ទាហាន​អ៊ីស្រាអែល ​ត្រូវចាក់​សម្លាប់​នៅ​ផ្សារ​ទំនើប

យោងតាមការចេញផ្សាយរបស់សារពត៌មាន Al Jazeera នៅថ្ងៃទី ០៤ ខែ កក្កដា, ទាហានអ៊ីស្រាអែលម្នាក់ត្រូវបានចាក់ច្រើនកាំបិតស្លាប់ ចំណែកម្នាក់ទៀតរងរបួសក្នុងការវាយប្រហារនៅផ្សារទំនើបភាគខាងជើងប្រទេសអ៊ីស្រាអែល ខណៈជនសង្ស័យត្រូវបានបាញ់សម្លាប់។

ការវាយប្រហារនេះ កើតឡើងកាលពីថ្ងៃពុធទី៣ខែកក្កដា នៅជាន់ទី២នៃផ្សារទំនើប Hutzot Karmiel ក្នុងទីក្រុង Karmiel។

ជនសង្ស័យមិនត្រូវបានគេបញ្ចេញឈ្មោះឡើយ ប៉ុន្តែគេអះអាងថាជាពលរដ្ឋប៉ាឡេស្ទីន រស់នៅអ៊ីស្រាអែល មកពីទីក្រុង Nahf។ ទន្ទឹមនោះ ប៉ូលិសអ៊ីស្រាអែលក៏បានចាប់ខ្លួនសមាជិកនៃគ្រួសារជនសង្ស័យ រួមទាំងម្តាយ បងប្រុស និងបងស្រីផងដែរ ហើយកំពុងបើកការស៊ើបអង្កេតឧប្បត្តិហេតុនេះ ដើម្បីបញ្ជាក់ថាតើវាជាការវាយប្រហារភេរវកម្មឫក៏យ៉ាងណា

គួរបញ្ជាក់ថា អាជ្ញាធរអ៊ីស្រាអែលថ្មីៗនេះបានអនុម័តការរឹបអូសយកដីទំហំ ១២.៧ គីឡូម៉ែត្រការ៉េ នៅតំបន់ West Bank ដែលជាកាន់កាប់ធំបំផុតក្នុងរយៈពេលជាង ៣ ទសវត្សរ៍។ ចាប់តាំងពីដើមឆ្នាំមក អ៊ីស្រាអែលបានប្រកាសថា ផ្ទៃដី ២៣.៧ គីឡូម៉ែត្រការ៉េ នៅក្នុងទឹកដីប៉ាឡេស្ទីនជាដីរបស់ខ្លួន៕

អត្ថបទ៖ ប៊ុន សុភាព