វីដេអូរន្ធត់! ប៉ូលិសរុស្ស៊ី បង្អួតជំនាញខុសបច្ចេកទេស ត្រូវរថយន្តកិនពីលើ

វីដេអូរន្ធត់ដែលផ្សាយដោយ Daily Mail កាលពីថ្ងៃសុក្រទី២៨ខែមិថុនាឆ្នាំ២០២៤ បានបង្ហាញឲ្យឃើញ ប៉ូលិសរុស្ស៊ី ត្រូវរថយន្តកិន ពេលកំពុងសម្តែងបង្អួតទេពកោសល្យលើទីលានមួយក្នុងតំបន់ Ivanteevka នៃទីក្រុង មូស្គូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍ ប៉ូលិសចរាចរណ៍រូបនេះមានឈ្មោះ Alexei អាយុ៤៨ឆ្នាំ ត្រូវរថយន្តម៉ាក Ford Focus កិនពីលើ ខណៈពេលកំពុងបង្ហាញទស្សនីយភាព បើកកង់ពីរឆ្លងកាត់។

ក្នុងវីដេអូ គេឃើញរថយន្ត បើកកង់ពីរ ហើយពេលមកដល់កន្លែងប៉ូលិសដេក ស្រាប់តែធ្លាក់កិនពីលើក្បាលមានពាក់មួកការពារ ហើយអូសប៉ូលិសទៅជាមួយតែម្តង។

ការភ្លាត់ស្នៀតនេះ ធ្វើឲ្យទស្សនិកជន ស្រែកទាំងភាពតក់ស្លុត ប៉ុន្តែជាសំណាងល្អដែរ ដែលប៉ូលិសរូបនេះគ្រាន់តែរងរបួសប៉ុណ្ណោះ មិនគ្រោះថ្នាក់ដល់ជីវិតទេ ព្រោះតែរថយន្ត បើកបរក្នុងល្បឿនយឺតៗ។

ភ្លាមៗក្រោយហេតុការណ៍, ប៉ូលិសចរាចរណ៍ត្រូវបានបញ្ជូនទៅមន្ទីរពេទ្យ ជាមួយការរងរបួសបាក់ជើង ដាច់ម្រាមដៃ និងរបួសខ្នង។

យ៉ាងណាក្តី គេមិនដឹងឡើយថាតើ អ្នកបើកបររថយន្ត Ford Focus នឹងប្រឈមមុខនឹងការពិន័យដែរឬទេ៕

សូមទស្សនាវីដេអូ៖

អត្ថបទ៖ សុខ សុវណ្ណ