សហជីព​ក្នុង​វិស័យ​កាត់ដេរ និង​សេដ្ឋកិច្ច​ក្រៅ​ប្រព័ន្ធ​ជាង​៤​ម៉ឺន​នាក់ ដាក់​ញត្តិ​ថ្កោលទោស​របាយការណ៍ និង​សកម្មភាព​សង់​ត្រា​ល់

ភ្នំពេញ ៖ ថ្នាក់ដឹកនាំ​សហព័ន្ធ​សហជីព សមាគម ជាង​១០០​នាក់ តំណាងឱ្យ​សមាជិក​សមាជិកា ដែល​បំពេញការងារ ក្នុង​វិស័យ​កាត់ដេរ និង សេដ្ឋកិច្ច​ក្រៅ​ប្រព័ន្ធ ចំនួន​៤​ម៉ឺន​នាក់ ដង្ហែ​ក្បួន​ទៅ​ដាក់​ញត្តិ​ថ្កោលទោស​ចំពោះ​ការ​បញ្ចេញ​របាយការណ៍ អង្គ​ការ​សង់​ត្រា​ល់ ដែល​វាយតម្លៃ​សេរីភាព​សហជីព ក្នុង​ប្រទេស​កម្ពុជា​មិនបាន​ឆ្លុះបញ្ចាំង​ពី​ទិដ្ឋភាព​ពិត នៃ​ស្ថានភាព​សហជីព​នៅ​កម្ពុជា​។

ក្រុម​អ្នកតំណាង​ទាំងអស់​បាន​ប្រមូល​ផ្តុំគ្នា នៅមុខ​មជ្ឈមណ្ឌល​សម្ព័ន្ធ​ភាព​ការងារ និង​សិទ្ធិមនុស្ស​ហៅ​កាត់​«​សង់​ត្រា​ល់​» ដែលមាន​ទីតាំង​ស្ថិតនៅ​ភូមិ​បឹងទំពុន​២ សង្កាត់​បឹងទំពុន ខណ្ឌមានជ័យ នៅវេលា​ម៉ោង​១ រសៀល ថ្ងៃទី​១៤ ខែមិថុនា ឆ្នាំ​២០២៤​នេះ​។

​លោក ហ៊ុយ សម្បត្តិ អ្នកនាំពាក្យ សហ​ពន្ធ​សហជីព​រក្សា​សិទ្ធ​កម្មករ​កម្ពុជា បានឱ្យដឹងថា ការដាក់​ញត្តិ​នេះ​ដោយសារ​តែមាន ការព្រួយបារម្ភ​អំពី​ផលប៉ះពាល់​ខ្លាំង​ដល់​សេដ្ឋកិច្ច​គ្រួសារ​របស់​កម្មករនិយោជិត និង ស្ថេរភាព​ការងារ តាម​រោងចក្រ សហគ្រាស ដែល​បណ្ដាលមកពី​របា​យ​ការណ៍​របស់​អង្គ​ការសង់​ត្រា​ល់ ដែល​វាយតម្លៃ​សេរីភាព សហជីព ក្នុងប្រទេស​កម្ពុជា មិនបាន​ឆ្លុះបញ្ចាំង​ពី​ទិដ្ឋភាព​ពិត​សម្រាប់​ស្ថានភាព​សហជីព​នៅ​កម្ពុជា និង​គ្មាន​មូលដ្ឋាន​ដែល​មិនអាច​ទទួលយកបាន​។​

​លោក​ថា សកម្មភាព​របស់ អង្គ​ការសង់​ត្រា​ល់​នេះ ​មិនបាន​ជួយ​ដល់​បងប្អូន​កម្មករនិយោជិត​ទូទៅ​នៅក្នុង​ប្រទេស​កម្ពុជា​ឡើយ ផ្ទុយទៅវិញ​សកម្មភាព​របស់​អង្គការ សង់​ត្រា​ល់ បែរជា​ធ្វើឱ្យប៉ះពាល់​អារម្មណ៍​អ្នកវិនិយោគទុន ដែលមាន​ស្រាប់ និង​អ្នកវិនិយោគ ដែល​កំពុង​នឹង​ត្រៀម​មក​វិនិយោគ នៅ​កម្ពុជា​យ៉ាងខ្លាំង​។ ម្យ៉ាងវិញទៀត សកម្មភាព អង្គការ សង់​ត្រា​ល់ ធ្វើឱ្យប៉ះពាល់​ដល់​សេដ្ឋកិច្ចជាតិ ដែល​ជះឥទ្ធិពល ដល់​សេដ្ឋកិច្ច​ក្នុង​គ្រួសារ និង​ស្ថេរភាព​ការងារ របស់​កម្មករនិយោជិត​ក្នុង និង​ក្រៅ​ប្រព័ន្ធ​ទាំងអស់​នៅក្នុង​ប្រទេស​កម្ពុជា។

ក្នុង​ខ្លឹមសារ​ញត្តិ​ដែល​បាន​យកទៅដាក់​នោះ សហជីព​សូមបញ្ជាក់ថា វិស័យ​ការងារ នៅ​កម្ពុជា​កាន់តែ​ប្រសើរឡើង​ហើយ​សិទ្ធិសេរីភាព​របស់​សហ​ជីព​ក៏​កាន់តែ​ប្រសើរឡើង ហើយ​កម្មករនិយោជិត ក៏​ទទួលបាន​លក្ខខណ្ឌ​ការងារ​កាន់តែ​ប្រសើរ និង​សមរម្យ ទាំង​ប្រាក់​ឈ្នួល​និង​លក្ខខណ្ឌ​ផ្សេងៗ ផ្ទុយទៅវិញ អង្គការ សង់​ត្រា​ល់ បែរជា​ចេញ​របាយការណ៍ កំណត់​យកតែ​មតិ​ភាគតិច​ហើយ​សន្និដ្ឋាន​ជារួម​ប្រាស់ចាក​ស្ថានភាព​ជាក់ស្តែង​។​

