ព័ត៌មានអន្ដរជាតិ

អ្នកជំនាញ IMF៖ សេដ្ឋកិច្ចវៀតណាមងើបឡើងវិញលឿន ដោយសាររដ្ឋាភិបាលចេញចំណាត់ខ្លាំងក្លា

បានផុស

៦ ខែ មុន

នៅ

ថ្ងៃសៅរ៍ ១៣ កក្កដា ២០២៤

ដោយ

អ្នកជំនាញនៃមូលនិធិរូបិយវត្ថុអន្តរជាតិ (IMF) លោក Paulo Medas បានឱ្យដឹងថា សេដ្ឋកិច្ចរបស់ប្រទេសវៀតណាមបានងើបឡើងវិញយ៉ាងឆាប់រហ័សក្នុងឆមាសទី1នៃឆ្នាំ ២០២៤ ក្រោយជួបការលំបាកនៅចុងឆ្នាំ ២០២២ និងដើមឆ្នាំ ២០២៣ ដោយសារតែសកម្មភាពខ្លាំងក្លារបស់រដ្ឋាភិបាល។ នេះបើតាមការចុះផ្សាយរបស់កាសែត Viet Nam News កាលពីថ្ងៃសុក្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងបែបនេះ ធ្វើឡើងក្រោយលោក Paulo បានដឹកនាំក្រុមការងារ IMF ទៅវៀតណាមចន្លោះថ្ងៃទី ១២-២៦ កាលពីខែមុន។ ក្នុងបទសម្ភាសន៍ថ្មីៗនេះជាមួយទីភ្នាក់ងារសារព័ត៌មានវៀតណាមនៅទីក្រុង Washington DC មន្ត្រី IMF ដដែលបាននិយាយថា សេដ្ឋកិច្ចរបស់វៀតណាម បានស្ទុះងើបឡើងវិញ និងកើនឡើង ៦,៤ ភាគរយក្នុងឆមាសទី១។

លោកបានចាត់ទុកថា នេះគឹដោយសារតែកំណើននៃការនាំចេញ និងសកម្មភាពរបស់រដ្ឋាភិបាល និងធនាគាររដ្ឋវៀតណាម (SBV) ដូចជាការកាត់បន្ថយអត្រាការប្រាក់ និងការបង្កើនការវិនិយោគសាធារណៈ និងប្រាក់ឈ្នួលជាដើម។

ទាក់ទងនឹងការរំពឹងទុកសម្រាប់ឆមាសទី២ អ្នកជំនាញដដែលបានព្យាករណ៍ថា សេដ្ឋកិច្ចវៀតណាមនឹងបន្តងើបឡើងវិញ ប៉ុន្តែក្នុងល្បឿនយឺតជាង ហើយអាចនឹងកើនឡើងជាង ៦ ភាគរយសម្រាប់អត្រាប្រចាំឆ្នាំ។

ទោះយ៉ាងណាក៏ដោយ លោក Paulo បានចង្អុលបង្ហាញពីហានិភ័យដែលស្រពិចស្រពិលមួយចំនួន រួមទាំងការធ្លាក់ថ្លៃរូបិយប័ណ្ណ និងការកើនឡើងប្រាក់ឈ្នួលសាធារណៈ ដែលតម្រូវឱ្យធនាគារកណ្តាលត្រួតពិនិត្យយ៉ាងដិតដល់ និងចាត់វិធានការដើម្បីគ្រប់គ្រងផ្សេងៗ។

លើសពីនេះ លោកថ្លែងថា ដើម្បីជួយប្រទេសឱ្យយកឈ្នះលើបញ្ហាប្រឈមនានា វៀតណាមត្រូវធ្វើឱ្យមានតុល្យភាពការងើបឡើងវិញនៃសេដ្ឋកិច្ច និងការគ្រប់គ្រងហានិភ័យអតិផរណា៕

Related Topics:វៀតណាម