ជីវិតកម្សាន្ដ

អ្នកដឹកនាំរឿង “JailBreak” បង្ហើបបំណងចាយទុនវិនិយោគផលិតភាពយន្តខ្មែរបែប Action Film

បានផុស

៣ ខែ មុន

នៅ

ថ្ងៃសុក្រ ៥ កក្កដា ២០២៤

ដោយ

នេះពិតជាដំណឹងដ៏ចាប់អារម្មណ៍ថ្មីទៀតហើយសម្រាប់អ្នកគាំទ្រ និងមហាជនខ្មែរទៅលើវិស័យភាពយន្ត ខណៈដែលលោក Jimmy អ្នកដឹកនាំរឿង “JailBreak”បានបង្ហើបពីគោលបំណងចាយទុនផលិតរឿងខ្មែរបែបវាយតប់ថ្មី (Action Film) នៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គេនៅចាំបានថា ខ្សែភាពយន្តបែបវាយប្រហារខ្នាតធំដំបូងបង្អស់នៅកម្ពុជាដែលមានចំណងជើងថា «Jailbreak» ឬ«ការពារឧក្រិដ្ឋជន» ដឹកនាំសម្ដែងដោយលោកJimmyកន្លងមកគឺ ទទួលបានការគាំទ្រយ៉ាងខ្លាំងពីសំណាក់ទស្សនិកជនទាំងនៅក្នុងស្រុក និងនៅក្រៅប្រទេសផងដែរ។

ប្រាកដណាស់ភាពយន្តបែបវាយប្រហាររឿង «Jailbreak» ឬ «ការពារឧក្រិដ្ឋជន» ជាខ្សែភាពយន្តខ្មែរខ្នាតធំបែបប្រយុទ្ធដោយប្រើក្បាច់គុណបុរាណខ្មែរ ល្បុក្កតោ និងជារឿងធំប្រចាំដើមឆ្នាំ២០១៧ នៅក្នុងវិស័យភាពយន្តរបស់កម្ពុជាដែលទទួលបានការគាំទ្រយ៉ាងផុលផុស។

ដោយឡែកថ្មីៗនេះ ក៏មានប្រភពពីតួអង្គសម្តែងល្បីឈ្មោះលោក សាវិន ហ្វីលីព បានបង្ហើបមកថា អ្នកដឹកនាំរឿងJailBreakលោក Jimmy បាននឹងកំពុងសិក្សាចាយទុកដើម្បីផលិតរឿងបែបវាយតប់ថ្មី(Action Film) នៅក្នុងប្រទេសកម្ពុជាជាថ្មី។ លោកមិនបានបញ្ជាក់ទេថា រឿងនេះនឹងចាប់ផ្តើមដំណើរការពេលណានៅឡើយទេ។

តារាសម្តែងលោក សាវិន ហ្វីលីព បានប្រាប់ឲ្យដឹងថា «លោក Jimmy អ្នកដឹកនាំរឿង JailBreakកំពុងស្វែងរកអ្នកចាប់អារម្មណ៍ដាក់ទុនវិនិយោគផលិតភាពយន្តខ្មែរបែបវាយតប់ថ្មី (Action Film) នៅកម្ពុជា។ ខ្ញុំធានាថា ភាពយន្តរបស់គាត់ពិតជាមានគុណភាព អ្នកចាប់អារម្មណ៍អាចInboxខ្ញុំបាន»។

លោក សាវិន ហ្វីលីព បានបញ្ជាក់បន្ថែមទៀតថា “២០២១៧ ក្នុងភាពយន្តខ្មែរបែបវាយតប់( Action film) កំរិតអន្តរជាតិរឿង “JailBreak ការពារឧក្រិដ្ឋជន” ត្រូវបានទទួលស្គាល់ដោយHollywood។ ទោះបីយ៉ាងណា អ្នកគាំទ្រសង្ឃឹមថា ភាពយន្តថ្មីនេះនឹងទទួលបានការលើកទឹកចិត្តព្រមទាំងគាំទ្រច្រើនពីមហាជន៕

អត្ថបទ៖ ចាន់រ៉ា