អ្នកនាំពាក្យរង​ក្រសួងការងារ ចាត់ទុកការផ្សាយរបស់សារព័ត៌មានរស់លើដីបរទេសមួយថាជាព័ត៌មានបំពុលសង្គម

តាមរយៈទំព័រហ្វេសប៊ុក នៅថ្ងៃទី២៦ ខែមិថុនា នេះ អ្នកនាំពាក្យរងទី១ ក្រសួងការងារ និងបណ្ដុះបណ្ដាលវិជ្ជាជីវៈ លោកស្រី ឃុន ណៃហៀក បានចាត់ទុកការផ្សាយរបស់សារព័ត៌មាន VOD ដែលជ្រកកោនលើដីបរទេស ថាជាការផ្សាយព័ត៌មានបំពុលសង្គម។ អ្នកនាំពាក្យរងរូបនេះ ចាត់ទុកដូចច្នេះ បន្ទាប់ពីសារព័ត៌មានមួយនេះ ចុះផ្សាយព័ត៌មានមួយដោយដាក់ចំណងជើងថា រដ្ឋាភិបាលថ្មីបន្តប្រើយុទ្ធសាស្ត្រខ្ចីដៃមហាផ្ទៃចងដៃសង្គមស៊ីវិលដែលសកម្មជំរុញយុត្តិធម៌សង្គម។

ឆ្លើយតប នឹងការចុះផ្សាយបែបនេះ លោក​ស្រី ឃុន ណៃហៀក អនុរដ្ឋលេខាធិការក្រសួងការងារ បានអះអាងថា របាយការណ៍ដែលមានភាពត្រឹមត្រូវ គឺការធ្វើរបាយការណ៍ដោយគ្មានភាពលំអៀង ដោយមិនជ្រើសរើសយកតែសហជីពណាដែលមានទំនោរប្រឆាំងរដ្ឋាភិបាល ប្រឆាំងនិយោជកទើបធ្វើការជាមួយ និងមានការសិក្សាបានទូលំទូលាយ ដោយបានជួបសម្ភាសន៍ជាមួយបងប្អូនកម្មករកម្មករ និងសហជីព ក្នុងចំនួនច្រើន ទើបអាចហៅរបាយការណ៍នេះថាមានភាពត្រឹមត្រូវ និងសុក្រឹតភាព។

លោកស្រី បានចំអកថា អង្គការសង្គមស៊ីវិល និង សហជីពឯករាជ្យ មួយចំនួនហាក់បីដូចជាមានតែសកម្មភាពប្រឆាំងនឹងនិយោជក ប្រឆាំងរដ្ឋាភិបាល ហើយបម្រើឱ្យរបៀបវារៈរបស់ជនបរទេស ម្ចាស់ជំនួយមួយចំនួនតែប៉ុណ្ណោះ គឺមិនបានខ្វល់ខ្វាយពីសុខទុក្ខ ជួយដោះស្រាយបញ្ហា បម្រើប្រយោជន៍ជូនកម្មករ ពលករពិតប្រាកដនោះឡើយ៕