សេដ្ឋកិច្ច
កូនខ្មែរម្នាក់ ចេះបច្ចេកទេសដាំមើមឈូកជប៉ុន រកចំណូលខ្ទង់ពាន់ដុល្លារ
អតីតពលករខ្មែរ ធ្វើការនៅប្រទេសជប៉ុនម្នាក់ ក្រោយត្រឡប់មកស្រុកខ្មែរវិញ មានជំនាញបច្ចេកទេសដាំមើមឈូកជប៉ុន អាចរកប្រាក់ចំណូលបានចន្លោះពី ៥០០០ដុល្លារ ទៅ ៦០០០ដុល្លារ ក្នុងមួយខែ ដោយមិនទាន់ទូទាត់ពីថ្លៃចំណាយផ្សេងៗទៀត។
លោក ឡុង គន្ធា អាយុ២៩ឆ្នាំ ម្ចាស់កសិដ្ឋានមើមឈូកជប៉ុន (ខេ ធី) បានប្រាប់ កម្ពុជាថ្មី ថា លោកបានចេះជំនាញដាំឈូកជប៉ុននេះ តាំងពីលោកធ្វើការជាពលករនៅប្រទេសជប៉ុនកាលពី៨ឆ្នាំមុនមកម្ល៉េះ លុះដល់ឆ្នាំ២០១៩ ទើបត្រឡប់មកកម្ពុជាវិញ ដើម្បីបើកសិដ្ឋានដាំមើមឈូក នេះឡើងមកតាមក្ដីស្រមៃរបស់ខ្លួន។
គន្ធា បានបន្តទៀតថា សម្រាប់បច្ចេកទេសដាំមើមឈូកជប៉ុន វាគ្មានអ្វីខុសប្លែកពីការធ្វើស្រែចម្ការ របស់កសិករប៉ុន្មាននោះទេ ពោលគឺដំណាំប្រភេទនេះ ត្រូវការទឹកសម្រាប់ថែទាំ ដូចជាការដាំឈូកធម្មតារបស់កសិករខ្មែរយើង ផងដែរ។
ម្ចាស់កសិដ្ឋានវ័យក្មេង រូបនេះ បានបញ្ជាក់ទៀតថា កាលពី៨ឆ្នាំមុនដែលលោកបានធ្វើការនៅប្រទេសជប៉ុននោះ លោកបានឆ្លៀតពេលរៀនបណ្ដើរ ធ្វើការបណ្ដើរ និងអនុវត្តផ្ទាល់ទាក់ទងនឹងជំនាញបច្ចេកទេសដាំមើមឈូកជប៉ុន ដោយលោកដាក់ផែនការអនាគត ពេលត្រឡប់មកស្រុកខ្មែរវិញ នឹងរៀបចំបើកកសិដ្ឋានដាំមើមឈូក សម្រាប់ផ្គត់ផ្គង់ទីផ្សារក្នុងប្រទេសកម្ពុជា និងគ្រោងនាំចេញទៅក្រៅប្រទេសតាមអ្វីដែលអាចធ្វើទៅបាន។
គិតមកទល់សព្វថ្ងៃនេះ គន្ធា បានក្លាយជាម្ចាស់កសិដ្ឋានមើមឈូក ខេ ធី ដែលកំពុងតែជោគជ័យខ្លាំង ក្នុងការដាំមើមឈូក និងបន្តពង្រីកផ្ទៃដីដាំដុះបានប្រមាណជាង ២ ហិកតា។
បច្ចុប្បន្ន កសិដ្ឋានដាំមើមឈូកជប៉ុននេះ ស្ថិតនៅភូមិព្រៃចំការ ឃុំស្មោងខាងត្បូង ស្រុកកំចារមារ ខេត្តព្រៃវែង ដោយទទួលបានទិន្នផលក្នុងមួយហិកតា បានប្រមាណ ១៥ តោន ទៅ ២៥ តោន ជារៀងរាល់ឆ្នាំ។
