រដ្ឋនិងអង្គការ រៀបចំ ទិវាបរិស្ថានពិភពលោក ចូលរួមទប់ទល់ប្រែប្រួលអាកាសធាតុ

តំណាងស្ថាប័នរាជរដ្ឋាភិបាលកម្ពុជា អង្គការ វីអេសអូ និងអង្គការ Save the Children ប្រចាំកម្ពុជា បានសហការរៀបចំ ទិវាបរិស្ថានពិភពលោក ដើម្បីបង្ហាញពីផលជះរបស់គម្រោង ដែលកំពុងបន្តអនុវត្តដោយផ្តោតលើការលើកកម្ពស់ការអនុវត្តប្រកបដោយនិរន្តរភាព ស្របតាមសេដ្ឋកិច្ចបៃតង ការដោះស្រាយបញ្ហាប្រឈមនៃការរិចរិលដី វាលខ្សាច់ និងគ្រោះរាំងស្ងួតនៅកម្ពុជា ក៏ដូចជាបញ្ហាផ្សេងៗទៀត។

កម្មវិធីនេះ ត្រូវបានរៀបចំឡើង កាលពីថ្ងៃទី ១៩ ខែមិថុនា ឆ្នាំ ២០២៤ នៅរាជធានីភ្នំពេញ ក្រោមការគាំទ្រថវិកាពី សហភាពអ៊ឺរ៉ុបប្រចាំកម្ពុជា និង UKAid ដោយមានអ្នកចូលរួមប្រមាណ៨៥នាក់ ក្នុងនោះមាន សមាជិកសហគមន៍នេសាទ ម្ចាស់អាជីវកម្មបៃតងក្នុងស្រុក សហគ្រិនវ័យក្មេង អ្នកស្ម័គ្រចិត្តសហគមន៍ និងប្រជាកសិករមកពីតំបន់បឹង​ទន្លេ​សាបខាងកើត ព្រមទាំង តំណាងមកពីក្រសួងស្ថាប័នរាជរដ្ឋាភិបាល អង្គការដៃគូផ្នែកអភិវឌ្ឍន៍ និងវិស័យឯកជន។​

ទិវាបរិស្ថានពិភពលោកនាឆ្នាំនេះ ក៏រៀបចំឡើងក្នុងគោលបំណងដើម្បីគូសបញ្ជាក់ពីសារៈសំខាន់នៃកិច្ចអភិរក្សបរិស្ថាននៅតំបន់ទន្លេសាប និងការអនុវត្តប្រកបដោយនិរន្តរភាពនៅក្នុងសហគមន៍នេសាទ រួមមានការអនុវត្តនូវដំណោះស្រាយជាក់ស្តែងក្នុងការកែច្នៃថាមពល ការកាត់បន្ថយការប្រើប្រាស់ប្លាស្ទិក ការកែច្នៃនិងអភិរក្សធនធានធម្មជាតិដែលទាំងបុគ្គលនិងសហគមន៍អាចទទួលបានផលប្រយោជន៍ក្នុងជីវិតប្រចាំថ្ងៃ។

លោកស្រី មាស ច័ន្ទធីតា អនុរដ្ឋលេខាធិការក្រសួងបរិស្ថាន ដែលបានចូលរួមកម្មវិធីនេះ បានលើកឡើង អំពីបញ្ហាការប្រែប្រួលអាកាសធាតុ បានក្លាយជាប្រធានបទមួយដ៏សំខាន់ ដែលត្រូវបានយកចិត្តទុកដាក់កាន់តែខ្លាំងឡើងៗ ទាំងនៅកម្ពុជា ក៏ដូចជានៅលើពិភពលោក ជាពិសេសក្នុងពេលដែលការប្រែប្រួលអាកាសធាតុបានបង្កនូវគ្រោះមហន្តរាយកាន់តែធំឡើងៗសម្រាប់ភពផែនដី និងមនុស្សជាតិទំាងមូល។
លោកស្រីបញ្ជាក់ថា៖«ទោះបីជាប្រទេសកម្ពុជាស្ថិតក្នុងចំណោមប្រទេសដែលបញ្ចេញឧស្ម័នផ្ទះកញ្ចក់ទាបបំផុតក៏ដោយ ក៏យើងបានចូលរួមចំណែក ដើម្បីកាត់បន្ថយការប្រែប្រួលអាកាសធាតុ»។
លោកស្រីបន្ថែមថា យុទ្ធនាការ «ថ្ងៃនេះ ខ្ញុំមិនប្រើថង់ប្លាស្ទិកទេ» និង«កម្ពុជាស្អាត ខ្មែរធ្វើបាន» ដែលយុទ្ធនាការទាំងពីរនេះ បាននឹងបន្តសកម្មភាពខ្លួនយ៉ាងសកម្ម និងដូចភ្លៀងរលឹម ដើម្បីបរិស្ថានស្អាត និងមានការទទួលស្គាល់ពីជនរួមជាតិដោយភាពជឿជាក់ និងនៅលើឆាកអន្តរជាតិ។

អង្គការ Save the Children  បានឱ្យដឹងថា ការៀបចំ ទិវាបរិស្ថាននេះ ដើម្បីបង្ហាញពីសារៈសំខាន់នៃការចូលរួមទូទាំងពិភពលោកក្នុងកិច្ចខិតខំប្រឹងប្រែងអភិរក្ស។ អង្គការនេះបន្តថា កិច្ចខិតខំប្រឹងប្រែងទាំងនេះ រួមមាន ការស្ដារឡើងវិញនូវដីដែលខូចគុណភាព ប្រយុទ្ធប្រឆាំងនឹងការរិចរិលដី វាលខ្សាច់ ការកសាងភាពធន់នឹងគ្រោះរាំងស្ងួត និងការការពារប្រព័ន្ធអេកូឡូស៊ីធម្មជាតិដែលទ្រទ្រង់ជីវិតទាំងអស់។
ក្នុងនាមជាយុទ្ធនាការបរិស្ថានដ៏សំខាន់មួយរបស់អង្គការសហប្រជាជាតិ តាមរយៈ ទិវាបរិស្ថានពិភពលោកឆ្នាំនេះ បានអំពាវនាវដល់បុគ្គល សហគមន៍ និងប្រជាជាតិនានា ឱ្យរួបរួមគ្នាក្នុងការថែរក្សាភពផែនដីរបស់យើងសម្រាប់មនុស្សជំនាន់ក្រោយ៕

អត្ថបទ៖ ឡាយ សាមាន