ព័ត៌មានអន្ដរជាតិ

ណាតូ សន្យាផ្ដល់អ្វីខ្លះឲ្យអ៊ុយក្រែន?

បានផុស

៧ ខែ មុន

នៅ

ថ្ងៃសៅរ៍ ១៣ កក្កដា ២០២៤

ដោយ

Chheang

កិច្ចប្រជុំកំពូលអង្គការណាតូឆ្នាំ២០២៤ ដែលមានរយៈពេលចំនួន៣ថ្ងៃ នៅរដ្ឋធានីវ៉ាស៊ីនតោន ឌីស៊ី បានបញ្ចប់ជាស្ថាពរទៅហើយកាលពីថ្ងៃទី១១ ខែកក្កដា។ ចំណុចរស៊ើបមួយនៅក្នុងចំណុចជាច្រើនទៀតនៅក្នុងកិច្ចប្រជុំកំពូលលើកទី៣៤នេះ គឺបញ្ហាសង្គ្រាមរ៉ាំរ៉ៃនៅអ៊ុយក្រែនរយៈពេលជាង២ឆ្នាំកន្លងទៅ ដែលបានកើតឡើង បន្ទាប់ពីមានការឈ្លានពានពីប្រទេសរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់សារព័ត៌មាន Aljazeera អ៊ុយក្រែន ទទួលបាន៦ចំណុចពីកិច្ចប្រជុំណាតូ ឆ្នាំ២០២៤ ដែលមានដូចជា៖

១. ប្លុកនេះ បាននិយាយថា ខ្លួននឹងផ្ដល់ឲ្យអ៊ុយក្រែនជាមួយនឹងប្រព័ន្ធខែលការពារដែនអាកាសយុទ្ធសាស្ត្របន្ថែមជាច្រើន រួមទាំងគ្រឿងបន្លាស់ Patriot ចំនួន៤ និងប្រព័ន្ធខែលការពារ SAMP/T។

២. មេដឹកនាំណាតូ ក៏បានសន្យាផ្តល់ជំនួយយោធាយ៉ាងហោចណាស់ ៤៣ពាន់លានដុល្លារដល់អ៊ុយក្រែនផងដែរ។

៣. សមាជិកសម្ព័ន្ធមិត្ត ក៏បានប្រកាសពីវិធានការដាច់ដោយឡែក និងវិធានការរួមគ្នាដើម្បីជំរុញសន្តិសុខអ៊ុយក្រែន។

៤. សហរដ្ឋអាមេរិក ហូឡង់ និងដាណឺម៉ាក បានប្រកាសថា យន្តហោះចម្បាំង F-16 ដំបូងបង្អស់ដែលផ្តល់ដោយអង្គការណាតូ នឹងស្ថិតក្នុងដៃអ្នកបើកយន្តហោះយោធាអ៊ុយក្រែននារដូវក្តៅ ឆ្នាំនេះ។ សហរដ្ឋអាមេរិក ក៏បាននិយាយផងដែរថា ខ្លួននឹងដាក់ពង្រាយមីស៊ីលរយៈចម្ងាយឆ្ងាយនៅក្នុងប្រទេសអាល្លឺម៉ង់ក្នុងឆ្នាំ២០២៦ ដើម្បីឆ្លើយតបទៅនឹងការភ័យខ្លាចរបស់ប្លុកចំពោះការគំរាមកំហែងកាន់តែខ្លាំងឡើងរបស់រុស្ស៊ីទៅលើអឺរ៉ុប។

៥. ទីក្រុងកៀវ បានប្រជែងជាយូរមកហើយសម្រាប់កៅអីចូលរួមជាសមាជិកណាតូ ខណៈពេលដែលមានការខ្វែងគំនិតមួយចំនួនរបស់ប្រទេសជាសមាជិក។ យ៉ាងណាមិញ សេចក្តីថ្លែងការណ៍របស់កិច្ចប្រជុំណាតូ បាននិយាយថា “អនាគតរបស់អ៊ុយក្រែនគឺនៅក្នុងអង្គការណាតូ” ហើយថាប្រទេសនេះកំពុងស្ថិតនៅលើ “ផ្លូវដែលមិនអាចត្រឡប់វិញបានទៅកាន់សមាហរណកម្មអឺរ៉ូ-អាត្លង់ទិកពេញលេញ រួមទាំងសមាជិកភាពណាតូ”។

៦. អគ្គលេខាធិការអង្គការណាតូ លោក Jens Stoltenberg បានសង្កត់ធ្ងន់ថា អ៊ុយក្រែននឹងមិនចូលរួមភ្លាមៗនោះទេ ប៉ុន្តែអាចចូលរួម នៅពេលដែលសង្គ្រាមជាមួយរុស្ស៊ីបានបញ្ចប់៕

ដោយ៖ ឈាង