ព័ត៌មានជាតិ

ប.ស.ស តម្រូវឱ្យពេទ្យឯកជនជាដៃគូ ត្រូវប្រញាប់ដាក់ពាក្យស្នើសុំចុះកិច្ចព្រមព្រៀងឡើងវិញ

បានផុស

៧ ខែ មុន

នៅ

ថ្ងៃពុធ ១០ កក្កដា ២០២៤

ដោយ

បេឡាជាតិសន្តិសុខសង្គម (ប.ស.ស.) បានតម្រូវឱ្យមូលដ្ឋានសុខាភិបាលឯកជនដែលជាដៃគូរបស់ប.ស.ស. ត្រូវប្រញាប់ដាក់ពាក្យស្នើសុំចុះកិច្ចព្រមព្រៀងឡើងវិញ។ ក្នុងករណីខកខានក្នុងការដាក់ពាក្យស្នើសុំឡើងវិញតាមការកំណត់ចាត់ទុកថាបានបញ្ចប់កិច្ចព្រមព្រៀងដោយស្វ័យប្រវត្តិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយកប.ស.ស. បានឱ្យដឹងនៅក្នុងសេចក្តីជូនដំណឹងមួយដែលទើបទទួលបាននៅថ្ងៃទី ១០ កក្កដា នេះ បានណែនាំដល់ លោក លោកស្រី ជានាយក នាយិកា ប្រធាន មូលដ្ឋាន សុខាភិបាលឯកជន ដែលបានចុះកិច្ចព្រមព្រៀងជាមួយបេឡាជាតិសន្តិសុខសង្គមរួចហើយ ត្រូវដាក់ពាក្យស្នើសុំចុះកិច្ចព្រមព្រៀងឡើងវិញ តាមទីតាំងភូមិសាស្ត្រ និងកាលបរិច្ឆេទដូចខាងក្រោម។ ចំពោះមូលដ្ឋានសុខាភិបាលឯកជន ដែលមានទីតាំងស្ថិតនៅរាជធានីភ្នំពេញ ខេត្តកណ្តាល និងខេត្តកំពង់ស្ពឺ ត្រូវដាក់ ពាក្យស្នើសុំចាប់ពីថ្ងៃទី ០៩ ខែកក្កដា ឆ្នាំ ២០២៤ រហូតដល់ថ្ងៃទី ០៩ ខែសីហា ឆ្នាំ ២០២៤។

ចំណែកមូលដ្ឋានសុខាភិបាលឯកជន ដែលមានទីតាំងស្ថិតនៅក្រៅពីរាជធានីភ្នំពេញ ខេត្តកណ្តាល និងខេត្តកំពង់ស្ពឺ ត្រូវដាក់ពាក្យស្នើសុំចាប់ពីថ្ងៃទី ០៩ ខែកក្កដា ឆ្នាំ ២០២៤ រហូតដល់ថ្ងៃទី ៣១ ខែសីហា ឆ្នាំ ២០២៤។

រីឯមូលដ្ឋានសុខាភិបាលឯកជន ដែលបានចុះកិច្ចព្រមព្រៀងជាមួយ ប.ស.ស. តាមយន្តការដែលមានការឯកភាព ពីនិយ័តករសន្តិសុខសង្គមរួចហើយ មិនតម្រូវឱ្យមានការដាក់ពាក្យស្នើសុំឡើងវិញទៀតនោះទេ ដោយការកំណត់ កាលបរិច្ឆេទចុះកិច្ចព្រមព្រៀង គឺយកកាលបរិច្ឆេទដែលបានចុះហត្ថលេខារវាងភាគីមូលដ្ឋានសុខាភិបាលឯកជន និង ប.ស.ស. សម្រាប់កំណត់សុពលភាពរយៈពេល ៣ ឆ្នាំ នៃកិច្ចព្រមព្រៀង។

បើតាមលោក ម៉េង ហុង ករណីមូលដ្ឋានសុខាភិបាលឯកជន ដែលបានចុះកិច្ចព្រមព្រៀងជាមួយ ប.ស.ស. រួចហើយ ដូចមាននូវក្នុងចំណុច ១ និងចំណុច ២ ខាងលើ ខកខានក្នុងការដាក់ពាក្យស្នើសុំចុះកិច្ចព្រមព្រៀងឡើងវិញតាមកាលបរិច្ឆេទខាងលើ ចាត់ទុកថាបានបញ្ចប់កិច្ចព្រមព្រៀងដោយស្វ័យប្រវត្តិ។

គិតត្រឹមឆ្នាំ ២០២៣ ប.ស.ស បានចុះកិច្ចព្រមព្រៀងជាមួយមូលដ្ឋានសុខាភិបាលសរុបចំនួន ១ ៥៣០ មូលដ្ឋានសុខាភិបាល នៅទូទាំងប្រទេស ដែលក្នុងនោះ មូលដ្ឋានសុខាភិបាលសាធារណៈ (មន្ទីរពេទ្យរដ្ឋ) មានចំនួន ១ ៣៩៥ និងមូលដ្ឋានសុខាភិបាលឯកជន (មន្ទីរពេទ្យឯកជន) មានចំនួន ១៣៥៕

អត្ថបទ ៖ សំអឿន

Related Topics:ប.ស.ស