កីឡា

Ronaldo ជាកីឡាករបង្ហាញខ្លួនច្រើនជាងគេក្នុងព្រឹត្តិការណ៍ EURO

បានផុស

៨ ខែ មុន

នៅ

ថ្ងៃសុក្រ ១៤ មិថុនា ២០២៤

ដោយ

តារាឆ្នើម Cristiano Ronaldo ទោះបីមានវ័យចំណាស់ពិតមែន ប៉ុន្តែរូបគេនៅតែទទួលការទុកចិត្តពីលោក Roberto Martínez គ្រូបង្វឹកក្រុមជម្រើសជាតិព័រទុយហ្គាល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ថិតក្នុងវ័យ៣៩ឆ្នាំ កីឡាករ Cristiano Ronaldo ជាកីឡាករបាល់ទាត់នៅអឺរ៉ុបទី១ បង្ហាញខ្លួនបានច្រើនបំផុតក្នុងព្រឹត្តិការណ៍ EURO ជុំចុងក្រោយ។ រូបគេបានបង្ហាញខ្លួនឲ្យក្រុមជម្រើសជាតិព័រទុយហ្គាល់ ក្នុងព្រឹត្តិការណ៍ EURO ៦រដូវកាលជាប់គ្នាគឺឆ្នាំ២០០៤ ២០០៨, ២០១២ ២០១៦ ២០២០ និង២០២៤។

ព្រឹត្តិការណ៍អឺរ៉ូឆ្នាំ២០០៤ Ronaldo លេងបាន៦លើកឲ្យក្រុមជម្រើសជាតិព័រទុយហ្គាល់ សរុប៤១៨នាទី ស៊ុតបញ្ចូលទីបាន២គ្រាប់ បញ្ចូលបាល់ឲ្យមិត្តរួមក្រុមស៊ុតបញ្ចូលទីបាន២លើក ក្នុងវ័យត្រឹមតែ១៩ឆ្នាំ។

ខ្សែប្រុយទ្ធឆ្នើម Ronaldo កំពុងកាន់កំណត់ត្រាសំខាន់ៗជាងច្រើនទៀតក្នុងពានរង្វាន់អឺរ៉ូ ក្នុងនោះជាកីឡាករស៊ុតបញ្ចូលទីច្រើនបំផុតក្រោយរកបាន១៤គ្រាប់ និងជាកីឡាករបង្ហាញខ្លួនច្រើនបានចំនួន២៥ប្រកួត ជាមួយក្រុមជម្រើសជាតិព័រទុយហ្គាល់ នៅជុំចុងក្រោយ។ សម្រាប់ស្ថិតិរបស់របស់រូបគេអាចនឹងប្រែប្រួលបន្ថែមក្នុងការប្រកួតពានរង្វាន់ EURO ឆ្នាំ២០២៤។

ក្រុមជម្រើសជាតិទ័រទុយហ្គាល់ស្ថិតក្នុងពូល F រួមមានក្រុមជម្រើសជាតិតួកគី ហ្សកហ្ស៊ី និងសាធារណរដ្ឋឆែក។ ការប្រកួតជុំចុងក្រោយពានរង្វាន់ EURO មានក្រុមចូលរួម២៤ក្រុម ហើយបែងចែកជា៦ពូល ក្នុងនោះក្រុមលេខ១និងលេខ២ ប្រចាំពូលនីមួយៗ និងក្រុមលេខ៣ល្អបំផុតចំនូន៤ក្រុម ឡើងទៅវគ្គ១៦ក្រុមចុងក្រោយ៕