ត្រឹម៣ខែ មនុស្ស ៣៧ នាក់ ត្រូវខ្លាឃ្មុំវាយប្រហារ នៅជប៉ុន

ត្រឹមរយៈពេល៣ខែប៉ុណ្ណោះ ពោលគឺចាប់ពីខែមេសាដល់មិថុនា មនុស្សចំនួន៣៧នាក់ក្នុងខេត្តចំនួន ១៦ ត្រូវបានវាយប្រហារដោយខ្លាឃ្មុំព្រៃ ហើយក្នុងនោះ មានពីរនាក់ត្រូវបាត់បង់ជីវិត។ នេះបើយោងតាមការចេញផ្សាយរបស់ទូរទស្សន៍ជាតិជប៉ុននៅថ្ងៃទី​០៥ ខែ កក្កដា។

កាលពីឆ្នាំ ២០២៣ អាជ្ញាធរជប៉ុនក៏បានឲ្យដឹងដែរថា មនុស្សចំនួន ៣៩ នាក់ ត្រូវបានវាយប្រហារដោយខ្លាឃ្មុំ ខណៈនៅឆ្នាំ២០១៧ គឺមានសត្វខ្លាឃ្មុំវាយប្រហារមនុស្សច្រើនបំផុតរហូតដល់៤០នាក់ ហើយនៅក្នុងឆ្នាំ២០២៤នេះ តួលេខអាចនឹងកើនឡើងលើសឆ្នាំមុនៗ ទៅទៀត។

យោងតាមក្រសួងបរិស្ថានជប៉ុន, រដ្ឋាភិបាលក្រុងទូទាំងប្រទេស បានទទួលរបាយការណ៍បន្ថែមទៀតអំពីការរកឃើញសត្វខ្លាឃ្មុំ និងដានជើងច្រើនជាងអ្វីដែលពួកគេទទួលបានក្នុងឆ្នាំធម្មតា។ ជាក់ស្តែងនៅខែមេសា និងឧសភា រដ្ឋាភិបាលក្នុងតំបន់បានទទួលរបាយការណ៍ចំនួន ៣ ០៣២ ដែលកើនឡើងជិត ៥០០ ពី ២ ៥៦៧ បើធៀបនឹងឆ្នាំមុន។

​អាជ្ញាធរក៏ព្រមាន អ្នក​ស្រុកអំពីផលប៉ះពាល់ដែល​អាច​កើត​មាន​ដូច​ជា​ផលដំណាំរបស់ពួកគេផងដែរ ខណៈខេត្តមួយចំនួន ចាប់ពីហុកកៃដូ រហូតដល់ភាគកណ្តាលប្រទេសជប៉ុន បាននិងកំពុងចេញការព្រមានអំពីសត្វខ្លាឃ្មុំ។ លើសពីនេះ ក្រុមមន្ត្រី​បាន​ណែនាំ​ប្រជាជន ​ឱ្យ​តាមដានព័ត៌មាន​អំពី​​សត្វ​ខ្លាឃ្មុំនៅ​លើ​គេហទំព័រ​របស់​ខេត្ត ដើម្បី​ចៀសវាង​ការ​ជួប​ខ្លាឃ្មុំ ដែលអាចបង្កឲ្យមានគ្រោះថ្នាក់៕

អត្ថបទ៖ ប៊ុន សុភាព