​តាម​របាយការណ៍​រប​ស់​ក្រសួង​ការងារ និង​បណ្តុះបណ្តាល​វិជ្ជាជីវៈ បច្ចុប្បន្ន​ចំនួន​បញ្ជិកា​សហជីព​មូលដ្ឋាន​នៅ​កម្ពុជា មានការ​កើនឡើង ពី​ជាង​៣​ពាន់​នៅ​ឆ្នាំ​២០១៦ ដល់​ជាង​៦​ពាន់​នៅ​ឆ្នាំ​២០២៤ ចំពោះ​ការកើនឡើង​សហជីព​នៅ​កម្ពុជា​ទ្វេដង​ក្នុង​រយៈ ពេល​ដ៏​ខ្លី​នេះ​ត្រូវបាន​គេ​មើលឃើញថា កម្ពុជា​មាន​សេរីភាព​សហជីព​ពេញលេញ គ្មាន​ការរើសអើង ផ្ទុយ​ស្រឡះ​ពី របាយការណ៍​របស់​ស​ង់​ត្រា​ល់​។

លោក ហ៊ុយ សម្បត្តិ បានឱ្យដឹង​ទៀតថា សកម្មភាព​របស់​អង្គការ សង់​ត្រា​ល់ ដែល​បានធ្វើ​កន្លងមក គឺមាន​ភាពលម្អៀង រើសអើង​មិន​យុត្តិធម៌ មិន​ស្មើ ភាព​តែងតែ​រំលោភបំពាន​ជ្រៀតជ្រែក​លើ​កិច្ចការ ជំនាញ​របស់​អង្គការ​វិជ្ជាជីវៈ​(​សហជីព​) ហើយ​អង្គការ សង់​ត្រា​ល់ មិនដែល​លើកឡើង​នូវ​ភាព​វិជ្ជមាន​របស់​កម្ពុជា​លើ​ឆាក​អន្តរជាតិ​។ មិនតែប៉ុណ្ណោះ ធ្វើឱ្យ​អន្តរជាតិ​មាន​ការយល់ច្រលំ មកលើ​ប្រទេស​កម្ពុជា​។​

​លោក​បន្ថែមថា អង្គ​ការសង់​ត្រា​ល់​ជា​អង្គការ​សង្គម​ស៊ីវិល ដែល​ចុះបញ្ជី​នៅ​ក្រសួងមហាផ្ទៃ មិនមែនជា​អង្គការ​វិជ្ជាជីវៈ ដែល​ចុះបញ្ជី​នៅ ក្រសួង​ការងារ និង​បណ្តុះបណ្តាល​វិជ្ជាជីវៈ​ទេ​។ ផ្ទុយទៅវិញ អង្គការ​សង្គម​ស៊ីវិល​មួយ​នេះ​កន្លងមក បានធ្វើ​កម្ម​ភាពជា​ច្រើន​រំលោភសិទ្ធិ​កិច្ចការងារ​របស់​អង្គការ​វិជ្ជាជីវៈ ដែល​ហៅថា​(​សហជីព របស់​កម្មករនិយោជិត​)​ដែល​បាន​ចុះបញ្ជី​នៅ​ក្រសួង​ការងារ និង​បណ្តុះបណ្តាល​វិជ្ជាជីវៈ​។

​លោក​បញ្ជាក់ថា «​យើងខ្ញុំ​ទាំងអស់គ្នា សំណូមពរ​អង្គការ សង់​ត្រា​ល់​បញ្ឈប់​ធ្វើ​សកម្មភាព​ដែល​ប៉ះពាល់​ជំនាញ​របស់​អង្គការ​វិជ្ជាជីវៈ​(​សហជីព​)​។ យើងខ្ញុំ​ទាំងអស់ គ្នា​មានការ​សោកស្តាយ​យ៉ាងខ្លាំង​ដែល​អង្គការ សង់​ត្រា​ល់ បានធ្វើ​សកម្មភាព​ទាំងអស់នេះ​»​។​

​គួររំលឹកថា កាលពី​ថ្ងៃទី​៤ ខែមិថុនា អង្គ​ការសង់​ត្រា​ល់ បានចេញ​ផ្សាយ​របាយការណ៍​មួយ បង្ហាញថា ខ្លួន​បាន​សម្ភាសន៍​តំណាង​សហជីព​មកពី​កន្លែង​ការងារ​ចំនួន ១០ ក្នុងចំណោម​កន្លែង​ការងារ​ទាំង ១៤ ដែល​រាយការណ៍​ថា ពួកគេ​ត្រូវបាន​រឹតត្បិត​សិទ្ធ​សេរីភាព បំភិតបំភ័យ ការគំរាមកំហែង ការយាយី និង​ការដាក់​ក្នុង​បញ្ជីខ្មៅ ដែលជា​ហេតុ​ធ្វើឱ្យប៉ះពាល់​យ៉ាងធ្ងន់ធ្ងរ​លើ​សមត្ថភាព​របស់​ពួកគេ​ក្នុងការ​បំពេញការងារ​៕