ព័ត៌មានជាតិ

ក្រសួងវប្បធម៌ និងវិចិត្រសិល្បៈ រៀបចំសិក្ខាសាលាផ្សព្វផ្សាយស្តីពី «យន្តការនិងសេចក្តីណែនាំដាក់ឱ្យអនុវត្តប្រព័ន្ធបញ្ជរតែមួយជាតិ»

បានផុស

៧ ខែ មុន

នៅ

ថ្ងៃអង្គារ ២៥ មិថុនា ២០២៤

ដោយ

នៅព្រឹកថ្ងៃទី២៥ ខែមិថុនា ឆ្នាំ២០២៤ នាយកដ្ឋានបុរាណវត្ថុនៃអគ្គនាយកដ្ឋានបេតិកភណ្ឌបានរៀបចំសិក្ខាសាលាផ្សព្វផ្សាយស្ដីពី «យន្តការនិងសេចក្តីណែនាំដាក់ឱ្យអនុវត្តប្រព័ន្ធបញ្ជរតែមួយជាតិ» ក្នុងការស្នើសុំលិខិតអនុញ្ញាតនាំចេញ នាំចូលវត្ថុសិល្បៈរបស់ក្រសួងវប្បធម៌ និងវិចិត្រសិល្បៈ នៅទីស្តីការក្រសួង ក្រោមអធិបតីភាព លោក ហាប់ ទូច រដ្ឋលេខាធិការប្រចាំការនិងជាតំណាងដ៏ខ្ពង់ខ្ពស់លោកជំទាវបណ្ឌិតសភាចារ្យរដ្ឋមន្ត្រីក្រសួងវប្បធម៌ និងវិចិត្រសិល្បៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សិក្ខាសាលាខាងលើនេះ គឺមានការអញ្ជើញចូលរួមពីតំណាងស្ថាប័នជាតិ វិស័យឯកជន តំណាងក្រុមហ៊ុនដឹកជញ្ជូន អាជីវករ និងអង្គភាពពាក់ព័ន្ធ ប្រមាណជាង ៨០ អង្គ/នាក់។ លោករដ្ឋលេខាធិការប្រចាំការបានថ្លែងថា ដើម្បីចាប់យកកាលានុវត្តនភាព និងសក្ដានុពលដ៏ធំធេងពីបច្ចេកវិទ្យាឌីជីថល រាជរដ្ឋាភិបាលបានប្រកាសដាក់ឱ្យអនុវត្តជាផ្លូវការនូវប្រព័ន្ធបញ្ជរតែមួយជាតិ ដោយអនុញ្ញាតឱ្យនាំចេញ-នាំចូលទំនិញ អាចដាក់ពាក្យសុំអាជ្ញាប័ណ្ណ លិខិតអនុញ្ញាត វិញ្ញាបនបត្រ និងឯកសារតម្រូវផ្សេងៗ ពាក់ព័ន្ធនឹងការនាំចេញ-នាំចូលទំនិញ ទៅគ្រប់ក្រសួង ស្ថាប័នមានសមត្ថកិច្ចតែមួយលើករួមគ្នា ដើម្បីទទួលបានការអនុញ្ញាតសម្រាប់យកទៅប្រើប្រាស់ក្នុងការបំពេញបែបបទបញ្ចេញទំនិញពីគយតាមមធ្យោបាយអេឡិចត្រូនិក។

លោកបានបញ្ជាក់បន្ថែមថា ការអនុវត្តប្រព័ន្ធបញ្ជរតែមួយជាតិ នឹងនាំមកនូវផលប្រយោជន៍ជាច្រើន ទាំងសម្រាប់វិស័យសាធារណៈ និងវិស័យឯកជន សំដៅបង្កើនប្រសិទ្ធភាព ជាពិសេសសម្រួលដល់ការបំពេញឱ្យបានឆាប់នូវបែបបទនាំចេញ-ចូលទំនិញ ចំណេញពេលវេលា កាត់បន្ថយការិយាធិបតេយ្យក្នុងដំណើរការស្នើសុំលិខិតអនុញ្ញាតនិងកាត់បន្ថយចំណាយផងដែរ។

ក្នុងក្របខណ្ឌនៃក្រសួងវប្បធម៌ និងវិចិត្រសិល្បៈ លោករដ្ឋលេខាធិការប្រចាំការ បានបន្តទៀតថា ដើម្បីចូលរួមអនុវត្តគោលនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល ក្រសួងបានសម្រេចដាក់ឱ្យអនុវត្តនូវនីតិវិធីក្នុងការស្នើសុំលិខិតអនុញ្ញាតនាំចេញ នាំចូលវត្ថុសិល្ប: ក្នុងទម្រង់អេឡិចត្រូនិកនៃប្រព័ន្ធបញ្ជរតែមួយជាតិ ដោយអនុលោមតាមសេចក្តីជូនដំណឹងលេខ: ១១ ស.ជ.ណ ចុះថ្ងៃទី៣ ខែឧសភា ឆ្នាំ២០២៤ និងសេចក្តីណែនាំ លេខ: ០១ ស.ណ.ន ចុះថ្ងៃទី៣ ខែឧសភា ឆ្នាំ២០២៤៕