ឆ្នាំនេះ កសិករស្រុកសំឡូតរកចំណូលពីដំណាំទុរេនបានជិត១៧លានដុល្លារ

ផ្លែទុរេនខេត្តបាត់ដំបង នៅតែមានភាពល្បីល្បាញអំពីរសជាតិដ៏ផ្អែមឆ្ងាញ់ បានឆក់ទាញយកចិត្តភ្ញៀវទេសចរមកពីតាមបណ្តាខេត្តនានា យ៉ាងសន្ធឹកសន្ធាប់ ក្នុងរដូវកាលកសិករប្រមូលផលទុរេនម្តងៗ។ ឆ្នាំនេះ កសិករនៅស្រុកសំឡូត អាចរកចំណូលពីដំណាំទុរេនជិត ១៧លានដុល្លារ។

បើនិយាយពីភ្ញៀវទេចរវិញ កាលពីចុងសប្តាហ៍មុន និងចុងសប្តាហ៍នេះ ក៏មិនខុសគ្នាប៉ុន្មាននោះទេ គេសង្កេតឃើញរថយន្តទំនើបៗតកន្តុយគ្នា ឆ្ពោះតម្រង់ទៅស្រុកសំឡូត យ៉ាងសន្ធឹកសន្ធាប់ មានការកកស្ទះចរាចរណ៍ផង។ មន្ត្រីមូលដ្ឋានភូមិឃុំបាននិយាយថា រាល់ភ្ញៀវទាំងអស់ ដែលមកកម្សាន្តភាគច្រើនគឺពួកគេគ្នា ចូលចម្ការទុរេនរបស់កសិករ មុននឹងពួកគេទៅកម្សាន្តនៅតាមរមនីដ្ឋានផ្សេងៗ ដែលពួកគេចង់ទៅ។ ប្រភពដដែលបន្តថា សកម្មភាពភ្ញៀវទេសចរបែបនេះ គឺពួកគេសម្រុកទិញផ្លែទុរេនជាមុនសិន ព្រោះស្របពេលកសិករ ប្រមូលផលទុរេនចុងដៃផង ម្នាក់ៗបារម្ភខ្លាចអស់ផ្លែទុរេន។

ភ្ញៀវទេសចរម្នាក់ ក្នុងចំណោមភ្ញៀវទេសចររួមដំណើរផ្សេងទៀត គឺអ្នកស្រី ចាន់ ថាវី មកពីខេត្តសៀមរាបបានប្រាប់ថា គ្រួសារអ្នកស្រីចូលចិត្តហូបទុរេនណាស់ ឱ្យតែដល់រដូវកាលនេះ គឺមកទិញដល់ចម្ការមុនគេ។ អ្នកស្រីមិនទុកចិត្តការទិញទុរេនលើទីផ្សារឡើយ ព្រោះបារម្ភប៉ះចំទុរេនគីមី អ្នកស្រីសុខចិត្តធ្វើដំណើរឆ្ងាយដើម្បីទិញទុរេនដល់ចម្ការតែម្តង។

បើយោងរបាយការណ៍ ពីការិយល័យកសិកម្ម ធនធានធម្មជាតិ និងបរិស្ថានស្រុកសំឡូត បានបង្ហាញឲ្យដឹងថា គិតត្រឹមខែមិថុនា ឆ្នាំ២០២៤នេះ និន្នន័យ និងប្រមូលផលដំណាំទុរេនរបស់កសិករក្នុងស្រុកសំឡូន ខេត្តបាត់ដំបង មានការដាំដុះលើឃុំចំនួន០៦ក្នុងចំណោមឃុំទាំង០៧ ខណៈមានតែ២ឃុំប៉ុណ្ណោះ ដែលកសិករធ្វើការដាំដុះផលដំណាំទុរេនច្រើនជាងតាមបណ្តាឃុំនានា ក្នុងស្រុកសំឡូតទាំងមូល ។ ក្នុងនោះមានដូចជា ១-ឃុំសំឡូត មានផ្ទៃដីដាំដុះចំនួន ២៨០ហិកតា ផ្ទៃដីប្រមូលផលចំនួន ២១០ហិកតា ទិន្នផលទទួលបាន ជាមធ្យម១០,០០០គីឡូក្រាមក្នុងមួយហិកតា ទិន្នផលសរុប ២,១០០,០០០គីឡូក្រាម តម្លៃលក់១៥,០០០ក្នុង១គីឡូក្រាម រកចំ ណូលបាន៣១,៥០០,០០០,០០០រៀល ស្មើនិង ៧,៨៧៥,០០០ដុល្លារ។

