ព័ត៌មានជាតិ

ឯកឧត្ដម ហ៊ុន ម៉ានី ៖ រាល់ការប្រមាថ ព្រះមហាក្សត្រ ក្នុងទម្រង់ ឬ រូបភាពណាក៏ដោយ ប្រៀបបាននឹងការប្រមាថប្រទេសជាតិ និងប្រជាជន

បានផុស

៥ ខែ មុន

នៅ

ថ្ងៃពុធ ៣ កក្កដា ២០២៤

ដោយ

ឯកឧត្ដម ហ៊ុន ម៉ានី ប្រធានសហភាពសហព័ន្ធយុវជនកម្ពុជា សង្កត់ធ្ងន់ថា រាល់ការប្រមាថព្រះមហាក្សត្រ ក្នុងទម្រង់ ឬ រូបភាពណាក៏ដោយ គឺ ប្រៀបបាននឹងការប្រមាថប្រជាជន និងប្រទេសជាតិទាំងមូល ដែលយុវជនកម្ពុជាមិនអាចទទួលយកបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសង្កត់ធ្ងន់នេះ ក្នុងឱកាស ឯកឧត្ដម ហ៊ុន ម៉ានី បានអញ្ជើញជាអធិបតីក្នុងពិធីប្រកាសទទួលស្គាល់សមាសភាពអនុប្រធាន និងសមាជិក-សមាជិកា គណៈកម្មាធិការ ស.ស.យ.ក ខេត្តស្វាយរៀង កាលពីព្រឹកថ្ងៃទី ៣ ខែកក្កដា ឆ្នាំ ២០២៤ នៅសាកលវិទ្យាល័យស្វាយរៀង។

នាឱកាសនោះដែរ ឯកឧត្ដម ហ៊ុន ម៉ានី បានចែករំលែកជាមួយសមាជិក-សមាជិកា ស.ស.យ.ក ដោយរំឭកអំពីបុព្វហេតុ ប្រវត្តិ នៃការបង្កើតសហភាពសហព័ន្ធយុវជនកម្ពុជា និងអ្វីដែលសមាជិក-សមាជិកា គ្រប់រូប ត្រូវប្រកាន់ខ្ជាប់ក្នុងការចូលរួមជួយសង្គម ក៏ដូចជាការចងចាំនូវប្រវត្តិសាស្ត្រជាមេរៀនមិនអាចខ្វះបាន ជាពិសេសតម្លៃ នៃសុខសន្តិភាព។

ផ្សារភ្ជាប់ការលើកឡើងខាងលើ ឯកឧត្ដម ហ៊ុន ម៉ានី បានគូសបញ្ជាក់ទៅកាន់អង្គពិធីអំពីសកម្មភាពចម្បងក្នុងនាមយុវជនកម្ពុជា ត្រូវឈឺឆ្អាល និងរួមគ្នាការពារនោះ គឺ ប្រជាជាតិ និងប្រជាជន ដោយឯកឧត្ដម សង្កត់ធ្ងន់ថា «រាល់ការប្រមាថព្រះមហាក្សត្រ ក្នុងទម្រង់ ឬ រូបភាពណាក៏ដោយ គឺ ប្រៀបបាននឹងការប្រមាថប្រជាជន និងប្រទេសជាតិទាំងមូល ដែលយុវជនកម្ពុជាមិនអាចទទួលយកបាន»។

ទន្ទឹមនោះដែរ ឯកឧត្ដម ហ៊ុន ម៉ានី ក៏បានថ្លែងអំណរគុណ និងកោតសរសើរចំពោះថ្នាក់ដឹកនាំ និងសមាជិក-សមាជិកា ស.ស.យ.ក ខេត្តស្វាយរៀងទាំងអស់ ដែលបានលះបង់ កម្លាំងកាយ ចិត្ត ប្ដេជ្ញាបន្តចូលរួមយ៉ាងសកម្មជាមួយក្រុមគ្រួសារសហភាពសហព័ន្ធយុវជនកម្ពុជា នាពេលកន្លងមក និងមកទល់បច្ចុប្បន្ន។

គួរជម្រាបថា ពិធីប្រកាសទទួលស្គាល់សមាសភាពអនុប្រធាន និងសមាជិក-សមាជិកា គណៈកម្មាធិការ ស.ស.យ.ក ខេត្តស្វាយរៀង នេះ ក៏មានការអញ្ជើញចូលរួមពីសំណាក់ ឯកឧត្ដម ឌី វិជ្ជា អនុប្រធាន ស.ស.យ.ក និងជាប្រធាន ស.ស.យ.ក ខេត្តស្វាយរៀង ឯកឧត្ដម ម៉ែន វិបុល ប្រធានក្រុមប្រឹក្សាខេត្ត ឯកឧត្ដម ប៉េង ពោធិ៍សា អភិបាល នៃគណៈអភិបាលខេត្តស្វាយរៀង ឯកឧត្ដមសកលវិទ្យាធិការ រួមទាំងសមាជិក-សមាជិកា ស.ស.យ.ក ខេត្តស្វាយរៀង សរុបប្រមាណ ៤៣៥ រូប ផងដែរ៕