ក្រុមហ៊ុនCentury Entertainment ត្រៀមបើកដំណើរការអាជីវកម្មហ្គេម VIPឡើងវិញ នៅ ខែកញ្ញា ដើម្បីចាប់យកលំហូរនៃភ្ញៀវទេសចរថៃ

ក្រុមហ៊ុន​វិនិយោគលើវិស័យកាស៊ីណូដែលបានចុះបញ្ជីនៅផ្សារហ៊ុននៃទីក្រុងហុងកុង Century Entertainment International Holdings និយាយថា ខ្លួនរំពឹងថានឹងបើកអាជីវកម្មហ្គេម VIP នៅកាស៊ីណូរបស់ខ្លួននៅក្រុងប៉ោយប៉ែត ខេត្តបន្ទាយមានជ័យជាថ្មី​នៅដើមខែកញ្ញា បន្ទាប់ពីចំណូលរបស់ខ្លួនបានធ្លាក់ចុះ​នៅ​តែជាង៣ លានដុល្លារអាមេរិក​​នៅដំណាច់ខែ​មីនា ឆ្នាំ ២០២៤។

​យោងតាមសារព័ត៌មាន Inside Asian Gaming(iag) ក្រុមហ៊ុនកាស៊ីណូ Century Entertainment ដែលជាអតីតវិនិយោគិនម៉ាកាវដែលគេស្គាល់ថាជា Amax International បាន​បានលុបចោលកិច្ចព្រមព្រៀងដែលខ្លួនបានចុះហត្ថលេខាពីមុនជាមួយប្រធាន និងនាយកប្រតិបត្តិរបស់ខ្លួនគឺលោក Ng Man Sun ដើម្បីដំណើរការតុហ្គេម VIP នៅកាស៊ីណូក្នុងប្រទេសកម្ពុជា ហើយបានចុះកិច្ចព្រមព្រៀងថ្មីជំនួសវិញ​ជាមួយម្ចាស់កាស៊ីណូតែម្តងដើម្បីដំណើរការតុ VIP ចំនួនប្រាំពីរ។

​សារព័ត៌មានដដែលបានរំលេចថា ទោះបីជាក្រុមហ៊ុនមិនបានផ្តល់ពេលវេលាសម្រាប់ការចាប់ផ្តើមអាជីវកម្មហ្គេមតុ VIP ថ្មីក៏ដោយ វាបានផ្តល់នូវបច្ចុប្បន្នភាពនៅក្នុងការប្រកាសលទ្ធផលនៃឆ្នាំសារពើពន្ធរបស់ខ្លួនកាលពីថ្ងៃអង្គារ ដោយបង្ហាញពីការរំពឹងទុករបស់ខ្លួនថា​នឹងបើកនៅដើមខែកញ្ញា។

​Century Entertainment ​បាន​លើកឡើង​ថា​៖ «​ដោយ​សម្លឹង​មើល​ទៅ​ហួស​ពី​ប្រទេស​កម្ពុជា ក្រុមហ៊ុន​​នឹង​តាមដាន​យ៉ាង​ដិតដល់​ការ​អភិវឌ្ឍ​នៅ​ក្នុង​ប្រទេស​ថៃ​ដែល​ជា​ប្រទេស​ជិត​ខាង​ដែល​មាន​គម្រោង​ធ្វើ​ឱ្យ​កាស៊ីណូ​ស្របច្បាប់​កំពុង​ដំណើរការ​។ ការណ៍នេះបង្ហាញពីឱកាសដ៏គួរឱ្យទាក់ទាញសម្រាប់ការពង្រីកភូមិសាស្ត្រ ហើយក្រុមហ៊ុននឹងត្រូវបានរៀបចំយ៉ាងល្អដើម្បីសម្របយុទ្ធសាស្រ្តរបស់ខ្លួនស្របតាមការចាប់យកសក្ដានុពលទីផ្សារដែលកំពុងរីកចម្រើន។”

​ក្រុមហ៊ុននេះបានថ្លែងបន្ត​ថា៖«ជាមួយនឹងបន្ទប់ VIP ដែលគ្រោងនឹងបើកនៅដើមខែកញ្ញា ក្រុមហ៊ុនមេមានសុទិដ្ឋិនិយមខ្ពស់ ចំពោះការរួមចំណែកនៃប្រាក់ចំណូលរបស់ខ្លួនដែលចាប់ផ្តើមពីឆមាសទីពីរនៃឆ្នាំ ២០២៤ តទៅ»។

​«ទោះបីជាមានភាពមិនប្រាកដប្រជាដែលកំពុងកើតមានក៏ដោយ ក្រុមហ៊ុនមេនៅតែមានសុទិដ្ឋិនិយម​ ក្នុងការប្តេជ្ញាចិត្តរបស់ខ្លួន​ផ្តល់នូវប្រាក់ចំណេញប្រកបដោយនិរន្តរភាពដល់ម្ចាស់ភាគហ៊ុនរបស់ខ្លួន»។

នៅក្នុងរយៈពេល ៤ ខែឆ្នាំ ២០២៤ គិចាប់ពីខែមរា ដល់ខែមេសា កម្ពុជាទទួលបានភ្ញៀវអន្តរជាតិសរុបចំនួនជាង ២ លាននាក់ ​កើនឡើង ២៣ ភាគរយ បើធៀបនឹងរយៈពេលដូចគ្នាក្នុងឆ្នាំ ២០២៣។ នេះបើយោងតាមរបាយការណ៍របស់ក្រសួងទេសចរណ៍។ ​ ក្នុងចំណោមទេសចរជាង ២ លាននាក់ ទេសចរថៃឈរនៅ​លំដាប់​លេខរៀងទី ១ មានចំនួន ៥៨៨ ៣១២ នាក់ កើន ៣,២ ភាគរយ វៀតណាមចំនួន ៤១៤ ៣៦៦ នាក់ កើន ៤៣ ភាគរយ ចិន ២៦០ ៤៥៥ កើន ៤១,៥ ភាគរយ ឡាវ ១១៧ ៧២៥ កើន ៤៦ ភាគរយ និងអាមេរិក ចំនួន ៨២ ៨៦២ កើន ២០ ភាគរយ៕