ព័ត៌មានអន្ដរជាតិ
រុស្ស៊ី សន្យាដោះលែងជនជាតិឥណ្ឌា ដែលកំពុងច្បាំងនៅអ៊ុយក្រែន
ប្រទេសរុស្ស៊ី បានសន្យាថា នឹងដោះលែងពលរដ្ឋឥណ្ឌាទាំងអស់ដែលកំពុងប្រយុទ្ធក្នុងជួរទ័ពរបស់ខ្លួន។ ការប្រកាសនេះ បានធ្វើឡើងបន្ទាប់ពីដំណើរទស្សនកិច្ចរបស់នាយករដ្ឋមន្ត្រីឥណ្ឌា លោក Narendra Modi ទៅកាន់ទីក្រុងមូស្គូ ជួបជាមួយប្រធានាធិបតីរុស្ស៊ី លោក វ៉្លាឌឺមៀរ ពូទីន កាលពីដើមសប្ដាហ៍។
![](https://www.kampucheathmey.com/wp-content/uploads/2024/07/16473780-3e70-11ef-87b9-b7d466444513.jpg.webp)
ទីក្រុងដេលី កំពុងស្វែងរកការដោះលែងជនជាតិឥណ្ឌា ដែលត្រូវបានគេល្បូងឲ្យទៅធ្វើការនៅប្រទេសរុស្ស៊ី ដោយសន្យាថាការងារទាំងនោះមិនជាប់ពាក់ព័ន្ធនឹងការចូលបម្រើជួរកងទ័ពនោះឡើយ ប៉ុន្តែក្រោយមកជនជាតិឥណ្ឌាទាំងនោះបែរជាត្រូវបានគេបង្ខំឲ្យចូលទៅក្នុងការប្រយុទ្ធយ៉ាងសកម្មនៅក្នុងប្រទេសអ៊ុយក្រែនទៅវិញ។
គិតមកទល់នឹងពេលនេះ យ៉ាងហោចណាស់ប្រជាជនឥណ្ឌាចំនួន ៤នាក់ត្រូវបានសម្លាប់ក្នុងសង្គ្រាមរវាងរុស្ស៊ី និងអ៊ុយក្រែន។
រដ្ឋមន្ត្រីការបរទេសឥណ្ឌា លោក Vinay Kwatra បាននិយាយថា ក្នុងជំនួបជាមួយលោក ពូទីន, លោក Modi បាន “លើកឡើងយ៉ាងខ្លាំងអំពីបញ្ហានៃការដោះលែងមុនពេលកំណត់” នៃជនជាតិឥណ្ឌាដែលត្រូវបាន “គេបោកឲ្យចូលបម្រើការក្នុងជួរកងទ័ពរុស្ស៊ី”។ លោក បានបន្ថែមថា ជាការឆ្លើយតប ភាគីរុស្ស៊ីបានសន្យាអនុញ្ញាតឲ្យជនជាតិឥណ្ឌាទាំងអស់អាចចាកចេញពីការបម្រើកងទ័ពរុស្ស៊ីមុនការកំណត់ក្នុងកិច្ចសន្យាការងារ។
លោក Kwatra បានឲ្យដឹងទៀតថា មានជនជាតិឥណ្ឌាប្រហែល ៣៥ ទៅ ៥០នាក់នៅក្នុងកងកម្លាំងរុស្ស៊ី ដែលក្នុងនោះមាន ១០នាក់បានធ្វើមាតុភូមិនិវត្តន៍រួចមកហើយ។ លោក បន្តថា ប្រទេសទាំង២ឥឡូវនេះនឹងធ្វើការដើម្បីនាំយកជនជាតិឥណ្ឌាដែលនៅសេសសល់មកវិញ។
បើតាមការរៀបរាប់របស់ជនជាតិឥណ្ឌាមួយចំនួនដែលត្រូវគេយកទៅច្បាំងនៅរុស្ស៊ី បានឲ្យដឹងថា ហេតុតែចង់បានកម្រៃពលកម្មក្នុងតម្លៃខ្ពស់ ពួកគេត្រូវបានចាញ់ល្បួងតាមរយៈវីដេអូបង្ហោះនៅលើយូធូប ដោយភ្នាក់ងាររុស្ស៊ីដែលមានមូលដ្ឋាននៅឌូបៃ។ នៅពេលទៅដល់រុស្ស៊ី ពួកគេត្រូវបានបង្ខំឲ្យចុះកិច្ចសន្យា ហើយទទួលយកការហ្វឹកហាត់រយៈពេល១៥ថ្ងៃ មុនត្រូវបញ្ជូនទៅសមរភូមិជួរមុខ៕
ដោយ៖ ឈាង
![](https://kampucheathmey.com/wp-content/uploads/2020/12/1-01-2-01-1.png)
-
ព័ត៌មានជាតិ៦ ថ្ងៃ ago
យាយតាយកចៅអាយុ៦ខែ ទៅងូតទឹក ត្រូវខ្សែភ្លើងឆក់ស្លាប់ទាំង៣នាក់ យ៉ាងអាណោចអាធ័ម
-
ព័ត៌មានជាតិ៦ ថ្ងៃ ago
កូនប្រុសលោក រ័ត្ន ស្រ៊ាង ត្រូវបានតែងតាំងជាមេបញ្ជាការរងកងរាជអាវុធហត្ថរាជធានីភ្នំពេញ
-
ព័ត៌មានជាតិ៣ ថ្ងៃ ago
ឆ្នាំមុនតារាសម្ដែងជើងចាស់ គន្ធ តារាវណ្ណ ស្លាប់ ឯឆ្នាំនេះ ពិធីករល្បីលោក គន្ធ ជីវ័ន្ត ត្រូវជាកូន ក៏ស្លាប់តាមក្រោយ
-
សេដ្ឋកិច្ច៧ ថ្ងៃ ago
កម្ពុជាគួរត្រៀមខ្លួនបែបណា មុនពេលប្ដូរឋានៈ ទៅជាប្រទេសមានចំណូលមធ្យមកម្រិតខ្ពស់
-
សុខភាព១ ថ្ងៃ ago
ផ្លែឈើ៤មុខ គ្រោះថ្នាក់ខ្លាំងសម្រាប់អ្នកជំងឺខ្សោយតម្រងនោមធ្ងន់ធ្ងរ
-
ព័ត៌មានជាតិ២ ថ្ងៃ ago
គ្រោងដាំដើមឈើរាប់ម៉ឺនដើម ប្រែក្លាយតំបន់បឹងតាមោកជាឧទ្យានជាតិបៃតង
-
ព័ត៌មានអន្ដរជាតិ១ សប្តាហ៍ ago
ធ្លាក់ភ្លៀងមួយម៉ោង ទីក្រុងហូជីមិញ ត្រូវទឹកជន់លិច ល្ហាចល្ហឹម
-
ព័ត៌មានជាតិ១៧ ម៉ោង ago
ខែមិថុនា៖ ឧកញ៉ា ជាសមាជិកសមាគមឧកញ៉ា៨រូប ត្រូវដំឡើងងារជា អ្នកឧកញ៉ា