អ្នកជំនាញយល់ឃើញខុសគ្នា ជុំវិញការផ្ដល់កម្ចីលើវិស័យអចលទ្រព្យ

អ្នកជំនាញបានអះអាងថា ស្ថានភាពវិស័យអចលនទ្រព្យ និងសំណង់នៅកម្ពុជា មិនទាន់បង្ហាញ​សញ្ញា​ល្អ​ប្រសើរ​​នៅឡើយ​ទេ នៅក្នុងឆ្នាំ ២០២៤នេះ បន្ទាប់ពីឆ្លងកាត់វិបត្តិកូវីដ១៩ ​បញ្ហាសង្គ្រាម និងជម្លោះពាណិជ្ជកម្មរវាងចិន-អាមេរិក។

ស្ថានភាពនេះ ធនាគារជាតិ នៃកម្ពុជាឱ្យស្ថាប័នផ្ដល់​ប្រាក់​​កម្ចីបន្តប្រុងប្រយ័ត្នចំពោះភាព​ទន់​ខ្សោយ​​​​​​​​នៃ​វិស័យអចលនទ្រព្យ ខណៈដែលមានការផ្គត់ផ្គង់​លើសតម្រូវការ ប៉ុន្តែអ្នកជំនាញចង់ឱ្យធនាគារផ្ដល់ឥណទានក្នុងវិស័យនេះទៅវិញ។

លោកបណ្ឌិត គីម ហ៊ាង ប្រធានក្រុមហ៊ុន KW Cambodia និងជាអ្នកវិនិយោគក្នុងវិស័យ​អចលន​ទ្រព្យចង់ឱ្យធនាគារ និងមីក្រូហិរញ្ញវត្ថុ ផ្ដល់ប្រាក់កម្ចីដល់អ្នកដែលវិនិយោគក្នុងវិស័យនេះ ក្នុងគ្រា​ដែល​ស្ថានភាពកំពុងលំបាក។

លោក គីម ហ៊ាង លើកឡើងថា នៅពេលដែលស្ថានភាពមិនសូវល្អ គឺជាពេលវេលា​មួយដែល​ធនាគារ ត្រូវតែ​បញ្ចេញ​លុយជួយ នៅក្នុងប្រទេសជាច្រើនលើពិភពលោក នៅ​ពេលដែល​ធនា​គារដំណើរការល្អគឺមានន័យថាសេដ្ឋកិច្ចដំណើរការហើយ។

លោក គីម ហ៊ាង គាំទ្រ​ឱ្យ​ធនាគារផ្ដល់ឥណទានដល់អ្នកនៅក្នុងវិស័យនេះ ដោយមិន​ត្រូវរឹត​​បន្តឹង​នោះទេ ស្របពេល​ដែលអ្នកវិនិយោគភាគច្រើនកំពុងមានតម្រូវការ។

លោក​ រ័ត្ន សោភ័ណ ប្រធានសមាគមធនាគារនៅកម្ពុជា មានប្រសាសន៍ថា ស្ថាប័នផ្ដល់ប្រាក់កម្ចី នៅតែបន្តផ្ដល់ឥណ​ទាននៅក្នុងវិស័យអចលទ្រព្យនេះ ដោយពិនិត្យអំពីហានិភ័យរបស់វិស័យ និង​ក្រុមហ៊ុនអភិវឌ្ឍនីមួយៗ។ ហើយថា ក្រោយ​មានវិបត្តិសេដ្ឋកិច្ច ធនាគារ មើលស្ថានភាពនៃវិស័យ​អចលនទ្រព្យ និង​ស្ថាន​ភាពអតិថិជន។

លោកបញ្ជាក់ថា ធនាគារដែលជាស្ថាប័នផ្ដល់ប្រាក់កម្ចី បាន​រឹត​បន្តឹង​បន្តិច​លើវិស័យអចលនទ្រព្យ និងសំណង់ ដើម្បីប្រយោជន៍ប្រទេស ក្នុងគ្រាដែលឥណទាន​មិនដំណើរការមានការកើនឡើង ដល់ ៥.៤ ភាគរយ ខណៈប្រាក់ចំណេញរបស់ ធនាគារបានធ្លាក់ចុះជិត ៤០ ភាគរយក្នុងឆ្នាំ ២០២៣។

កាលពីពេលថ្មីៗនេះ លោកស្រី ជា សិរី ទេសាភិបាលធនាគារជាតិនៃកម្ពុជា បានលើកឡើងថា កម្ពុជាត្រូវបន្តប្រុងប្រយ័ត្នចំពោះភាពទន់ខ្សោយនៃវិស័យអចលនទ្រព្យ ដែលមានការផ្គត់ផ្គង់លើសតម្រូវការ ខណៈសន្ទស្សន៍ថ្លៃលំនៅឋាននៅឆ្នាំ ២០២៣ បានថយចុះ ទន្ទឹមនឹងការថមថយលំហូរនៃវិនិយោគផ្ទាល់ពីបរទេសក្នុងវិស័យអចលនទ្រព្យនេះ។

ធនាគារជាតិនៃកម្ពុជា បានព្យាករថា វិស័យសំណង់នៅកម្ពុជានឹងសម្រេចបានកំណើនក្នុងកម្រិតទាប១,១% នៅឆ្នាំក្នុង២០២៤ នេះ ដែលគាំទ្រដោយកំណើនលំហូរទុនវិនិយោគពីបរទេស និងគម្រោងសំណង់ហេដ្ឋារចនាសម្ព័ន្ធ​សាធារណៈ។

ទោះជាយ៉ាង បណ្តាស្ថាប័នហិរញ្ញវត្ថុអន្តរជាតិដូចជាធនានានាបានស្នើឱ្យកម្ពុជា យកចិត្តទុកដាក់ទៅលើការផ្តល់ឥណទានដល់វិស័យនេះសោយសារតែវិស័យនេះហាក់ពុំទាន់មានភាពល្អប្រសើរនៅឡើយ៕

អត្ថបទ៖ ឡេង ដេត