ព័ត៌មានអន្ដរជាតិ

តៃវ៉ាន់ ព្រមានពលរដ្ឋខ្លួន កុំឲ្យធ្វើដំណើរទៅចិន ខ្លាចត្រូវដាក់ទោសប្រហារជីវិត

បានផុស

៣ ខែ មុន

នៅ

ថ្ងៃសុក្រ ២៨ មិថុនា ២០២៤

ដោយ

Chheang

រដ្ឋាភិបាលតៃវ៉ាន់ បានព្រមានដល់ប្រជាជនខ្លួន ដែលមានបំណងធ្វើដំណើរទៅកាន់ប្រទេសចិន បន្ទាប់ពីក្រុងប៉េកាំង បានប្រកាសអនុវត្តច្បាប់ថ្មីចង់កាត់ទោសប្រហារជីវិតជនផ្ដាច់ខ្លួននិយមតៃវ៉ាន់ កាលពីសប្ដាហ៍មុន។ សេចក្ដីព្រមាននេះ ធ្វើឡើងតាមរយៈលោក Liang Wen-chieh អ្នកនាំពាក្យក្រុមប្រឹក្សាកិច្ចការដីគោកតៃវ៉ាន់ នៅសន្និសីទសារព័ត៌មានមួយ ក្នុងក្រុងតៃប៉ិ កាលពីថ្ងៃទី២៧ ខែមិថុនា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Liang បានប្រាប់ថា បើមិនមានការចាំបាច់បំផុតនោះទេ ប្រជាជនតៃវ៉ាន់មិនត្រូវឆ្លងដែនទៅកាន់ប្រទេសចិន ឬក៏ទីក្រុងដែលកាន់កាប់ដោយចិន ដូចជា ហុងកុង និងម៉ាកាវ នោះឡើយ។ លោក បន្តថា ច្បាប់របស់ចិន បង្ហាញពីការគំរាមកំហែងយ៉ាងធ្ងន់ធ្ងរចំពោះសុវត្ថិភាពប្រជាជនតៃវ៉ាន់ ហើយវាគឺជាការអនុវត្តវិធានការថ្មីមួយប្រឆាំងនឹងតៃវ៉ាន់ បន្ថែមពីលើវិធានការប្រឆាំងដែលកំពុងអនុវត្តកន្លងមក។

លោក Liang បានបញ្ជាក់ថា ការព្រមាននេះ មិនមែនជាការហាមប្រាមដាច់ខាតនោះទេ ប៉ុន្តែវាគ្រាន់តែជាសារក្រើនរំឭកពីសវុត្ថិភាពដល់ប្រជាជនតៃវ៉ាន់ប៉ុណ្ណោះ។

គួរបញ្ជាក់ថា កាលពីថ្ងៃទី២១ ខែមិថុនា ឆ្នាំ២០២៤ រដ្ឋាភិបាលក្រុងប៉េកាំង បានប្រកាសជាផ្លូវការថា សកម្មភាពផ្ដាច់ខ្លួននិយមរបស់តៃវ៉ាន់ គឺជាទោសឧក្រិដ្ឋ ហើយគំរាមដាក់ទោសធ្ងន់ធ្ងរបំផុតគឺ ការព្យួរ ក ប្រហារជីវិត។ ចិន ថា នេះគឺជាការដាក់ទណ្ឌកម្មចំពោះអ្នកគាំទ្រផ្គាប់មុខនូវការផ្ដាច់ខ្លួននិយមទាមទារចង់បានឯករាជ្យរបស់តៃវ៉ាន់ ដែលត្រូវចាត់ទុកជាការប្រព្រឹត្តទោសឧក្រិដ្ឋកម្មនៃការបំបែកខ្លួន និងការញុះញង់ឲ្យផ្ដាច់ខ្លួនចេញពីចិន។

លោក Lai Ching-te ប្រធានាធិបតីតៃវ៉ាន់ (រូបភាព៖ AP)

លោក Chang Wu-yueh អ្នកជំនាញការទំនាក់ទំនងច្រកសមុទ្រតៃវ៉ាន់នៅសកលវិទ្យាល័យ Tamkang នៃក្រុងតៃប៉ិ បានលើកឡើងថា ការប្រកាសរបស់ចិន មានគោលបំណងធំៗចំនួន៣ ដូចជា៖ ១.ចិនចង់ប្រកាសប្រាប់ប្រជាជនខ្លួនថារដ្ឋាភិបាលកំពុងតែប្រឆាំងនឹងការចង់បានឯករាជ្យរបស់តៃវ៉ាន់ ២.ចិនចង់ប្រកាសប្រាប់អន្តរជាតិថា ខ្លួនមានយុត្តាធិការលើតៃវ៉ាន់ និង៣.ចិនចង់គំរាមប្រជាជនតៃវ៉ាន់។ អ្នកជំនាញការរូបនេះ ក៏បានព្រមានប្រជាជនតៃវ៉ាន់ផងដែរឲ្យប្រុងប្រយ័ត្ន នៅរាល់ពេលចាកចេញទៅក្រៅប្រទេស ជាពិសេសគឺប្រទេសដែលមានកិច្ចព្រមព្រៀងបត្យាប័នជាមួយចិន។

ពាក់ព័ន្ធនឹងច្បាប់នេះ លោក Lai Ching-te ប្រធានាធិបតីតៃវ៉ាន់ បានប្រកាសកាលពីថ្ងៃទី២៤ ខែមិថុនា ថា ចិនគ្មានសិទ្ធិអ្វីនោះទេ ដែលអាចមកដាក់ទោសប្រជាជនតៃវ៉ាន់។ មេដឹកនាំតៃវ៉ាន់ បាននិយាយថា ប្រជាធិបតេយ្យមិនមែនជាទោសឧក្រិដ្ឋកម្មទេ តែអ្វីដែលគួរឲ្យខ្លាចបំផុតគឺ អត្តាធិបតេយ្យរបស់ចិនទៅវិញ។ លោក Lai បានបន្តថា ចិនគ្មានឯណានូវសិទ្ធិអំណាចអាចដាក់ទោសឆ្លងដែនលើប្រជាជនតៃវ៉ាន់ជាដាច់ខាត៕

ដោយ៖ ឈាង