាលើកទី២ បន្ទាប់ពីលើកទី១ត្រូវបានធ្វើឡើងកាលពីឆ្នាំ២០២៣ នៅប្រទេសថៃ។ លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជា (NOCC) បានឲ្យដឹងថា ការប្រកួតគុនចម្រុះអាស៊ីនេះគឺជាការប្រកួតផ្លូវការ ស្តង់ដា និងតាមបច្ចេកទេសជាកីឡាប្រកបដោយឧត្តភាព និងសាមគ្គីភាព ដែលមិនគ្រោះថ្នាក់ខ្លាំង សាហាវឃោឃៅ ដូចការប្រកួតដែលរៀបចំដោយស្ថាប័នឯកជន។ ការប្រកួតគុនចម្រុះដែលរៀបចំដោយកម្មវិធីឯកជនមានក្បាច់ប្រយុទ្ធសាហាវគ្រោះថ្នាក់នោះគឺជាការប្រកួតគុនចម្រុះអាជីព។

រដ្ឋលេខាធិការក្រសួងអប់រំ យុវជន និងកីឡារូបនេះបានបន្តថា ការរៀបចំព្រឹត្តិការណ៍គុនចម្រុះអាស៊ីគឺរៀបចំដោយគណៈកម្មាធិការជាតិអូឡាំពិកកម្ពុជា សហព័ន្ធកីឡាយុទ្ធគុនចម្រុះអាស៊ី (AMMA) និងសហព័ន្ធកីឡាយុទ្ធគុនចម្រុះកម្ពុជា។ គោលបំណងធំបំផុតនៃការរៀបចំព្រឹត្តិការណ៍នេះដើម្បីជំរុញ ផ្សព្វផ្សាយ និងលើកកម្ពស់តម្លៃកីឡាគុនចម្រុះឲ្យក្លាយជាកីឡាស្តង់ដាឆ្ពោះចូលទៅក្នុងព្រឹត្តិការណ៍កីឡាអូឡាំពិកអាស៊ី និងកីឡាអូឡាំពិកពិភពលោក។

សម្រាប់ការប្រកួតគុនចម្រុះជើងឯកអាស៊ី លើកទី២ នៅប្រទេសកម្ពុជា ក៏ជាការប្រកួតជម្រុះដើម្បីយកជ័យលាភីទៅចូលរួមប្រកួតក្នុងព្រឹត្តិការណ៍«កីឡាក្នុងសាល និងក្បាច់គុនអាស៊ី (Asian Indoor and Martial Arts Games) ឆ្នាំ២០២៤ ដែលប្រទេសថៃធ្វើជាម្ចាស់ផ្ទះនៅខែវិច្ឆិកា។

ជាមួយគ្នានេះ លោក ហ៊ុន ចន្ទរាជ ជាគ្រូបង្វឹកគុនចម្រុះ និងជាកីឡាករ១រូបមានឈ្មោះប្រកួតដែរនោះបានលើកឡើងថា ការប្រកួតគុនចម្រុះជើងឯកអាស៊ីនេះគឺមិនសាហាវ ឬគ្រោះថ្នាក់ខ្លាំងដូចដែលធ្លាប់ឃើញការប្រកួតតាមសង្វៀនឯកជនទេ។ គណៈកម្មការរៀបចំការប្រកួតបានដកក្បាច់ ឬស្នៀតគ្រោះថ្នាក់សាហាវៗចេញ ហើយក្នុងនោះសូម្បីតែការអោបឃ្លេនៅលើក្តារក៏មិនយូរដែរគឺប្រហែលជា១៥វិនាទីប៉ុណ្ណោះ អាជ្ញាកណ្តាលនឹងចាប់បំបែកចេញ។

លោកបានបន្តថា ការប្រកួតត្រូវការភាពរហ័សរហួន ទាំងឈរ និងក្បាច់ក្រោម។ កីឡាករ កីឡាការិនីកម្ពុជាភាគច្រើនជាអ្នកកីឡាគុនខ្មែរដែលមានបទពិសោធច្រើនក្នុងការប្រើកណ្តាប់ដៃ និងទាត់ ដូច្នេះលោកសង្ឃឹមទទួលបានលទ្ធផលល្អក្នុងនាមជាម្ចាស់ផ្ទះ។

តាមការឲ្យដឹងពីលោក វ៉ាត់ ចំរើន ថា រហូតដល់ពេលនេះមានប្រទេសជាង១០ហើយបានចុះឈ្មោះចូលរួមការប្រកួត ហើយរំពឹងកើនឡើងដល់ជាង២០ នៅពេលការចុះឈ្មោះត្រូវបិទ។ ការប្រកួតមានតែ១៦វិញ្ញាសាគឺ១១វិញ្ញាសាសម្រាប់បុរស និង៥វិញ្ញាសាសម្រាប់នារី។

សម្រាប់កម្ពុជាបានត្រៀមអត្តពលិកទាំង១៦រូបរួចហើយគឺកីឡាករ ផេង សុបញ្ញា, ឡុង ឡា, រិន សារ័ត្ន, ហ៊ុន គឹមហៀង, មាស ម៉ើ, សែន ច័ន្ទឫទ្ធិគុន, ហ៊ុន ចន្ទរាជ, ធាន អាន, ចាន់ រតនា, អេ វីរៈខាំឈីតភូថង, ហាត ភី ខណៈកីឡាការិនីមានដូចជា ខៀវ ចិន្ដារ័ត្ន, នៅ ស្រីពៅ, គន្ធ វ៉ាន់នីតា, សំ ថារ័ត្ន និង ទួន ស្រីភីន។

កាលពីដំបូង កីឡាករគុនខ្មែរ ធឿន ធារ៉ា មានឈ្មោះចូលរួមការប្រកួត ប៉ុន្តែក្រោយមកក៏បានដកខ្លួនវិញក្រោមហេតុផលបញ្ហាទម្ងន់ និងខ្វះបទពិសោធគុនចម្រុះ។ ទោះបីជាយ៉ាងណា កីឡាករ អេ វីរៈខាំឈីតភូថង, កីឡាការិនី ខៀវ ចិន្តារ័ត្ន, គន្ធ វ៉ាន់នីតា និង ទួន ស្រីភីន មិនធ្លាប់ប្រកួតគុនចម្រុះសោះ ប៉ុន្តែពួកគាត់មានឈ្មោះក្នុងការប្រកួតគុនចម្រុះអាស៊ីនេះ។

ព្រឹត្តិការណ៍នេះ សហការរៀបចំដោយគណៈកម្មាធិការជាតិអូឡាំពិកកម្ពុជា សហព័ន្ធកីឡាយុទ្ធគុនចម្រុះអាស៊ី(AMMA) សហព័ន្ធកីឡាយុទ្ធគុនចម្រុះកម្ពុជា និងក្រុមហ៊ុន VIP Sports៕