ព័ត៌មានអន្ដរជាតិ

ឌូបៃ ជះលុយ ៨ពាន់លានដុល្លារ លើប្រព័ន្ធរំដោះទឹក ក្រោយគ្រោះទឹកជំនន់ជាប្រវត្តិសាស្ត្រ

បានផុស

៨ ខែ មុន

នៅ

ថ្ងៃអង្គារ ២៥ មិថុនា ២០២៤

ដោយ

Chheang

ទីក្រុងឌូបៃ នៃសហព័ន្ធអារ៉ាប់រួម បានប្រកាសពីគម្រោងតម្លៃ ៨ពាន់លានដុល្លារ សម្រាប់បង្កើតជាប្រព័ន្ធរំដោះទឹក បន្ទាប់ពីទីក្រុងដ៏ស៊ីវិល័យមួយនេះ ទើបជួបប្រទះនឹងគ្រោះទឹកជំនន់យ៉ាងសាហាវមិនធ្លាប់មានពីមុនមក កាលពីខែមេសាកន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រព័ន្ធរំដោះទឹកថ្មី ត្រូវបានរៀបចំ និងប្រកាសឡើងដោយព្រះអង្គម្ចាស់ Sheikh Mohammed bin Rashid Al-Maktoum នៅលើបណ្ដាញសង្គម X កាលពីថ្ងៃចន្ទទី២៤ ខែមិថុនា ឆ្នាំ២០២៤។ គម្រោងដ៏ធំនេះ គ្រោងនឹងបញ្ចប់ឲ្យបានត្រឹមឆ្នាំ២០៣៣ខាងមុខ ហើយការសាងសង់ត្រូវចាប់ផ្ដើមធ្វើឡើងភ្លាមៗតែម្ដងក្រោយពីការប្រកាស។

ព្រះអង្គម្ចាស់ Sheikh Mohammed បានឲ្យដឹងថា ប្រព័ន្ធរំដោះទឹក នឹងគ្របដណ្ដប់នៅគ្រប់ផ្នែកទាំងអស់នៅឌូបៃ ជាមួយសមត្ថភាពបង្ហូរទឹកចេញពីទីក្រុងបានចំនួន ២០លានម៉ែត្រគីបជារៀងរាល់ថ្ងៃ ដើម្បីឲ្យសមស្របទៅតាមគម្រោងក្លាយជាមជ្ឈមណ្ឌលពាណិជ្ជកម្មដ៏ធំបំផុតនាពេលអនាគតរបស់ទីក្រុងឌូបៃ។ សមត្ថភាពប្រព័ន្ធរំដោះទឹកថ្មីនេះ នឹងកើនឡើង ៧០០% បើធៀបនឹងពេលបច្ចុប្បន្ន ហើយនឹងអាចទប់ទល់នូវរាល់បញ្ហាប្រឈមនៃបម្រែបម្រួលអាកាសធាតុ។

គួររំឭកថា កាលពីខែមេសាកន្លងទៅ ភ្លៀងបានធ្លាក់យ៉ាងខ្លាំងនៅឌូបៃ បង្កឲ្យកើតជាគ្រោះទឹកជំនន់ភ្លាមៗ មិនអាចទប់ស្កាត់ទាន់ពេលវេលា ហើយបានឆក់យកជីវិតមនុស្សអស់យ៉ាងហោចណាស់ចំនួន ៤នាក់។ ហេតុការណ៍នេះ គឺជាគ្រោះធម្មជាតិ ដែលមិនធ្លាប់មាននៅក្នុងប្រវត្តិសាស្ត្ររបស់សហព័ន្ធអារ៉ាប់រួម នារយៈពេល៧៥ឆ្នាំកន្លងមក៕

ដោយ៖ ឈាង