ព័ត៌មានជាតិ

មន្ត្រីជាន់ខ្ពស់ ៖ រៀន TVET ឆាប់មានការងារធ្វើ ប្រាក់ខែសមរម្យ ជួយលើកស្ទួយជីវភាពគ្រួសារកាន់តែប្រសើរ

បានផុស

៨ ខែ មុន

នៅ

ថ្ងៃព្រហស្បតិ៍ ១៣ មិថុនា ២០២៤

ដោយ

មន្ត្រីជាន់ខ្ពស់ នៃក្រសួងការងារ និងបណ្តុះបណ្តាលវិជ្ជាជីវៈ បានអះអាងថា ការរៀនជំនាញ បណ្តុះបណ្តាលបច្ចេកទេស និងវិជ្ជាជីវៈ(TVET) មានរយៈពេលខ្លី ឆាប់មានការងារធ្វើ ទទួលបានប្រាក់ខែសមរម្យ ជួយលើកស្ទួយជីវភាពក្រុមគ្រួសារកាន់តែប្រសើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហ៊ីង ស៊ីដេត អគ្គនាយកអប់រំបណ្តុះបណ្តាលបច្ចេកទេស និងវិជ្ជាជីវៈ បានឱ្យដឹងថា អាណាព្យាបាលមួយចំនួន តែងតែបញ្ជូនកូនៗ របស់ខ្លួន ទៅរៀននៅតាមសាកលវិទ្យាល័យ ព្រោះពួកគាត់គិតថានៅពេលចប់ចេញទៅធ្វើការនៅការិយាល័យស្លៀកពាក់ស្អាតបាត ពាក់ក្រវាត់ក និងរាងសង្ហា។ តែបើអ្នករៀននៅសាលាបណ្តុះបណ្តាលបច្ចេកទេស និងវិជ្ជាជីវៈ ចេញមកវិញ មើលទៅពិបាកដោយសារខោអាវប្រឡាក់ ធ្វើការក្រោមឡាន ឡើងសសរដងគោមជាដើម។

លោកបានបន្តថា «ប៉ុន្តែសម័យបច្ចុប្បន្ននេះ មិនមែនរៀនជំនាញឡើងសសរដងគោមទាំងអស់នោះទេ វាទៅតាមកម្រិតជំនាញ និងប្រើបច្ចេកវិទ្យា។ រៀនជំនាញ មានបុណ្យស័ក្ដិ ៨ កម្រិតរួមមានកម្រិត ១ កូនជាង ,កម្រិត ២ ជាង ,កម្រិត ៣ បច្ចេកទេស រហូតដល់ដល់វិស្វករ។ តែទោះបីជាយើងមានបុណ្យស័ក្ដិយ៉ាងណា ក៏គេមើលអត់ឃើញទេ ដោយសារធ្វើការនៅកន្លែងមិនស្អាតដូចជាជាងឡាន តែខោអាវប្រឡាក់ពេលបំពេញការងារពេលចប់ការងារដោះខោអាវប្រឡាក់ចេញតឺនុយសង្ហាដូចគ្នា។ ការងារនេះមើលមិនសមរម្យមែន តែទទួលបានចំណូលខ្ពស់»។

លោកបានបន្តទៀតថា ជាក់ស្តែងការបណ្តុះបណ្តាលយុវជនមកពីគ្រួសារក្រីក្រ និងងាយរងហានិភ័យ ១ លាន ៥ សែននាក់ យើងបានធ្វើតេស្ដបញ្ជាក់សមត្ថភាពសិស្សជាង ៣ ពាន់នាក់ ក្នុងនោះមានការងារធ្វើ ៩៥៦ នាក់ ដែលទទួលបានប្រាក់ខែពី ១៥០ ដុល្លារ ទៅ ៣០០ ដុល្លារ ដោយចំណាយរយៈពេលសិក្សាត្រឹមតែ ៤ ខែប៉ុណ្ណោះ។

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងដែរថា ចំពោះយុវជនគ្រួសារក្រីក្រ និងគ្រួសារងាយរងហានិភ័យ ចូលរៀនមិនត្រឹមតែអត់គិតថ្លៃប៉ុណ្ណោះទេ ថែមទាំងទទួលបានប្រាក់ឧបត្ថម្ភប្រមាណ ២៨ ម៉ឺនរៀល សម្រាប់ដោះស្រាយជីវភាពប្រចាំថ្ងៃពេលកំពុងសិក្សា ៤ ខែ ទៀតផង។ រីឯយុវជនមកពីគ្រួសារធម្មតា ក៏អាចចូលសិក្សាដោយឥតគិតថ្លៃដែរ តែមិនទទួលបានប្រាក់ឧបត្ថម្ភដូចយុវជនគ្រួសារក្រីក្រ និងគ្រួសារងាយរងហានិភ័យនោះទេ។

បើតាមលោក កត្តា អ៊ន បច្ចុប្បន្នក្រសួងការងារមានសាលាអប់រំបណ្តុះបណ្តាលបច្ចេកទេស និងវិជ្ជាជីវៈក្រោមឱវាទក្រសួងចំនួន ៣៧ នៅទូទាំងប្រទេស ដោយបានបណ្ដុះបណ្ដាលសិស្សប្រមាណជាង ៥ ម៉ឺននាក់ ក្នុងនោះមាន ៨៥% មានការងារធ្វើ និង ១៥% ទៀត បន្តការសិក្សា និងមួយចំនួនទៀត ចេញបើកមុខរបរដោយខ្លួនឯង ដែលនេះជាជោគជ័យមួយក្នុងការផលិតធនធានមនុស្សក្នុងការចូលរួមអភិវឌ្ឍន៍សេដ្ឋកិច្ចកម្ពុជាកាន់តែរីកចម្រើនបន្ថែមទៀត។

លោក កត្តា អ៊ន បានអំពាវនាវដល់យុវជនមកពីគ្រួសារក្រីក្រ និងយុវជនមកពីគ្រួសារងាយរងហានិភ័យ និងយុវជនទូទៅ ចុះឈ្មោះចូលរៀនជំនាញឱ្យបានច្រើនបន្ថែមទៀត ដើម្បីឆ្លើយតបនឹងតម្រូវការទីផ្សារការងារនាពេលបច្ចុប្បន្ន និងទៅថ្ងៃអនាគត៕

អត្ថបទ ៖ សំអឿន