ជីដូនវ័យ ៩១ ឆ្នាំ ​បរិច្ចាគហូលពិតាន ១ ផ្ទាំង ជាស្នាដៃចុងក្រោយ ទុក​អភិរក្ស​​ឲ្យ​កូន​ខ្មែរ​បាន​ស្គាល់

ពលរដ្ឋស្រុកព្រៃកប្បាស ខេត្តតាកែវ ប្រគល់ហូលពិតាន​ចំនួន ៣ ផ្ទាំង ជូន​សារមន្ទីរ​វាយនភណ្ឌ​ប្រពៃណីអាស៊ី ដើម្បី​ចូលរួម​ផ្សព្វផ្សាយឱ្យកូនខ្មែរបានស្គាល់។

ពលរដ្ឋដែលជាអ្នកតម្បាញសូត្រនៅស្រុកព្រៃកប្បាស ខេត្តតាកែវ កាលពីពាក់កណ្តាលខែមិថុនា ឆ្នាំ២០២៤ បាន​ប្រគល់​ជូន​ហូលពិតាន​ចំនួន ៣ ផ្ទាំង ដល់​សារមន្ទីរ​​វាយនភណ្ឌ​ប្រពៃណីអាស៊ី ដែល​គ្រប់គ្រង​​ដោយ​​អាជ្ញាធរជាតិអប្សរា ក្នុង​គោល​បំណង​ដើម្បី​ចូលរួម​ផ្សព្វផ្សាយ​ពីតួនាទី​ហូលពិតាន​នៅក្នុងសង្គមខ្មែរទៅ​កាន់សារធារណជន ព្រមទាំង​បណ្ដុះ​ផ្នត់គំនិត​ស្រឡាញ់ និង​ជួយ​ថែរក្សា​ឱ្យបាន​យូរអង្វែងតទៅមុខទៀត។ ហូល​ពិតានទាំង ៣​ ផ្ទាំង​នោះ​ មាន​ក្បាច់គោម​សាច់រឿងព្រះវេស្សន្តរជាតក ដែល​ស្នាដៃ​ពោរពេញដោយសិល្បៈ និង​ជំនាញយ៉ាងប៉ិនប្រសប់។

លោក​យាយ លឹម មៀច អាយុ ៩១ ឆ្នាំ ជា​អ្នកភូមិត្រពាំងស្តុក ឃុំ​តាំងយ៉ាប ស្រុក​ព្រៃកប្បាសបាន​ឱ្យដឹងថា លោក​យាយ​​ចេះ​ជំនាញត្បាញហូលតាំងពីអាយុ ២០ឆ្នាំ ហើយ​ក៏អាចត្បាញហូលពិតានផង។ ថ្វីត្បិតតែសព្វថ្ងៃ ​មាន​វ័យជរាមិនអាចត្បាញបាន ក៏ប៉ុន្តែលោកយាយ​បាន​បរិច្ចាគហូលពិតានចំនួន ១ ផ្ទាំងដែលជាស្នាដៃចុងក្រោយសម្រាប់ជាទាន មក​ដល់សារមន្ទីរវាយនភណ្ឌប្រពៃណីអាស៊ី ដើម្បី​អភិរក្សនិង​តាំងបង្ហាញដល់ភ្ញៀវទេសចរជាតិ និងអន្តរជាតិ។

លោកយាយ លឹម មាជ បង្ហាញទឹកចិត្តត្រេកអរជាខ្លាំង ក្នុងការធ្វើអំណោយហូលពិតានដល់សារមន្ទីរ ដោយ​លោកយាយ​ចង់ឱ្យកូនខ្មែរជំនាន់ក្រោយបានស្គាល់ និងជួយថែរក្សាកុំឱ្យបាត់បង់។

អ្នកស្រី គង់ សុភ័ក្រ មន្រ្តីអភិរក្សវាយនភណ្ឌ​នៃ​សារមន្ទីរវាយនភណ្ឌប្រពៃណីអាស៊ីបាន​ឱ្យដឹងថា ថ្មីៗ​នេះសារមន្ទីរ​ទទួលបានសមុច្ច័យចំនួន ៤៤ ពី​ប្រជាពលរដ្ឋ ២៧ គ្រួសារ រស់នៅខេត្តតាកែវ។ ក្នុងចំណោមនោះ មាន​ហូលពិតានចំនួន ៣ ហើយ​ហូលពិតាននេះមានតួនាទីសំខាន់ដូចជារូបព្រះបត់ដែរ ដែលត្បាញសម្រាប់តាំង​នៅទីសក្ការៈ ឬវត្តអារាម និង​មានអ្នកជាវដើម្បីប្រគេនព្រះសង្ឃជាដើម។ ស្នាដៃសិល្បៈ​ត្បាញហូលពិតាន​របស់អ្នកខេត្តតាកែវ គឺមានជាច្រើនជំនាន់មកហើយ ដែលផ្ទេរ​ជំនាញនេះ​បន្តគ្នារហូត​មកដល់សព្វថ្ងៃ។

អ្នកស្រី គង់ សុភ័ក្រ ពន្យល់ថា «បច្ចុប្បន្ននេះ កូនខ្មែរជំនាន់ក្រោយ មិនសូវស្គាល់ហូលពិតាននេះទេ គឺស្គាល់​តែហូលដែលគេត្បាញសម្រាប់កាត់ជាសម្លៀកបំពាក់តែប៉ុណ្ណោះ»។

នៅសារមន្ទីរវាយនភណ្ឌប្រពៃណីអាស៊ី ក្រៅពីតាំងបង្ហាញសម្លៀកបំពាក់សហសម័យ និង​ឧបករណ៍តម្បាញ់មកពីបណ្តាប្រទេសចំនួន៥ ដែលរស់នៅតាមដងទន្លេមេគង្គ និងទន្លេគង្គារ ក៏មានការអភិរក្ស និង​តាំងបង្ហាញជាអចិន្ត្រៃយ៍នូវហូលពិតានចំនួន ៦ផ្ទាំង មានក្បាច់គោមសាច់រឿងពុទ្ធប្រវត្តិ ក្បាច់គោមសត្វហង្ស និងក្បាច់គោមសត្វនាគជាដើម៕