ក្រុមនាវាចម្បាំងរុស្ស៊ី ទៅដល់គុយបា បានមួយថ្ងៃ ស្រាប់តែអាមេរិក បញ្ជូននាវាមុជទឹកទៅដែរ

មិនទុកយូរឡើយ គ្រាន់តែក្រុមនាវាចម្បាំងរុស្ស៊ីទៅដល់ប្រទេសគុយបាភ្លាម សហរដ្ឋអាមេរិក ក៏បានបញ្ជូននាវាមុជទឹកទៅទីនោះដែរ ដើម្បីជាការបង្ហាញកម្លាំង បង្អួតដាក់គ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ New York Post, នាវាចម្បាំងអាមេរិកថ្នាក់ Los Angeles ឈ្មោះ USS Helena បានទៅដល់បន្ទាយនៅឈូងសមុទ្រ Guantanamo កាលពីថ្ងៃព្រហស្បតិ៍ទី១៣ខែមិថុនា ក្នុងអ្វីដែលទីបញ្ជាការភាគខាងត្បូងរបស់ខ្លួនអះអាងថា វាគ្រាន់ជា “ដំណើរទស្សនកិច្ចកំពង់ផែតាមទម្លាប់” ប៉ុណ្ណោះ។

យ៉ាងណាក្តី សារព័ត៌មាន AP ជឿជាក់ថា នេះគឺជាការបង្អួតកម្លាំងរបស់ទីក្រុងវ៉ាស៊ីនតោន ដើម្បីឆ្លើយតបទៅនឹងវត្តមាននាវាចម្បាំងរុស្ស៊ីនៅទីក្រុងឡាហាវ៉ាន ដែលស្ថិតនៅមិនឆ្ងាយប៉ុន្មានពីដីគោកអាមេរិក។

ពាក់ព័ន្ធការដែលនាវាចម្បាំងរុស្ស៊ីទៅដល់គុយបាដើម្បីធ្វើសមយុទ្ធ, មន្ទីរបញ្ចកោណ និយាយថា  “យើងកំពុងតាមដានស្ថានការណ៍យ៉ាងយកចិត្តទុកដាក់ជាទីបំផុត ប៉ុន្តែសមយុទ្ធនេះ មិនបង្កជាការគំរាមកំហែងអ្វីទេដល់សហរដ្ឋអាមេរិក”។

សូមជម្រាបថា ក្រុមនាវារុស្ស៊ីរួមទាំងនាវាចម្បាំង Admiral Gorshkov និងនាវាមុជទឹក Kazan បំពាក់ជាមួយអាវុធទំនើបៗ ដូចជាមីស៊ីលល្បឿនលឿនជាងសំឡេង Zircon ផងដែរនោះ បានទៅដល់ប្រទេសគុយបា កាលពីថ្ងៃពុធទី១២ខែមិថុនា ដើម្បីបង្ហាញសាច់ដុំ ចំពេលសង្គ្រាមអ៊ុយក្រែន នៅតែឆាបឆេះ។

វត្តមាននាវារុស្ស៊ីនៅគុយបា គឺបង្ហាញពីការពង្រឹងទំនាក់ទំនងរបស់ទីក្រុងមូស្គូជាមួយឡាវ៉ាហាន ខណៈភ្លើងសង្គ្រាមរបស់រុស្ស៊ីនៅអ៊ុយក្រែន មិនទាន់រលត់ ខណៈគុយបាក៏ពឹងផ្អែកកាន់តែខ្លាំងលើប្រេងនិងជំនួយរបស់រុស្ស៊ីផងដែរ។

គុយបាមានទំនាក់ទំនងល្អជាមួយរុស្ស៊ី ជាយូរមកហើយ ដោយប្រទេសនេះគឺជាសម្ព័ន្ធមិត្តដ៏សំខាន់របស់អតីតសហភាពសូវៀត ក្នុងសម័យសង្គ្រាមត្រជាក់ ដោយថែមទាំងព្រមទទួលធ្វើជាទីតាំងដាក់មីស៊ីលនុយក្លេអ៊ែររបស់ទីក្រុងមូស្គូ អំឡុងវិបត្តិមីស៊ីលគុយបាឆ្នាំ ១៩៦២ទៀតផង៕

អត្ថបទ៖ សុខ សុវណ្ណ

ចុចអាន៖ ក្រុមនាវាចម្បាំងរុស្ស៊ីទៅដល់គុយបា, អាមេរិក កំពុងតាមមើល