តុលាការសម្រេចឃុំខ្លួនឃាតកដែលច្របាច់កសម្លាប់សង្សារដោយសារភ្លើងប្រចណ្ឌ

ចៅក្រមស៊ើបសួរសាលាដំបូងរាជធានីភ្នំពេញ លោកស្រី គឹម សុគន្ធា នៅព្រឹកថ្ងៃទី៣ ខែកក្ដដា ឆ្នាំ២០២៤នេះ បានចេញដីកាសម្រេចឃុំខ្លួនឃាតកដែលសម្លាប់សង្សារព្រោះប្រចណ្ឌ ដាក់ពន្ធនាគារជាបណ្ដោះអាសន្ន ក្រោមការចោទប្រកាន់ពីបទ «ឃាតកម្ម » ( យកដៃច្របាច់កសម្លាប់ ) តាមមាត្រា១៩៩ នៃក្រមព្រហ្មទណ្ឌ។

ជនដៃដល់ដែលតុលាការសម្រេចឃុំខ្លួននេះឈ្មោះ ចាន់ ដាលីន អាយុ២៣ឆ្នាំ ជនជាតិខ្មែរ មុខរបរបុគ្គលិកភោជនីយ៍ដ្ឋាន ស៊ីក នេតឈ័រ កូហ្វីលអេនផាប។

សូរំលឹកថា អំពើឃាតកម្មនោះបានកើតឡើងកាលពីយប់ថ្ងៃទី២៣ ខែមិថុនា ឆ្នាំ២០២៤ នៅចំណុចបន្ទប់ជួលគ្មានលេខជាន់ទី១ ទីតាំលេខ២៣ ផ្លូវលេខ២៨៧ ភូមិ១១ ក្រុម៤១ សង្កាត់បឹងកក់១ ខណ្ឌទួលគោគ រាជធានីភ្នំពេញ ដែលបង្កដោយជនល្មើសច្របាច់កសម្លាប់សង្សាខ្លួនឯង។

ក្រោយកើតហេតុ កម្លាំងនាយកដ្ឋាននគរបាលព្រហ្មទណ្ឌ បានសហការស្រាវជ្រាវជាមួយកម្លាំងស្នងការដ្ឋាននគរបាលរាជធានីភ្នំពេញ និងស្នងការដ្ឋាននគរបាលខេត្តសៀមរាប ក្រោមការសម្របសម្រួលពីតំណាងអយ្យការអមសាលាដំបូងរាជធានីភ្នំពេញ និងតំណាងអយ្យការអមសាលាដំបូងខេត្តសៀមរាប បានកំណត់ទីតាំងលាក់ខ្លួន និងឈានដល់ការចាប់ខ្លួន នៅយប់ថ្ងៃទី២៨ ខែមិថុនា ឆ្នាំ២០២៤ នៅចំណុចមុខវិទ្យាល័យអង្គរ ក្រុងសៀមរាប ខេត្តសៀមរាបតែម្ដង។

ជនល្មើសឈ្មោះ ចាន់ ដាលីន បានសារភាពថា មូលហេតុដែលខ្លួនសម្លាប់សង្សារព្រោះរឿងប្រចណ្ឌប៉ុណ្ណោះ។ដោយឡែក សពជនរងគ្រោះឈ្មោះ សួន មករា ភេទស្រី អាយុ២៣ឆ្នាំ ជនជាតិខ្មែ មុខរបរបុគ្គលិកភោជនីយ៍ដ្ឋាន ស៊ីក នេតឈ័រ កូហ្វីលអេនផាប ទីលំនៅស្នាក់នៅបន្ទប់កើតហេតុខាងលើជាមួយគ្នា។ មាត្រា១៩៩នៃក្រមព្រហ្មទណ្ឌបានចែងនិងកំណត់អោយផ្ដន្ទាទោសជនត្រូវចោទដាក់ពន្ធនាគារពី១០ ទៅ ១៥ឆ្នាំ៕

អត្ថបទ៖ មករា