ព័ត៌មានអន្ដរជាតិ

ព្យុះភ្លៀងវាយប្រហារខេត្តភាគខាងកើតប្រទេសចិន បង្ខំឲ្យជម្លៀសមនុស្សជាង ១៩ម៉ឺននាក់

បានផុស

៣ ខែ មុន

នៅ

ថ្ងៃអង្គារ ២ កក្កដា ២០២៤

ដោយ

តាមការចេញផ្សាយរបស់សារពត៌មាន CGTN កាលពីថ្ងៃទី០២ ខែកក្កដាឆ្នាំ២០២៤, ព្យុះភ្លៀងនៅក្នុងខេត្ត Anhui ភាគខាងកើតប្រទេសចិន បានបណ្តាលឲ្យអ្នកស្រុកចំនួន ៨១១ ០០០ រងផលប៉ះពាល់ និងបង្ខំឱ្យជម្លៀសមនុស្សចំនួន ១៩៥ ០០០នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកដ្ឋានគ្រប់គ្រងគ្រាអាសន្នខេត្តបានឲ្យដឹងថា ព្យុះភ្លៀងបានបង្កការបំផ្លិចបំផ្លាញក្នុងស្រុកចំនួន ៣៥ ក្នុងទីក្រុងចំនួន ៦ ខណៈកម្រិតទឹកទន្លេ Yangtze ដែលជាទន្លេវែងបំផុតរបស់ប្រទេសចិន បានឡើងលើសសញ្ញាព្រមានដល់ ២០ ម៉ែត្រទៅហើយ ហើយនៅតែបន្តកើនឡើងទៀត។

មិនត្រឹមប៉ុណ្ណឹង ភ្លៀងធ្លាក់ខ្លាំងក៏រុញកម្ពស់ទឹក ឲ្យឡើងលើសពីកម្រិតប្រកាសអាសន្ននៅក្នុងទន្លេចំនួន ១៩ ផ្សេងទៀតក្នុងខេត្តនេះផងដែរ។

គួរបញ្ជាក់ថា ភ្លៀងធ្លាក់យ៉ាងគំហុកបានវាយប្រហារពាសពេញខេត្តនេះតាំងពីថ្ងៃអាទិត្យមក ដោយមានស្ថានីយ៍ចំនួន ២៥៨ បានទទួលទឹកភ្លៀងលើសពី១០០ មិល្លីម៉ែត្រ។ ដើម្បីឆ្លើយតបជាបន្ទាន់ចំពោះព្យុះភ្លៀង និងទឹកជំនន់ អាជ្ញាធរនៅក្នុងទីក្រុងចំនួនប្រាំបីក្នុងទីក្រុង Anhui រួមទាំងទីក្រុងចំនួន ៥នៅតាមដងទន្លេ Yangtze ផងដែរ បានបញ្ជូនកម្លាំងសរុប២៦ ០០០នាក់ទៅល្បាតនិងជម្លៀសប្រជាជនចេញ។

លើសពីនេះរដ្ឋាភិបាលក៏បានបង្កើនកម្រិតឆ្លើយតបគ្រោះទឹកជំនន់ដល់កម្រិតទី ៣នៅក្នុងខេត្ត Anhui, Jiangxi, Hubei និង Hunan ផងដែរ ហើយថែមបញ្ជូនក្រុមការងារជាបន្ទាន់ ដើម្បីពន្លឿនកិច្ចខិតខំប្រឹងប្រែងជួយសង្គ្រោះក្នុងទឹកជំនន់ទៀតផង។

ស្របពេលជាមួយគ្នានេះ ក្រសួងហិរញ្ញវត្ថុរបស់ប្រទេសចិនកាលពីថ្ងៃអាទិត្របានប្រកាសថា រដ្ឋាភិបាលបានត្រៀមថវិកាចំនួន៤៥លានយ័ន (ប្រហែល ៦.៣១ លានដុល្លារអាមេរិក) ដើម្បីស្តារផ្លូវថ្នល់ដែលត្រូវបានបំផ្លាញដោយទឹកជំនន់នៅ Anhui, Hubei, Chongqing និង Heilongjiang ៕