លោក ឡុង គន្ធា បានឱ្យដឹងបន្ថែមទៀតថា ជាមធ្យមនៅក្នុងមួយថ្ងៃសម្រាប់ការផ្គត់ផ្គង់ ប្រហែលជាង ៥០ គីឡូក្រាម ក្នុង ១គីឡូក្រាមមានតម្លៃ ១ម៉ឺនរៀលជាប្រចាំថ្ងៃ និងបើគិតជាប្រចាំខែវិញ លោកអាចរកចំណូលចេញពីរបរកសិកម្មមួយនេះ ចន្លោះពី ៥០០០ដុល្លារ ទៅ៦០០០ដុល្លារ ដោយមិនទាន់ទូទាត់់ទៅលើការចំណាយផ្សេងៗ ក្នុងកសិដ្ឋានទាំងមូល។ នេះបើតាមការបញ្ជាក់របស់ម្ចាស់កសិដ្ឋាន។
បើតាម លោក គន្ធា មើមឈូកនេះ ជាប្រភេទបន្លែធម្មជាតិម្យ៉ាង ដែលមានរសជាតិឆ្ងាញ់ និងអាចយកទៅកែច្នៃធ្វើជាម្ហូបបានជាច្រើនទម្រង់ដូចជា ស្ងោរស៊ុប ឆា បំពង ជាពិសេសអាចយកក្រឡុកធ្វើភេសជ្ជៈផ្សេងៗទៀត បានផងដែរ។
គួរបញ្ជាក់ដែរថា មើមឈូកជប៉ុន គឺជាបន្លែមួយប្រភេទ ដែលជួយដល់សុខភាព សម្បូរជាតិវីតាមីន និងសារធាតុរ៉ែ ដូចជា៖ ពពួកវីតាមីន B វីតាមីន C ជាតិសរសៃ Fiber ជាតិដែក ស្ពាន់ ស័ង្កសី ម៉ាញ៉េស្យូម ម៉ង់ហ្គាណែស និងកាលស្យូម ជាដើម៕
អត្ថបទ ៖ សួស សិត
-
ព័ត៌មានជាតិ១ សប្តាហ៍ ago
ព្យុះ ប៊ីប៊ីនកា បានវិវត្តន៍ទៅជាព្យុះសង្ឃរា បន្តជះឥទ្ធិពលលើកម្ពុជា
-
ព័ត៌មានជាតិ៥ ថ្ងៃ ago
ព្យុះ ពូលឡាសាន ជាមួយវិសម្ពាធទាប នឹងវិវត្តន៍ទៅជាព្យុះទី១៥ បង្កើនឥទ្ធិពលខ្លាំងដល់កម្ពុជា
-
ព័ត៌មានអន្ដរជាតិ៤ ថ្ងៃ ago
ឡាវ បើកទំនប់ទឹកនៅខេត្ត Savannakhet
-
ព័ត៌មានអន្ដរជាតិ១ សប្តាហ៍ ago
អឺរ៉ុបកណ្តាលនិងខាងកើត ក៏កំពុងរងគ្រោះធ្ងន់ធ្ងរ ដោយទឹកជំនន់ដែរ
-
ព័ត៌មានអន្ដរជាតិ១ សប្តាហ៍ ago
វៀតណាម ប្រាប់ឲ្យពលរដ្ឋត្រៀមខ្លួន ព្រោះព្យុះថែមទៀត នឹងវាយប្រហារ ចុងខែនេះ
-
ព័ត៌មានជាតិ៣ ថ្ងៃ ago
Breaking News! កម្ពុជា សម្រេចដកខ្លួនចេញពីគម្រោងCLV-DTA
-
ព័ត៌មានអន្ដរជាតិ៥ ថ្ងៃ ago
ព្យុះកំបុងត្បូង នឹងវាយប្រហារប្រទេសថៃ នៅថ្ងៃសុក្រនេះ
-
ព័ត៌មានជាតិ៧ ថ្ងៃ ago
ព្យុះចំនួន២ នឹងវាយប្រហារក្នុងពេលតែមួយដែលមានឥទ្ធិពលខ្លាំងជាងមុន ជះឥទ្ធិពលលើកម្ពុជា