ព័ត៌មានអន្ដរជាតិ

អ្នកជំនាញ៖ អាជីវកម្មថៃកំពុងប្រឈមមុខនឹងវិបត្តិ ធ្ងន់ធ្ងរជាងអំឡុងវិបត្តិកូវីដ១៩

បានផុស

៣ ខែ មុន

នៅ

ថ្ងៃពុធ ៣ កក្កដា ២០២៤

ដោយ

សមាគមទីផ្សារនៃប្រទេសថៃ បានសម្ដែងការព្រួយបារម្ភនាថ្ងៃពុធនេះថា កត្តាផ្សេងៗគ្នាទាំងក្នុង និងក្រៅស្រុក បានធ្វើឱ្យអាជីវកម្មថៃធ្លាក់ចូលទៅក្នុងវិបត្តិ ដែលធ្ងន់ធ្ងរជាងអំឡុងពេលវិបត្តិកូវីដ១៩ទៅទៀត។ នេះបើតាមការចុះផ្សាយរបស់កាសែត The Nation។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានសមាគម លោក Buranin Rattanasombat បានព្រមានថា ប្រតិបត្តិករអាជីវកម្មរំពឹងថានឹងប្រឈមមុខនឹងបញ្ហាបែបនេះរហូតដល់ឆ្នាំក្រោយ ដោយលើកឡើងយ៉ាងដូច្នេះថា៖ «ការប្រែប្រួលនៃបច្ចេកវិទ្យា ការបែងចែកគ្នា និងការធ្លាក់ចុះសេដ្ឋកិច្ច បានបង្កឱ្យមានការលំបាកក្នុងការផលិត» ខណៈការធ្លាក់ចុះនៃអំណាចទិញដោយសារការកើនឡើងបំណុលគ្រួសារ ក៏ប៉ះពាល់ដល់ប្រតិបត្តិការអាជីវកម្មផងដែរ។

ចំពេលស្ថានភាពសេដ្ឋកិច្ចអាប់អួរ លោក Buranin បាននិយាយថា វិស័យអាជីវកម្មនឹងប្រសើរឡើងវិញ ប្រសិនបើអត្រាការប្រាក់ទាបជាងអត្រាបច្ចុប្បន្ន មានការងើបឡើងវិញបន្ថែមទៀតនៃវិស័យទេសចរណ៍ និងការចំណាយថវិការបស់រដ្ឋាភិបាលជាដើម។

ជាទស្សនវិស័យ លោក Buranin បាននិយាយថា វិស័យអាជីវកម្មនឹងរងផលប៉ះពាល់ដោយការប្រែប្រួលយ៉ាងឆាប់រហ័សនៃបច្ចេកវិទ្យា ក្នុងរយៈពេលពី ៥ ទៅ ១០ ឆ្នាំខាងមុខ ខណៈការបែងចែកគ្នាទូទាំងពិភពលោក នឹងធ្វើឱ្យបញ្ហានេះកាន់តែធ្ងន់ធ្ងរទៅៗ។ លោកបន្តថា បញ្ញាសិប្បនិមិត្ត (AI) អ៊ិនធឺរណិតនៃវត្ថុ (IoT) ការផលិតដែលមិនប៉ះពាល់ដល់បរិស្ថាន និងបច្ចេកវិទ្យាជីវសាស្រ្ត នឹងដើរតួយ៉ាងសំខាន់ក្នុងប្រតិបត្តិការអាជីវកម្ម។

បន្ថែមពីលើការរំពឹងទុកនេះ លោកបានព្យាករណ៍ថា អ្នកប្រើប្រាស់នឹងចូលចិត្តការទិញឥវ៉ាន់អនឡាញជាជាងការទៅហាងដោយផ្ទាល់ ហើយអ្នកលក់រាយនឹងលក់ផលិតផលទាំងដោយផ្ទាល់ និងតាមអនឡាញ ដោយបង្កើតវេទិកាអនឡាញរបស់ពួកគេ។ លោកបន្តថា៖ «សំណួរសម្រាប់សមាគម គឺធ្វើដូចម្តេចដើម្បីឱ្យអាជីវកម្មថៃអាចសម្របខ្លួនបាន និងលើកទឹកចិត្តសហគ្រិនខ្នាតតូច ឱ្យទទួលយកបច្ចេកវិទ្យាដើម្បីបង្កើនការប្រកួតប្រជែង»៕

Related Topics: