សុខភាព

វិធីការពារ ការឆ្លងមេរោគរលាកថ្លើមប្រភេទ បេ ទៅទារក!

បានផុស

៤ years មុន

នៅ

ថ្ងៃចន្ទ ១ មីនា ២០២១

ដោយ

ជំងឺរលាកថ្លើម ដែលបង្កឡើងដោយសារវីរុសរលាកថ្លើមបេ គឺជាបញ្ហាសុខភាពមួយដ៏ធំនៅលើពីភពលោក។ ភាគច្រើននៃជំងឺនេះវិវត្តន៍ទៅរក ជំងឺរលាកថ្លើមរ៉ាំរ៉ៃ ជំងឺក្រិនថ្លើម និងមហារីកថ្លើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈអង្គការសុខភាពពិភពលោកបានឲ្យដឹងថា សព្វថ្ងៃនេះអ្នកដែលមានផ្ទុកមេរោគរលាកថ្លើមរ៉ាំរ៉ៃប្រភេទបេ មានប្រហែល ២៤០លាននាក់ ដែលក្នុងនោះ ៧៥% គឺជាអ្នករស់នៅតំបន់ អាស៊ី អាស៊ីប៉ាស៊ីហ្វិក និងអាហ្រិក។ ការឆ្លងនៅតំបន់អាស៊ី ភាគច្រើនគឺការឆ្លងពីម្តាយទៅកូន ក្នុងអំឡុងពេលមានផ្ទៃពោះ អំឡុងពេលសម្រាល និងការឆ្លងតាមរយៈការទំនាក់ទំនងផ្ទាល់ ពីមនុស្សម្នាក់ទៅមនុស្សម្នាក់។ ១៥% ទៅ ៤០% នៃអ្នកដែលឆ្លងមេរោគនេះ វិវត្តន៍ទៅរកជំងឺក្រិនថ្លើម និងមហារីកថ្លើម ដែលជាហេតុបណ្តាលឲ្យមានអ្នកស្លាប់ប្រហែល ១លាននាក់ក្នុងមួយឆ្នាំ នៅលើសកលលោកសព្វថ្ងៃនេះ។

ក) ការចម្លងមេរោគ៖

ផ្លូវចម្លងមេរោគថ្លើមប្រភេទ បេ គឺតាមរយៈ ឈាម ផ្លូវភេទ ការទំនាក់ទំនងគ្នាផ្ទាល់ជាមួយនឹងអ្នកជំងឺ ដែលប៉ះនឹងរបួសឬដំបៅអ្នកជំងឺ ហើយជាពិសេសគឺការឆ្លងពីម្តាយទៅកូន។

ការចម្លងមេរោគថ្លើម បេ ពីម្តាយទៅកូនមាន ៣ ប្រភេទ៖

– ការឆ្លងក្នុងពេលមានផ្ទៃពោះ

– ការឆ្លងក្នុងអំឡុងពេលកើត

– ការឆ្លងក្រោយកើត

១. ការឆ្លងក្នុងពេលមានផ្ទៃពោះ៖

ចំពោះការឆ្លងក្នុងកំឡុងពេលមានផ្ទៃពោះ គឺមានតិច (ប្រហែល ១០%) ដែលកត្តាប្រឈមធ្វើឲ្យមានការឆ្លងនោះទាក់ទងនឹង៖

– ម្តាយមានផ្ទុក វីរុសក្នុងឈាមខ្ពស់ (High viral load)

