កីឡា

ជឺជីតស៊ូកម្ពុជាឈ្នះមេដាយ២១គ្រឿងពីការប្រកួតតំបន់អាស៊ាន

បានផុស

៧ ខែ មុន

នៅ

ថ្ងៃចន្ទ ៨ កក្កដា ២០២៤

ដោយ

ក្រុមកីឡាជឺជីតស៊ូជម្រើសជាតិកម្ពុជាបានឈ្នះមេដាយចំនួន២១គ្រឿងពីការប្រកួតកីឡាជឺជីតស៊ូជើងឯកអាស៊ីអាគ្នេយ៍ ដែលបានបញ្ចប់ទៅកាលពីថ្ងៃអាទិត្យ ទី៧ ខែកក្កដា ឆ្នាំ២០២៤ នៅប្រទេសឥណ្ឌូណេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សហព័ន្ធកីឡាជឺជីតស៊ូកម្ពុជាបានបញ្ជូនកីឡាករ កីឡាការិនីចំនួន១២រូបចូលរួមប្រកួតនៅថ្ងៃទី៧-៨ ខែកក្កដា ឆ្នាំ២០២៤ នៅកោះបាលី ប្រទេសឥណ្ឌូណេស៊ី។ ជាលទ្ធផល ក្រុមជឺជីតស៊ូកម្ពុជាបានឈ្នះមេដាយមាស៩គ្រឿង ប្រាក់៤គ្រឿង និងសំរិទ្ធ៨គ្រឿង សរុប២១គ្រឿង។

ការប្រកួតកីឡាជឺជីតស៊ូតំបន់អាស៊ាន ASIAN Regional Championship Southeast Asia មានប្រទេសចំនួន៦ចូលរួមប្រកួតដោយមានកីឡាករ កីឡាការិនីសរុបចំនួន២៥៨នាក់។

លោក ថោង បញ្ញាធន អនុប្រធានសហព័ន្ធជឺជីតស៊ូកម្ពុជា បានឲ្យដឹងថា សហព័ន្ធមានមោទនភាពចំពោះសមិទ្ធផលដែលទទួលបាននៅពេលនេះ។ វាកើតចេញពីសមត្ថភាពនៃការខិតខំប្រឹងប្រែងរបស់កីឡាករ កីឡាការិនី គ្រូបង្វឹក និងក្រុមការងារទាំងអស់។

កីឡាជឺជីតស៊ូកំពុងក្លាយជាកីឡាដ៏មានសក្តានុពល១ប្រភេទសម្រាប់កម្ពុជាក្នុងការដណ្តើមយកមេដាយលើឆាកអន្តរជាតិ។ យ៉ាងណាជារឿងគួរឲ្យសោកស្តាយដែលថៃជាម្ចាស់ផ្ទះកីឡាស៊ីហ្គេម ឆ្នាំ២០២៥មិនដាក់កីឡាជឺជីតស៊ូទេ៕