រថភ្លើងបុកឡានក្រុងនៅស្លូវ៉ាគី ស្លាប់និងរបួសមនុស្សជាង ១០នាក់

យោងតាមការចេញផ្សាយរបស់ទីភ្នាក់ងារពត៌មាន​ AP នៅថ្ងៃទី​ ២៨ ខែ មិថុនា​បាន្យដឹងថា រថភ្លើងដែលធ្វើដំណើរពីរដ្ឋធានី Prague របស់ប្រទេសឆែក ទៅកាន់រដ្ឋធានី Budapest ប្រទេសហុងគ្រី បានបុកជាមួយរថយន្តក្រុង នៅភាគខាងត្បូងប្រទេសស្លូវ៉ាគី ដោយបណ្តាលឲ្យមនុស្សចំនួន៧នាក់ស្លាប់ និង៥នាក់ទៀតរងរបួស។

អំឡុងពេលកើតហេតុមានមនុស្សប្រហែល ២០០នាក់នៅលើរថភ្លើង Eurocity ដែលស្ថិតនៅជិតទីក្រុង Nove Zamky។ អ្នកស្លាប់ទាំងអស់ គឺជាអ្នកដំណើរលើរថយន្តក្រុង ខណៈគ្មានអ្នកស្លាប់នៅលើរថភ្លើងនោះទេ។

គួរបញ្ជាក់ថាផ្លូវរថភ្លើងនេះជាផ្លួដ៏សំខាន់ដែលតភ្ជាប់រដ្ឋធានី Bratislava របស់ប្រទេសស្លូវ៉ាគី ជាមួយនឹងទីក្រុង Budapest ប្រទេសហុងគ្រី ។បន្ទាប់ពីកើតហេតុផ្លូវនេះត្រូវបានបិទបណ្ដោះអាសន្ន ខណៈអ្នកដំណើរដែលជាប់គាំងនៅលើរថភ្លើងរងគ្រោះ ត្រូវបានដឹកតាមឡានក្រុងទៅកាន់ទីក្រុង Sturovo ជាប់ព្រំដែនហុងគ្រី។

ភ្លាមៗ​នោះ​គេ​មិន​ទាន់​ដឹង​ច្បាស់​ពី​មូលហេតុ​នៃ​ការបុកគ្នានេះនោះ​ទេ ដោយ​សមត្ថកិច្ច​កំពុង​ស៊ើបអង្កេតនៅឡើយ៕

អត្ថបទ៖ ប៊ុន សុភាព