ព័ត៌មានអន្ដរជាតិ

ស្ថាប័នរដ្ឋាភិបាលជាង៤០របស់ឥណ្ឌូណេស៊ី រងការវាយប្រហារតាមប្រព័ន្ធអ៊ីនធឺណិត

បានផុស

៣ ខែ មុន

នៅ

ថ្ងៃព្រហស្បតិ៍ ២៧ មិថុនា ២០២៤

ដោយ

មជ្ឈមណ្ឌលទិន្នន័យរបស់ទីភ្នាក់ងាររដ្ឋាភិបាលជាង៤០ស្ថាប័ន របស់ប្រទេសឥណ្ឌូណេស៊ី ត្រូវបានទទួលរងការវាយប្រហារតាមរយៈប្រព័ន្ធអ៊ីនធឺណិត។ នេះបើយោងតាមការប្រកាសរបស់ក្រសួងទំនាក់ទំនងឥណ្ឌូណេស៊ី កាលពីថ្ងៃទី២៦ ខែមិថុនា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការវាយប្រហារថ្មីនេះ គឺជាបទពិសោធន៍ដ៏អាក្រក់បំផុតរបស់ឥណ្ឌូណេស៊ី ដែលមិនធ្លាប់ជួបប្រទះ ក្នុងរយៈពេលប៉ុន្មានឆ្នាំចុងក្រោយ ដែលបានបង្អាក់ដំណើរការសេវាកម្មសំខាន់ៗជាច្រើន ដូចជា សេវាកម្មអន្តោប្រវេសន៍ និងប្រតិបត្តិការមួយចំនួននៅតាមអាកាសយានដ្ឋានធំៗរបស់ឥណ្ឌូណេស៊ី។ ក្រុមអ្នកវាយប្រហារ បានទាមទារប្រាក់ចំនួន ៨លានដុល្លារ ជាថ្នូរដោះដូរនឹងទិន្នន័យរដ្ឋាភិបាល ប៉ុន្តែត្រូវឥណ្ឌូណេស៊ីបដិសេធ។

លោក Usman Kansong មន្ត្រីក្រសួងទំនាក់ទំនងឥណ្ឌូណេស៊ី បានឲ្យដឹងថា ស្ថាប័នរដ្ឋាភិបាលចំនួន ៤៤ ក្នុងនោះមានក្រសួងសំខាន់ៗមួយចំនួន បានក្លាយជាមុខសញ្ញារបស់ក្រុមវាយប្រហារតាមអ៊ីនធឺណិត តាមរយៈការប្រើប្រាស់មេរោគប្រភេទ Ransomware បង្កក់នៅក្នុងកម្មវិធីកុំព្យូទ័រមួយហៅថា Lockbit 3.0។ យ៉ាងណាមិញ បច្ចុប្បន្ន ទិន្នន័យនៅស្ថាប័នចំនួន៥ ដោយក្នុងនោះមានសេវាកម្មអន្តោប្រវេសន៍ និងក្រសួងសម្របសម្រួលផ្នែកវិនិយោគ ត្រូវបានជួយសង្គ្រោះបានវិញ ខណៈនៅសល់ទិន្នន័យក្នុងស្ថាប័នចំនួន៣៩ផ្សេងទៀត កំពុងស្ថិតនៅក្នុងដំណើរការជួយសង្គ្រោះដោយក្រុមអ្នកជំនាញ។ ក្នុងនោះ ទិន្នន័យនៅស្ថាប័នរដ្ឋាភិបាលចំនួន១៨ សង្ឃឹមថានឹងអាចទាញយកមកវិញបាន នៅត្រឹមចុងខែមិថុនា នេះ។

ពាក់ព័ន្ធនឹងបញ្ហាខាងលើ លោក Harlan Wijanarko នាយកក្រុមហ៊ុនរដ្ឋ Telkom Group បានធ្វើសន្និសីទកាសែតមួយរួមគ្នាជាមួយក្រសួងទំនាក់ទំនង ក្នុងគោលបំណងព្យាយាមបកស្រាយឲ្យប្រជាជនឥណ្ឌូណេស៊ីស្ងប់ចិត្ត និងធានាថា ទិន្នន័យរបស់ពួកគេមានសុវត្ថិភាព។ លោកបានពន្យល់ថា ប្រព័ន្ធនៃមជ្ឈមណ្ឌលទិន្នន័យជាតិ ត្រូវបានបិទ និងកាត់ផ្ដាច់ពីប្រភពខាងក្រៅហើយ ដែលគ្មាននរណាអាចលួចចូលទៅបាននោះទេ។

សូមបញ្ជាក់ថា ក្រុមហ៊ុន Telkom Group មានមជ្ឈមណ្ឌលទិន្នន័យសំខាន់ចំនួន២នៅឥណ្ឌូណេស៊ី ដោយមួយស្ថិតនៅរដ្ឋធានីហ្សាការតា និងមួយទៀតនៅទីក្រុងស៊ូរ៉ាបាយ៉ា។ ស្ថាប័នរដ្ឋាភិបាលឥណ្ឌូណេស៊ីទាំងអស់ បានផ្ទុកទិន្នន័យនៅក្នុងមជ្ឈមណ្ឌលទាំង២នេះ។ មជ្ឈមណ្ឌលទិន្នន័យដែលរងការវាយប្រហារថ្មីៗនេះ គឺមជ្ឈមណ្ឌលទិន្នន័យដែលស្ថិតនៅទីក្រុងស៊ូរ៉ាបាយ៉ា៕

ដោយ៖ ឈាង

Related Topics:ប្រទេសឥណ្ឌូណេស៊ី