ព័ត៌មានជាតិ

ឯកឧត្ដម ហ៊ុន ម៉ានី ទទួលជួបប្រធានទីភ្នាក់ងារជាតិសម្រាប់កិច្ចការសេវាសាធារណៈ និងនវានុវត្តន៍សង្គម របស់ អាស៊ែបៃហ្សង់

បានផុស

៣ ខែ មុន

នៅ

ថ្ងៃពុធ ២៦ មិថុនា ២០២៤

ដោយ

កាលពីថ្ងៃទី ២៥ ខែមិថុនា ឆ្នាំ ២០២៤ ម្សិលមិញ ក្រៅពីការចូលរួមក្នុងកិច្ចប្រជុំ និងកម្មវិធីផ្លូវការនានា នៃវេទិកាសាធារណៈ និងពិធីប្រគល់ពានរង្វាន់របស់អង្គការសហប្រជាជាតិនៅសាធារណរដ្ឋកូរ៉េ ប្រតិភូរបស់ព្រះរាជាណាចក្រកម្ពុជា ដឹកនាំដោយ ឯកឧត្ដមឧបនាយករដ្ឋមន្ត្រី ហ៊ុន ម៉ានី បានទទួលជួបក្នុងជំនួបទ្វេភាគីជាមួយ ឯកឧត្ដម Ulvi Mehdiyev ប្រធានទីភ្នាក់ងារជាតិសម្រាប់កិច្ចការសេវាសាធារណៈ និងនវានុវត្តន៍សង្គម របស់សាធារណរដ្ឋអាស៊ែបៃហ្សង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជំនួបនេះ ថ្នាក់ដឹកនាំស្ថាប័នទាំងពីរ បានចែករំលែកបទពិសោធក្នុងកិច្ចការកែទម្រង់រដ្ឋបាលសាធារណៈ ដោយខាងភាគីអាស៊ែបៃហ្សង់ ចែករំលែកពីសាវតារ បេសកកម្ម និងភាពជោគជ័យរបស់ ASAN Service (Azerbaijan Service and Assessment Network) ជូនដល់អង្គជំនួប។

ជាមួយគ្នានេះ ឯកឧត្ដមឧបនាយករដ្ឋមន្ត្រី ក៏បានគូសបញ្ជាក់ពីកិច្ចការកែទម្រង់រដ្ឋបាលសាធារណៈ ក្នុងរាជរដ្ឋាភិបាលអាណត្តិទី ៧ ក្រោមការដឹកនាំរបស់ សម្តេចធិបតី និងការវិវត្តន៍ នៃវិស័យមុខងារសាធារណៈរបស់កម្ពុជា ព្រមទាំងលើកទឹកចិត្តឲ្យមានការបន្តទំនាក់ទំនង និងកិច្ចសហការណាមួយរវាងស្ថាប័នទាំងពីរឆ្ពោះទៅមុខ។

បន្ថែមលើនេះ ក្នុងវេទិកាសាធារណៈ និងពិធីប្រគល់ពានរង្វាន់របស់អង្គការសហប្រជាជាតិនៅសាធារណរដ្ឋកូរ៉េ ប្រតិភូរបស់ព្រះរាជាណាចក្រកម្ពុជា បានអញ្ជើញចូលរួមទស្សនាការតាំងពិព័រណ៍ រួមទាំងទទួលបាននូវបដិសណ្ឋារកិច្ចពីបណ្ដាប្រទេសនានា ក្នុងគោលដៅរឹតចំណងមិត្តភាព និងកិច្ចសហប្រតិបត្តិការរវាងប្រទេសនីមួយៗ ឲ្យកាន់តែស្អិតរមួត។

សូមជម្រាបថា នាថ្ងៃបន្ទាប់ ឯកឧត្ដម ហ៊ុន ម៉ានី នឹងអញ្ជើញជាវាគ្មិនមួយរូប ក្នុងចំណោមវាគ្មិនដែលជារដ្ឋមន្ត្រី ១០ រូបផ្សេងទៀត ក្នុងវេទិកាតុមូលកម្រិតរដ្ឋមន្ត្រី (Ministerial Roundtable) ការទទួលជួបទ្វេភាគីជាមួយភាគី នៃសាធារណរដ្ឋកូរ៉េ និងកម្មវិធីផ្លូវការផ្សេងៗ ទៀត៕