សន្តិសុខសង្គម

ស្ត្រី ២ នាក់ ជិះម៉ូតូមកពីផ្សារត្រឡប់ទៅបន្ទប់ជួលវិញ ជាអកុសល ត្រូវរថយន្តកិនស្លាប់ម្នាក់

បានផុស

២ ខែ មុន

នៅ

ថ្ងៃព្រហស្បតិ៍ ១១ កក្កដា ២០២៤

ដោយ

ស្ត្រី ២ នាក់ ជិះម៉ូតូឌុបគ្នាមកពីផ្សារ បំណងទៅបន្ទប់ជួលវិញ តែជាអកុសល ត្រូវរថយន្តកិនស្លាប់ម្នាក់ ចំណែកឯម្នាក់ទៀត រងរបួសស្រាល ដោយឡែករថយន្តបង្កបានបើកគេចខ្លួនបាត់ស្រមោលតែម្ដង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង ១១ ព្រឹក ថ្ងៃទី ១១ ខែកក្កដា ឆ្នាំ ២០២៤ នេះ នៅលើកំណាត់ផ្លូវឈ្នះ ឈ្នះ ភូមិជម្ពូវ័ន ២ សង្កាត់ចោមចៅទី ៣ ខណ្ឌពោធិ៍សែនជ័យ រាជធានីភ្នំពេញ។

ជនរងគ្រោះរួមមាន ៖ ទី ១-ឈ្មោះ ម៉ារ៉ាឌី ភេទស្រី អាយុ ២១ ឆ្នាំ (ស្លាប់) និង ទី ២-ឈ្មោះ ថន ស៊ីថៃ ភេទស្រី អាយុ ២១ ឆ្នាំ (របួសស្រាល)។ ជនរងគ្រោះទាំងពីរនាក់ ជាកម្មការិនីរោងចក្រ ស្នាក់នៅបន្ទប់ជួល ភូមិត្រពាំងទា សង្កាត់ត្រពាំងក្រសាំង ខណ្ឌពោធិ៍សែនជ័យ មានស្រុកកំណើតនៅឃុំនរាយ ស្រុកឈូក ខេត្តកំពត។

តាមប្រភពព័ត៌មានពីជនរងគ្រោះរងរបួសស្រាល បានឲ្យដឹងថា មុនពេលកើតហេតុពួកគេ(ជនរងគ្រោះទាំងពីរ) បានជិះម៉ូតូមួយគ្រឿង ម៉ាក Beat ពណ៌ស លាយក្រហម ពាក់ស្លាកលេខតាកែវ 1N 6431 មកពីផ្សារកំបូល ដោយធ្វើដំណើរតាមបណ្ដោយផ្លូវឈ្នះឈ្នះ ក្នុងទិសដៅពីត្បូងទៅជើង បំណងទៅបន្ទប់ជួលវិញ ខណៈមកដល់ចំណុចកើតហេតុ ក៏អកហ្សើរ ទើបចាប់ហ្វ្រាំងមុខអូសដួលទៅនឹងថ្នល់ ភ្លាមៗ នោះ ស្រាប់តែមានរថយន្តកូរ៉េ មិនចាំស្លាកលេខ មកពីក្រោយ កិនឈ្មោះ ម៉ារ៉ាឌី បណ្ដាលឲ្យស្លាប់ភ្លាមៗ ហើយរថយន្តបង្កបានបើកគេចខ្លួនបាត់ស្រមោលតែម្ដង។ ក្នុងនោះដែរ នៅលើកំណាត់ផ្លូវឈ្នះឈ្នះ បង្កការកកស្ទះចរាចរណ៍យ៉ាងខ្លាំង។

ក្រោយកើតហេតុ សមត្ថកិច្ចមូលដ្ឋាន បានចុះទៅដល់ចំណុចកើតហេតុសម្រួលចរាចរណ៍ និងទាក់ទងទៅជំនាញមកធ្វើកំណត់ហេតុប្រគល់សពជូនទៅក្រុមគ្រួសារយកធ្វើបុណ្យតាមប្រពៃណី ចំណែកម៉ូតូយកទៅរក្សាទុក រង់ចាំស្រាវជ្រាវចាប់រថយន្តបង្កមកដោះស្រាយ៕

អត្ថបទ ៖ សុខា