ព័ត៌មានអន្ដរជាតិ

ថៃ ត្រៀមក្លាយជាប្រជាជាតិអាស៊ីអាគ្នេយ៍ដំបូងគេ ដែលអនុញ្ញាតអាពាហ៍ពិពាហ៍ភេទដូចគ្នា

បានផុស

៣ ខែ មុន

នៅ

ថ្ងៃអង្គារ ១៨ មិថុនា ២០២៤

ដោយ

សមាជិកព្រឹទ្ធសភាថៃ នឹងបោះឆ្នោតទទួលស្គាល់ច្បាប់អាពាហ៍ពិពាហ៍ភេទដូចគ្នា នៅថ្ងៃអង្គារទី១៨ ខែមិថុនា ឆ្នាំ២០២៤ នេះ ដែលវានឹងក្លាយជាការទទួលស្គាល់ដំបូងគេបង្អស់នៅអាស៊ីអាគ្នេយ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយពីឆ្លងកាត់ព្រឹទ្ធសភា នោះសេចក្ដីព្រាងច្បាប់នេះនឹងបន្តសុំការយល់ព្រមពីព្រះមហាក្សត្រ Maha Vajiralonkorn មុនចូលជាធរមាននៅរយៈពេល១២០ថ្ងៃបន្ទាប់។ ក្រោយការអនុម័ត ថៃនឹងក្លាយជាទឹកដីទី៣នៅអាស៊ី បន្ទាប់ពីប្រទេសនេប៉ាល់ និងកោះតៃវ៉ាន់ ដែលទទួលស្គាល់អាពាហ៍ពិពាហ៍ភេទដូចគ្នា ហើយអាពាហ៍ពិពាហ៍ភេទដូចគ្នាដំបូងគេដែលស្របច្បាប់នៅថៃ ទំនងជាធ្វើឡើងនៅអំឡុងខែតុលាខាងមុខ។

ច្បាប់ថ្មីនេះ នឹងផ្ដល់សិទ្ធិគ្រប់បែបយ៉ាងឲ្យគូស្នេហ៍ភេទដូចគ្នាឲ្យដូចទៅគូស្វាមីភរិយាផ្សេងៗដែរ ដែលមានដូចជា ច្បាប់ចិញ្ចឹមបីបាច់កូន និងការស្នងមរតក ជាដើម។

នាយករដ្ឋមន្ត្រីថៃ លោក សេដ្ឋា ថាវីស៊ីន ដែលជាអ្នកគាំទ្រដោយបើកចំហចំពោះសហគមន៍ស្រឡាញ់ភេទដូចគ្នា បានឲ្យដឹងថា លោកនឹងរៀបចំកម្មវិធីជប់លៀងមួយសម្រាប់ក្រុមសកម្មជនគូស្នេហ៍ភេទដូចគ្នា នៅគេហដ្ឋានរបស់លោក ក្រោយពីការបញ្ចប់ការបោះឆ្នោតនៅរសៀលថ្ងៃនេះ។

សូមបញ្ជាក់ថា មានជាង៣០ប្រទេសរួចមកហើយ ដែលទទួលស្គាល់ច្បាប់អាពាហ៍ពិពាហ៍ភេទដូចគ្នា ដែលក្នុងនោះហូឡង់គឺជាប្រទេសដំបូងគេលើពិភពលោក ដែលអនុញ្ញាតឲ្យមនុស្សភេទដូចគ្នារៀបការដោយស្របច្បាប់ គិតចាប់តាំងពីឆ្នាំ២០០១មកម៉្លេះ។ យ៉ាងណាមិញ នៅក្នុងអាស៊ី មានតែទឹកដី២ប៉ុណ្ណោះ ទទួលស្គាល់ច្បាប់អាពាហ៍ពិពាហ៍ភេទដូចគ្នានេះគឺ នេប៉ាល់ និងតៃវ៉ាន់។ ចំណែកឯឥណ្ឌា កាលពីខែតុលាឆ្នាំមុន ក៏ត្រៀមចេញច្បាប់ថ្មីនេះផងដែរ តែត្រូវបានច្រានវិញដោយតុលាការកំពូល បើទោះជាមានការយល់ព្រមពីសភាក៏ដោយ៕

ដោយ៖ ឈាង

Related Topics:ប្រទេសថៃ