– ម្តាយក្រៅពីមាន AgHbs វិជ្ជមាន ព្រមទាំងមាន AgHbe វិជ្ជមានថែមទៀត

– ម្តាយឆ្លងមេរោគថ្លើម បេ នៅត្រីមាសទី៣

– ម្តាយមានបែកទឹកភ្លោះយូរ ឬរយៈពេលសម្រាលកូនយូរ សម្រាលកូនមិនគ្រប់ខែ

២. ការឆ្លងក្នុងកំឡុងពេលកើត៖

ក្នុងអំឡុងពេលកើត ការឆ្លងមានអត្រាខ្ពស់ (៨០%)៖

– ការឆ្លងតាមរយៈទឹកភ្លោះ ឬឈាមម្តាយដែលមានវីរុស

– ការឆ្លងតាមរយៈការដាច់ស្បែកទារក ឬរបួស ហើយប៉ះនឹងទឹកភ្លោះ ឬឈាមម្តាយ

សំគាល់ៈ ទារកដែលឆ្លងពីម្តាយ ភាគច្រើន (៩០%) វិវត្តន៍ទៅរក ការរលាកថ្លើមរ៉ាំរ៉ៃ ក្នុងអាយុ ៣ឆ្នាំ។

៣. ការឆ្លងក្រោយកើត៖

ការឆ្លងក្រោយកំណើត មានអត្រាតិចជាង ១០%៖

– ការឆ្លងតាមទឹកដោះ (ពុំមានការសិក្សាណាបញ្ជាក់ច្បាស់នៅឡើយ លើកលែងតែក្បាលដោះម្តាយមានដំបៅ ឬបែកឈាម ដែលបណ្តាលឲ្យទារកឆ្លងមេរោគថ្លើមបេនេះ)

– ការឆ្លងមេរោគក្រោយសម្រាល ច្រើនកើតឡើង នៅពេលមានទំនាក់ទំនងជិតស្និទ្ធនិងអ្នកមានរលាកថ្លើមប្រភេទបេរ៉ាំរ៉ៃ។

ខ) វិធីបង្ការការចម្លងមេរោគពីម្តាយទៅកូន៖

យើងអាចធ្វើការបង្ការ ការចម្លងពីម្តាយទៅកូនបាន ដោយការចាក់ Immunoglobulin ការពារជំងឺរលាកថ្លើមបេ នៅពេលទារកទើបនឹងកើតឲ្យបានឆាប់ ក្នុងរយៈពេល ១២ម៉ោងក្រោយកើត និងចាក់ថ្នាំបង្ការការពារជំងឺរលាកថ្លើមប្រភេទបេ ក្នុងរយៈពេល ២៤ ម៉ោង។ ការចាក់ថ្នាំការពារនេះ អាចជួយកាត់បន្ថយការចម្លងរោគពីម្តាយទៅកូនបាន ៩០%។

ដើម្បីការពារសុវត្ថិភាព និងសុខភាពទារករបស់លោកអ្នកឲ្យបានល្អ អ្នកម្តាយទាំងឡាយ សូមមេត្តាមកពិនិត្យផ្ទៃពោះជាមួយវេជ្ជបណ្ឌិតជំនាញនៃមន្ទីរពេទ្យកាល់ម៉ែត ឲ្យបានទៀងទាត់ ចាប់ពីពេលចាប់ផ្តើមពពោះរហូតដល់សម្រាល ដោយក្នុងនោះមានការធ្វើតេស្តឈាមរកមើលមេរោគថ្លើមប្រភេទ បេ ជាមុន ព្រោះអ្នកនឹងទទួលបានព័ត៌មានដ៏សំខាន់ទុកជាមុន សម្រាប់ត្រៀមធ្វើការការពារ ការចម្លងមេរោគថ្លើមប្រភេទ បេ និងឈានទៅរកការចាក់ថ្នាំបង្ការឲ្យបានឆាប់ ដើម្បីឲ្យការការពារនេះ កាន់តែមានប្រសិទ្ធភាពខ្ពស់ដល់ទារករបស់លោកអ្នក៕

អត្ថបទ៖ រស្មី

សូមចុចអាន៖ មុននាំកូនទៅពេទ្យអំឡុងផ្ទុះកូវីដ ១៩ ម៉ាក់ប៉ាគួរដឹងរឿង ៤ យ៉ាងនេះសិន