២-ឃុំស៊ុង ផ្ទៃដីដាំដុះចំនួន ២១៥ហិកតា ផ្ទៃដីប្រមូលផលចំនួន ២០៥ហិកតា ទិន្នផលទទួលជាមធ្យម ១០,០០០គីឡូក្រាម ក្នុងមួយហិកតា ទិន្នផលសរុបចំនួន ២,០៥០,០០០គីឡូក្រាម តម្លៃលក់ ១៥,០០០រៀលក្នុង១គីឡូក្រាម ចំណូលសរុប ៣០,៧៥០,០០០,០០០រៀល ស្មើនិង ៧,៦៨៧,៥០០ដុល្លារ ។ ៣-ឃុំមានជ័យ ផ្ទៃដីដាំដុះចំនួន ៤១ហិកតា ផ្ទៃដីប្រមូលផល ២០ហិកតា ទិន្នផលទទួលជាមធ្យម ៨,០០០គីឡូក្រាមក្នុង១ហិកតា ទិន្នផលសរុបចំនួន ១៦០,០០០គីឡូក្រាម តម្លៃលក់ ១៥,០០០រៀល ក្នុង១គីឡូក្រាម ចំណូលសរុប២,៤០០,០០០,០០០ រៀល ស្មើនិង ៦០០,០០០ដុល្លារ ។

៤-ឃុំតាសាញ មានផ្ទៃដីដាំដុះចំនួន ២០ហិកតា ផ្ទៃដីប្រមូលផលចំនួន ១២ហិកតា ទិន្នផលទទួលជាមធ្យម ៩,០០០គីឡូក្រាម ទិន្នផលសរុប ១០៨,០០០គីឡូក្រាម តម្លៃលក់ ១៥,០០០រៀលក្នុង ១គីឡូក្រាម ចំណូលសរុប១,៦២០,០០០,០០០រៀល ស្មើនឹង ៤០៥,០០០ដុល្លារ។

៥-ឃុំតាតោក ផ្ទៃដីដាំដុះចំនួន ៣២ហិកតា ផ្ទៃដីប្រមូលផល០៩ហិកតា ទិន្នផលទទួលជាមធ្យម ៧,០០០គីឡូក្រាមក្នុង១ហិកតា ទិន្នផលសរុប ៦៣,០០០ហិកតា តម្លៃលក់ ១៥,០០០រៀល ក្នុង១គីឡូក្រាម ចំណូលសរុប ៩៤៥,០០០,០០០រៀល ស្មើនឹង២៣៦,២៥០ដុល្លារ ។​ ៥-ឃុំកំពុងល្ពៅ ផ្ទៃដីដាំដុះចំនួន ០៥ហិកតា ផ្ទៃដីប្រមូលផល ០១ហិកតា ទិន្នផលជាមធ្យម ៧,០០០គីឡូក្រាម ក្នុង១ហិកតាទិន្នផលសរុប ៧,០០០គីឡូក្រាម តម្លៃលក់ ១៥,០០០រៀលក្នុង១គីឡូក្រាម ចំណូលសរុប ១០៥,០០០,០០០រៀល ស្មើនិង២៦, ២៥០ដុល្លារ។

សរុបលើការប្រមូលផល និងប្រាក់ចំណូលលើផលដំណាំទុរេន លើឃុំចំនួន០៦ក្នុងចំណោម៧ឃុំនៃស្រុកសំឡូត មានផ្ទៃដីដាំដុះចំនួន ៥៩៣ហិកតា ផ្ទៃដីប្រមូលផលចំនួន ៤៥៧ហិកតា ទិន្នផលទទួលជាមធ្យម ៤,៤៨៨តោន ប្រាក់ចំណូលសរុប ៦៧,៣២០,០០០,០០០រៀល ស្មើនិង ១៦,៨៣០,០០០ដុល្លារអាមេរិក៕

ដោយ៖ សៅ សារិទ្ធ