ជីវិតកម្សាន្ដ

អ្នកគ្រូ តូច យ៉ានី អ្នកបញ្ចូលសំឡេងតួឯកដ៏ល្បីល្បាញនៅកម្ពុជា បង្ហាញការតូចចិត្ត ខណៈបច្ចុប្បន្នមិនសូវមានអ្នកស្គាល់

បានផុស

៣ ខែ មុន

នៅ

ថ្ងៃពុធ ២៦ មិថុនា ២០២៤

ដោយ

អ្នកបញ្ចូលសំឡេងភាពយន្ត(តួឯក) ដ៏មានប្រជាប្រិយ និងល្បីល្បាញបំផុត នៅប្រទេសកម្ពុជា អ្នកស្រី តូច យ៉ានី បានបង្ហាញអារម្មណ៍តូចចិត្ត ខណៈបច្ចុប្បន្នហាក់មិនសូវមានអ្នកស្គាល់ ឬ គេកំពុងនាំគ្នាបំភ្លេចអ្នកបញ្ចូលសំឡេងអស់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្តែងនៅលើទំព័រហ្វេសប៊ុកដែលមានឈ្មោះ «ឧស្សាហកម្មភាពយន្តខ្មែរ» ដែលគេដឹងថាជារបស់លោក យូ សុភា កវីនិពន្ធប្រលោមលោកមានកេរ្តិ៍ឈ្មោះល្បី បានរៀបរាប់ខ្លឹមសារថា «អាណិតអ្នកគ្រូ តូច យ៉ានី ណាស់ អ្នកបញ្ចូលសំឡេងតួឯកដ៏មានប្រជាប្រិយ និងល្បីល្បាញបំផុតនៅក្នុងប្រទេសកម្ពុជា ដែលអ្នកនិយមតាមដានរឿងចិន,កូរ៉េ បានស្គាល់ច្បាស់ថាជាអ្នកបញ្ចូលសំឡេងតួឯកស្រីឈ្មោះ សាន់ ឆាយ ក្នុង រឿង F4 ដ៏ល្បីល្បាញ»។

លោកបានបញ្ជាក់បន្តទៀតថា «អ្នកគ្រូបានបង្ហាញនូវការតូចចិត្តថា សព្វថ្ងៃនេះគេនាំគ្នាបំភ្លេចអ្នកបញ្ចូលសំឡេង ហើយក្រុមខ្លះលែងមានការងារធ្វើ និងក្រុមខ្លះប្រឈមមុខនឹងការបោះបង់»។

លោកបន្ថែមថា «ខ្ញុំពិតជាសោកស្ដាយ និងសូមអរគុណដែលអ្នកគ្រូបានបញ្ចូលសំឡេងនៅក្នុងភាពយន្តមួយចំនួនដែលខ្ញុំបាននិពន្ធកន្លងមកប្រកបដោយការប្រឹងប្រែងក្នុងបំណងគឺដើម្បីបម្រើអារម្មណ៍ទស្សនិកជនទៅតាមទេពកោសល្យរបស់អ្នកគ្រូ និងដើម្បីចូលរួមចំណែកក្នុងការលើកកម្ពស់វិស័យភាពយន្តភាគខ្មែរយើងឲ្យទទួលបាននូវភាពរីកចម្រើន»។

កវីនិពន្ធលោក យូ សុភា បាននិយាយបន្ថែមថា លោកសូមជូនពរអ្នកគ្រូ និងក្រុមការងារ នៅតែមានទីផ្សារការងារល្អបន្តទៅទៀត។ បើគាំទ្រការបញ្ចូលសំឡេង ក៏ដូចជាចូលចិត្តទេពកោសល្យរបស់អ្នកគ្រូ សូមអ្នកគាំទ្រជួយស៊ែរ ដើម្បីលើកទឹកចិត្តអ្នកគ្រូ ក៏ដូចជាក្រុមបញ្ចូលសំឡេងក្នុងប្រទេសកម្ពុជាទាំងអស់ផង៕

អត្ថបទ ៖ ចាន់រ៉ា